ساپاردىڭ نەگىزگى ماقساتى — مەملەكەت باسشىسىنىڭ قازاقستان حالقىنا ارناعان جولداۋىنىڭ باسىم باعىتتارىن ءتۇسىندىرۋ.
ۇكىمەت مۇشەلەرىنىڭ جۇمىس ساپارى №65 ورتا مەكتەپكە بارۋدان باستالدى, وندا پەداگوگتار قاۋىمداستىعىمەن, ارداگەرلەرمەن جانە ءبىلىم بەرۋ سالاسىنىڭ قىزمەتكەرلەرىمەن كەزدەسۋ ءوتتى.
كەزدەسۋ بارىسىندا ءبىلىم بەرۋ ساپاسىن ارتتىرۋ, ماتەريالدىق-تەحنيكالىق بازانى جاقسارتۋ, پەداگوگتاردىڭ مارتەبەسىن جانە ماتەريالدىق قامتاماسىز ەتۋدى ارتتىرۋ جانە باسقا دا وزەكتى ماسەلەلەر تالقىلاندى.
ءوز سوزىندە ۆيتسە-پرەمەر ەل باسشىلىعى الەۋمەتتىك سالانى دامىتۋعا ەلەۋلى قولداۋ كورسەتىپ جاتقانىن اتاپ ءوتتى. ء«بىز ءبىلىمدى جاستار بۋىنىن تاربيەلەۋىمىز كەرەك. ەلباسى مەن مەملەكەت باسشىسى بۇعان ەرەكشە كوڭىل بولەدى. "پەداگوگ مارتەبەسى تۋرالى" زاڭ جوباسى پارلامەنتتىڭ قاراۋىندا. مۇعالىمدەردىڭ قۇقىقتارى قورعالادى», — دەدى ول.
ۆيتسە-پرەمەر جاستاردى رۋحاني-ونەگەلىك تاربيەلەۋدى كۇشەيتۋدىڭ, ولاردى مەكتەپتەن تىس ىسپەن شۇعىلدانۋعا تارتۋدىڭ قاجەتتىلىگىنە توقتالدى. «بىزدە جاستار اراسىندا قۇقىق بۇزۋشىلىقتار مەن وزىنە-ءوزى قول جۇمساۋ فاكتىلەرى نەلىكتەن ارتىپ كەلەدى؟ سەبەبى, بالالار مەكتەپتەن كەيىن ەش نارسەمەن شۇعىلدانبايدى. اتا-انالارى جۇمىستا بولعان كەزدە, بالا ءوز بەتىمەن قالادى. بالالار ءتۇرلى ۇيىرمەلەر مەن سەكتسيالارعا بارىپ, سپورتپەن شۇعىلدانىپ, ونەرمەن اينالىسۋى قاجەت. بىزدە الەۋمەتتىك نىساندار جەتكىلىكتى تۇردە سالىنعان, ولارعا كەشكى ۋاقىتتا ءارى دەمالىس كۇندەرى جاستاردىڭ بارۋىن بارىنشا قامتاماسىز ەتۋ قاجەت. ءبىز ءتيىستى جۇمىستاردى جۇرگىزىپ جاتىرمىز. سوندا ءبىزدىڭ بالالارىمىز تاربيەلى, دەندەرى ساۋ بولىپ, قۇقىق بۇزۋشىلىقتارعا بارمايدى», — دەدى ب. ساپارباەۆ.
سونداي-اق ۆيتسە-پرەمەر كوللەدجدەردىڭ جۇمىسىن سىنعا الدى. «كوللەدجدەردە جىل سايىن مىڭداعان تۇلەكتەر شىعادى, ولار جوسپارلى تۇردە جۇمىسسىزدار قاتارىن تولىقتىرادى دەۋگە بولادى. سەبەبى, كوللەدجدەردىڭ باسشىلىعى كىمدى ءارى قالاي وقىتىپ جاتقاندارىن قاداعالامايدى. بىرنەشە جىل بۇرىن ءبىز ءار تۇلەكتىڭ جۇمىسقا ورنالاسۋى زەينەتاقى جارنالارى تۋرالى انىقتامامەن راستالاتىن تاجىريبەنى ەنگىزدىك, بىراق بۇدان دا شىعۋدىڭ جولىن تاپتى. ءبىر-ەكى ايعا جۇمىسقا تۇرادى, اۋدارىمدار تۇسكەن سوڭ, قاعاز الىپ كەلدى جانە سونىمەن ماسەلەنى جاۋىپ قويادى. سەبەبى, كوللەدجدەر سۇرانىسى جوق ماماندىقتارعا وقىتادى جانە ءبىلىم بەرۋ ساپاسى تومەن. سوندىقتان بىزدە بارلىق جەردە كادر تاپشىلىعى بار», — دەدى ب. ساپارباەۆ.
بۇدان وزگە, ۆيتسە-پرەمەر شىمكەنت اكىمدىگىندە الەۋمەتتىك-ەڭبەك سالاسى ماسەلەلەرى جانە مىندەتتى الەۋمەتتىك مەديتسينالىق ساقتاندىرۋدى ەنگىزۋ بويىنشا كەڭەس وتكىزدى.
