اقمولالىق كاسىپكەرلەر ءوڭىر تۇرعىندارىنىڭ الەۋمەتتىك ماسەلەلەرىنە ۇدايى الاڭداپ وتىرادى. وڭىردە مەكتەپ پەن بالا باقشا, اۋرۋحانالار قۇرىلىسىن قولعا الىپ, تۇتاس اۋىلداردىڭ سۇيەنىشى بولعان جومارت كاسىپكەرلەر از ەمەس. ولار «رۋحاني جاڭعىرۋ» باعدارلاماسىنىڭ بارلىق 13 باعىتى بويىنشا جەرگىلىكتى بيلىك ورگاندارىمەن بىرلەسە وتىرىپ ىلكىمدى جۇمىس ىستەۋدە. ماسەلەن, «قازىنا SR» كومپانياسىنىڭ ديرەكتورى سايرا ماتايباەۆانىڭ قوسشى اۋىلىندا سالعان جاڭا مەكتەبى وزىق ءبىلىم بەرۋ ۇلگىسى بويىنشا جۇمىس ىستەۋدە. بۇل جوبانىڭ قۇنى 350 ميلليون تەڭگەنى قۇرايدى.
– «رۋحاني جاڭعىرۋ» باعدارلاماسىن جۇزەگە اسىرۋعا ءوڭىر كاسىپكەرلەرى سۇبەلى ۇلەس قوستى. ءبىزدىڭ قوعام ازاماتتىق باستامالارعا بەت بۇرىپ, الەۋمەتتىك ماسەلەلەردى شەشۋدە جاڭا باستامالار ۇسىنىپ كەلەدى. وبلىس اۋماعىندا 2019 جىلى «رۋحاني جاڭعىرۋ» اياسىندا 3 مىڭعا تارتا جوبا جۇزەگە اسىرىلدى. «تۋعان جەر» باعدارلامالىق باعىتى بويىنشا جالپى سومماسى 5,3 ميلليارد تەڭگەنى قۇرايتىن 583 الەۋمەتتىك نىسان قولدانىسقا بەرىلدى,–دەيدى اقمولا وبلىسى اكىمىنىڭ ورىنباسارى اينا ءمىسىرالىموۆا.
اقمولالىق ازاماتتار تۋعان ولكەنىڭ تاريحي تۇلعالارىن ارداقتاپ, ولاردىڭ ءومىر جولىن جاس ۇرپاققا ۇلگى ەتۋدى ماقسات تۇتقان. ءوڭىر اقىندارى مەن جازۋشىلارىنىڭ العاشقى اۋديوكىتابى بۇل باعىتتاعى سونى قادام بولماق.
– بۇگىنگى تاڭدا وسىنداي 9 اۋديوكىتاپ جارىق كوردى. ولاردى تەگىن «سمارت رۋحاني اقمولا» قوسىمشاسى ارقىلى ۇيالى تەلەفونعا جۇكتەپ الۋعا بولادى. الەۋمەتتىك جەلىلەردە دە تاراتىلۋدا. كەلەر جىلى, ىشكى ساياسات باسقارماسىنىڭ قولداۋىمەن كوكشە ءوڭىرى تۋرالى اقىن-جارۋشىلاردىڭ تۋىندىلارىن جەكە جيناق ەتىپ جاريالاۋدى جوسپارلاپ وتىرمىز,–دەيدى وڭىرلىك «رۋحاني جاڭعىرۋ» جوبالىق كەڭسەسىنىڭ جەتەكشىسى قايرات سەيىتقازين.
باعالى باستامالار اۋىل تۇرعىندارى تاراپىنان دا قولداۋ تاۋىپ وتىر. 1993 جىلدان بەرى اۋىل شارۋاشىلىعىمەن اينالىسىپ كەلە جاتقان ورازاليندەر اۋلەتى تۋعان اۋىلدارىن قامقورلىقتارىنا الىپ وتىر.
– 2019 جىلى ارقايسىسى 8 پاتەرلى مۇعالىمدەر ۇيلەرىنىڭ قۇرىلىسىن اياقتادىق. وسىلايشا, اۋىلىمىزعا كەلگەن ۇستازدارعا 24 پاتەر بەردى. سپورت الاڭى سالىنىپ, 6 شاقىرىم اۋىل كوشەسىنە اسفالت توسەلدى,–دەيدى «بايدالى» سەرىكتەستىگىنىڭ ديرەكتورى باعدات ورازالين.
ەل جانى جومارت كاسىپكەرلەرگە اق العىستارىن ايتۋدا.
