«مەملەكەت باسشىسى ءبىلىم سالاسىن دامىتۋداعى باستى ماقساتتار مەن مىندەتتەردى بەلگىلەپ بەردى. قازىر ءبىلىم سالاسىن دامىتۋدىڭ 2025 جىلعا دەيىنگى باعدارلاماسى دايىندالۋدا. ودان بولەك, پەداگوگتار مارتەبەسى تۋرالى زاڭ جوباسى ماجىلىستە قارالۋدا. ارتىق جۇكتەمەلەردى ازايتۋ, ۇستازداردىڭ جاۋاپكەرشىلىگىن ارتتىرۋ باعىتتارى بار. جالپى, ماسەلە كوپ. اشىپ ايتىڭىزدار. ءبىز وسى ماقساتتا وڭىرلەردى ارالاپ ءجۇرمىز. پىكىرلەرىڭىزدى ەسكەرەمىز», دەدى بەردىبەك ساپارباەۆ.
ءبىلىم جانە عىلىم ءمينيسترى اسحات ايماعامبەتوۆ پەداگوگتار مارتەبەسى تۋرالى زاڭ جوباسىن جان-جاقتى ءتۇسىندىرىپ بەردى. ونىڭ ايتۋىنشا, مەملەكەت-جەكەمەنشىك ارىپتەستىكتى دامىتۋدا شىمكەنت كوش باستاپ كەلەدى. بيىل بۇل ماقساتتا 10 جەكەمەنشىك مەكتەپ اشىلعان. بۇل – جاقسى كورسەتكىش. سونداي-اق جيىندا ۇستازدار تاراپىنان ۇلتتىق تاربيەنى كۇشەيتۋ, الەۋمەتتىك جاعدايدى كوتەرۋ, مەكتەپتەردەگى ورىنسىز تەكسەرۋلەردى ازايتۋ ماسەلەلەرى كوتەرىلدى.
مەملەكەت باسشىسىنىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىنىڭ وڭىرلەردە ورىندالۋى جونىندەگى ەسەپتى كەزدەسۋدە پرەمەر-ءمينيستردىڭ ورىنباسارى بەردىبەك ساپارباەۆ قالاداعى الەۋمەتتىك ماسەلەلەر بويىنشا تۇرعىنداردىڭ پىكىرىن تىڭدادى.
اشىق ديالوگ فورماتىندا وتكەن جيىندا اتاۋلى الەۋمەتتىك كومەك توڭىرەگىندەگى كەيبىر كەلەڭسىزدىكتەر ءسوز بولدى. سونداي-اق جولداۋداعى كوزدەلگەن نەگىزگى تاپسىرمالاردىڭ ورىندالۋى بويىنشا حالىقپەن پىكىرلەستى.
«پرەزيدەنت ق.توقاەۆتىڭ تاپسىرماسىنا سايكەس حالىقتى الەۋمەتتىك قولداۋ ماقساتىندا بيۋدجەتتەن 250 ملرد تەڭگە قارجى ءبولىندى. سونىمەن قاتار حالىق اراسىندا نەسيە تولەۋدەن كەشىگىپ, ايىپپ ۇلى ءوسىپ كەتكەن شىعىنداردى وتەۋ ءۇشىن 142 ملرد تەڭگە جۇمسالدى. مەملەكەت باسشىسىنىڭ جولداۋىن جۇزەگە اسىرۋ ءۇشىن قوعام مەن بيلىك ورتاسىنداعى كەرى بايلانىستى وڭتايلاندىراتىن ءتيىستى قۇجاتتار ازىرلەنۋدە. حالىقتان كەلگەن بىردە-ءبىر سۇراقتار جاۋاپسىز قالماۋى كەرەك. ءار وڭىردە قۇرىلعان قوعامدىق كەڭەستىڭ جۇمىسىندا دا كەمشىلىكتەر جەتەرلىك, اشىقتىق جوق. سوندىقتان حالىق اراسىندا ءجيى ساۋالداما وتكىزۋدى جوسپارلاپ وتىرمىز. الەۋمەتتىك ساۋالداما بويىنشا كورسەتكىشى 30 پايىزدان تومەن بولسا, جەدەل تۇردە ماسەلەسى قارالاتىن بولادى», دەدى بەردىبەك ماشبەك ۇلى.
