جاڭا اشىلعان مۋزەي عيماراتى 2 قاباتتان تۇرادى. ونىڭ جالپى اۋماعى 4015 شارشى مەتردى قۇرايدى. سونىمەن قاتار مۋزەي ەكسپوزيتسياسى «تاريحقا دەيىنگى كەزەڭ زالى», «تاراز قالاسىنىڭ تاريحى», «قازاق حالقىنىڭ ەتنوگرافياسى», «اۋليەاتا كەزەڭى» سياقتى ءتورت زالدان تۇرادى. اتالعان ەكسپوزيتسيالاردا اۋليەاتا ءوڭىرىنىڭ ەجەلگى زاماننان بۇگىنگى كۇنگە دەيىنگى تاريحى كورسەتىلگەن. مۋزەي قورىندا 65 مىڭنان استام بىرەگەي جانە قۇندى جادىگەرلەر ساقتالعان. مۇندا ساقتالعان تاريحي, ارحەولوگيالىق كوللەكتسيالار, نۋميزماتيكا, تاريحي-تۇرمىستىق زاتتار, قولجازبالار مەن باسپا قۇجاتتارى, بەينەلەۋ جانە ساندىك ونەر تۋىندىلارى تاريحىمىزدىڭ باي قازىناسى.
ماسەلەن, مۋزەيدە نەوليت داۋىرىندە ەگىنشىلىك پايدا بولعاندىعىن دالەلدەيتىن قولا وراق, 1950 جىلى قورداي اۋدانىنان تابىلعان ساق تايپاسىنىڭ دۋلىعاسى, الماتى وبلىسى, ەسىك اۋماعىنان تابىلعان «التىن ادامنىڭ» كوشىرمەسى, 1960 جىلى تالاس اۋدانى, بيلىكول جەرىنەن تابىلعان ۇماي انانىڭ تاسقا قاشالعان بەينەسى, وبلىس اۋماعىنان تابىلعان VI-XIII عاسىرلارعا جاتاتىن بالبال تاستار جانە وزگە دە كوپتەگەن جادىگەرلەر بار. سونىمەن قاتار, تاراز قالاسىنىڭ نەگىزىن سالۋشى عۇن پاتشاسى شانيۋي چجي-چجي بەينەسى بەينەلەنگەن جادىگەر ساقتالعان. ول ءبىزدىڭ زامانىمىزعا دەيىنگى 38 جىلدارى تاراز قالاسىنىڭ ىرگەتاسىن قالاۋشى رەتىندە تاريحتان بەلگىلى. پاننودا 2 جىل ىشىندە 2 قاتارلى مىقتى قالا سالعان عۇن پاتشاسىنىڭ ۋازىرلەرى اق كيىزگە كوتەرىپ حان سايلاپ جاتقان كەزى كورسەتىلگەن.
سونداي-اق مۋزەيدەگى ۇلكەن جاڭالىقتىڭ ءبىرى – زاماناۋي يننوۆاتسيالىق تەحنولوگيا, لازەر ارقىلى جاسالعان, سۋرەتتەردى كورسەتەتىن گولوگرامما دەۋگە بولادى.گولوگراممادا وبلىسىمىزدىڭ تاريحي-ارحيتەكتۋرالىق ەسكەرتكىشتەرى ۆيرتۋالدى تۇردە كورسەتىلەدى. كەلۋشىلەر 3D فورماتتاعى گولوگرافيالىق شوۋدى جان-جاعىنان تاماشالاي الادى. ال, مۋزەيدىڭ ءبىر قابىرعاسىندا «قۇرمەتتى ازامات» اتاعىنىڭ بەرىلۋ ەرەجەسى كورسەتىلگەن.
سونداي-اق سەنسورلى كيوسكىدە «جامبىل وبلىسىنىڭ قۇرمەتتى ازاماتتارىنىڭ» ءتىزىمى, ولار تۋرالى مالىمەتتەر ەنگىزىلگەن. مۇندا ولكەمىزدىڭ باي تابيعي مۇراسىمەن قاتار, ءتۇرلى قازبا بايلىقتارى, تاريحي بۇيىمدار ورىن العان. مۋزەيگە كەلۋشىلەر جامبىل وبلىسىنىڭ تاريحىمەن, ارحەولوگيالىق قازبالار كەزىندە تابىلعان بىرەگەي جادىگەرلەرىمەن تانىسىپ, ولكە تاريحى جانە داڭقتى تۇلعالارى جايلى مول ماعلۇمات الا الادى. وسى ماقساتتا مۋزەيگە كەلۋشىلەرگە قازاق جانە ورىس تىلدەرىندە, ال, شەتەلدەن كەلگەن تۋريستەرگە اعىلشىن تىلدەرىندە ءوڭىر تاريحىنا شولۋ, تاقىرىپتىق ەكسكۋرسيالار جۇرگىزىلەدى.