ەستەرىڭىزگە سالار بولساق, شىمكەنت قالاسىندا بيىلعى توعىز ايدا اتاۋلى الەۋمەتتىك كومەككە (ااك) بولىنگەن 22,3 ملرد تەڭگەنىڭ 14,6 ملرد تەڭگەسى, ياعني 65,5 پايىزى يگەرىلگەن. ال ااك الۋعا ءوتىنىش بەرگەندەردىڭ سانى بيىل 6,9 ەسەگە ارتقان. بۇل كورسەتكىش اتاۋلى الەۋمەتتىك كومەكتى تولەۋدىڭ جاڭا مودەلىن جاساۋعا تۇرتكى بولىپ وتىر.
وسى ورايدا مەملەكەت تاراپىنان شىن مۇقتاج جاندارعا كورسەتىلگەن كومەكتى ورتا جولدان قاعىپ كەتكىسى كەلەتىندەر از بولماپتى. جەرگىلىكتى اكىمدىك مۇشەلەرىنىڭ ايتۋىنشا, اتاۋلى الەۋمەتتىك كومەككە قۇجات تاپسىرعان مۇقتاجدار قاتارىندا 7 596 وتباسىنىڭ تابىسىن جاسىرعانى انىقتالدى. قازىرگى ۋاقىتتا 2 529 وتباسىنا تاعايىندالعان 1 530 ملن تەڭگە كولەمىندەگى تولەمدەر تولىق توقتاتىلدى.
ەل قازىناسىنان بولىنگەن قارجىنىڭ جۇمسالۋىن قاداعالاۋ ماقساتىندا قالا اكىمدىگى تاراپىنان جۇرگىزىلگەن زەرتتەۋلەر مەن تەكسەرۋلەر ناتيجەسىندە 271 وتباسىنا حابارلاندىرۋ تاراتىلىپ, ونىڭ 3-ءۋى عانا ءوز ەركىمەن 828,4 مىڭ تەڭگە قارجىسىن بيۋدجەتكە قايتارعان. قازىرگى تاڭدا 5 116 وتباسىنىڭ الەۋمەتتىك تولەمدەرىنە قايتا ەسەپتەۋ جۇمىستارى جۇرگىزىلۋدە. بۇگىنگە دەيىن 4 255 وتباسىنىڭ تولەمدەرى قايتا ەسەپتەلىپ تاعايىندالعان قارجى 1 037,4 ملن تەڭگەگە كەمىتىلدى.
بۇل جونىندە سالالىق مينيسترلىك پەن جەرگىلىكتى اتقارۋشى بيلىك بىرلەسىپ جۇمىس ىستەۋدە. «ەڭ باستىسى اتاۋلى الەۋمەتتىك كومەكتى تاعايىنداۋدا ماسىلدىققا جول بەرمەۋىمىز قاجەت», دەيدى سالا باسشىلارى.
تۇرعىندار مەن سالا ماماندارىنىڭ پىكىرىن تىڭداعان ۇكىمەت باسشىسىنىڭ ورىنباسارى بەردىبەك ساپارباەۆ مەملەكەت ءبىرىنشى كەزەكتە بالالارعا جانە كوپ بالالى وتباسىلارعا كومەكتەسەتىنىن جەتكىزدى. ءارى ەڭبەككە قابىلەتتى ازاماتتار جۇمىس ىستەۋگە نيەتتى بولسا, مەملەكەت جۇمىسقا ورنالاسۋعا نەمەسە كىشى بيزنەسپەن اينالىسۋعا كومەكتەسەتىنىن اتاپ ءوتتى.
شىمكەنت
