قارجى جانە بيۋدجەت كوميتەتىنىڭ توراعاسى ولگا پەرەپەچينا شارانى اشا كەلىپ, «كوللەكتورلىق قىزمەت تۋرالى» زاڭ كۇشىنە ەنگەن كۇننەن باستاپ 2 جىلدان استام ۋاقىت وتكەنىن, بىرقاتار تاجىريبە جيناقتالعانىن جانە زاڭنىڭ قۇقىقتىق قولدانىلۋىنا بەلگىلى ءبىر تالداۋ جاساۋ قاجەتتىگىن اتاپ ءوتتى.
ەلىمىزدىڭ ۇلتتىق بانكى توراعاسىنىڭ ورىنباسارى ولەگ سمولياكوۆ كوللەكتورلىق اگەنتتىكتەردىڭ قىزمەتىن رەتتەۋ, وزەكتى ماسەلەلەر جانە ولاردى شەشۋ جولدارى تۋرالى حاباردار ەتتى.
و. سمولياكوۆ قارىز شارتتارى بويىنشا بەرەشەكتى ءوندىرىپ الۋ جونىندەگى قىزمەتتى جۇزەگە اسىراتىن ۇيىمداردىڭ ارەكەتتەرىنە ازاماتتاردىڭ كوپتەگەن شاعىمدارى كوللەكتورلىق قىزمەت تۋرالى زاڭدى قابىلداۋعا سەبەپ بولعانىن ەسكە سالدى. مۇنداي كومپانيالاردىڭ قىزمەتى ازاماتتىق كودەكس ەرەجەلەرىنىڭ نەگىزىندە جۇزەگە استى جانە ولاردىڭ سانى زاڭ قابىلدانعانعا دەيىن شامامەن 900 كومپانيا بولدى.
و.سمولياكوۆتىڭ ايتۋىنشا, 2017 جىلى قاجەتتىلىگى ەسكەرىلە وتىرىپ, كوللەكتورلىق اگەنتتىكتى قۇرۋ ءتارتىبى, سونداي-اق كوللەكتورلىق قىزمەتتى جۇزەگە اسىرۋ ەرەجەلەرى رەتتەلگەن كوللەكتورلىق قىزمەت تۋرالى زاڭ ازىرلەنىپ, قابىلدانعان بولاتىن. ولارعا سايكەس كوللەكتورلىق اگەنتتىكتىڭ بورىشكەرمەن, ونىڭ وكىلىمەن جانە ءۇشىنشى تۇلعالارمەن ءۇي-جايلاردا اۋديو-جانە بەينەتەحنيكا قۇرالدارىنىڭ كومەگىمەن ءوزارا ءىس-قيمىل پروتسەسىن مىندەتتى تۇردە تىركەي وتىرىپ ءوزارا ءىس-قيمىل جاساۋ تاسىلدەرى, سانى, سونداي-اق ۋاقىتشا شەكتەرى بەلگىلەنگەن.
اگەنتتىكتەرگە قاتىستى ىقپال ەتۋ شارالارىن قولدانۋ قۇقىعى بويىنشا كوللەكتورلىق اگەنتتىكتەردىڭ قىزمەتىن باقىلاۋ جونىندەگى ۋاكىلەتتى ورگان بولىپ ۇلتتىق بانك بەلگىلەندى.
بۇگىنگى كۇنى تىزىلىمگە 177 كوللەكتورلىق اگەنتتىك ەنگىزىلدى, ولاردىڭ 12-ءسى ەرىكتى تۇردە تىزىلىمنەن شىعارىلدى. قازاقستاندا قازىرگى كەزدە بارلىعى 165 كوللەكتورلىق اگەنتتىك جۇمىس ىستەيدى.
«بيىلعى قىركۇيەك ايىنان باستاپ قازاقستان رەسپۋبليكاسى پارلامەنتى سەناتىنىڭ دەپۋتاتتارى, ۇلتتىق بانك, قازاقستان قارجىگەرلەر قاۋىمداستىعى, قازاقستان كوللەكتورلار وداعى, سونداي-اق كوللەكتورلىق اگەنتتىكتەردىڭ باسشىلارى اعىمداعى ماسەلەلەردى تالقىلادى. ونىڭ قورىتىندىسى بويىنشا زاڭنامانى جەتىلدىرۋ بويىنشا ۇسىنىستار توپتاماسى ازىرلەندى», - دەدى و.سمولياكوۆ.
ونىڭ پىكىرىنشە, بۇل شارالار ۇلتتىق بانككە كوللەكتورلىق اگەنتتىكتەردىڭ قىزمەتىن تولىق كولەمدە باقىلاۋدى جۇزەگە اسىرۋعا, ولاردىڭ قىزمەتىنىڭ اشىقتىعىن ارتتىرۋعا, وسىلايشا قۇقىققا قارسى ىقتيمال ارەكەتتەردەن ازاماتتاردى قورعاۋعا مۇمكىندىك بەرەدى.
«قازاقستان كوللەكتورلار وداعى» زاڭدى تۇلعالار بىرلەستىگىنىڭ توراعاسى يۋري لي قازاقستان كوللەكتورلار وداعىنىڭ كوزقاراسى تۇرعىسىنان كوللەكتورلىق قىزمەت تۋرالى زاڭنامانى جەتىلدىرۋ بويىنشا ويلارىمەن ءبولىستى.
قازاقستان قارجىگەرلەر قاۋىمداستىعى كەڭەسى توراعاسىنىڭ ورىنباسارى جانار ابدىكارىموۆا ءوز سوزىندە كوللەكتورلار ينستيتۋتىن دامىتۋ ماسەلەلەرىنە جانە ونىڭ قازاقستاننىڭ قارجى نارىعىنا اسەرى ەگجەي-تەگجەيلى توقتالدى.
دوڭگەلەك ۇستەل وتىرىسىنا ادىلەت, ەڭبەك جانە حالىقتى الەۋمەتتىك قورعاۋ مينيسترلىكتەرىنىڭ, سونداي-اق باس پروكۋراتۋرانىڭ وكىلدەرى قاتىستى.
شارا بارىسىندا سەناتورلار عۇمار دۇيسەمباەۆ, باقتىباي شەلپەكوۆ جانە نۇرلان قىلىشباەۆ ءوز ۇسىنىستارى مەن ەسكەرتپەلەرىن ايتتى.
ولگا پەرەپەچينا دوڭگەلەك ۇستەل وتىرىسىن قورىتىندىلاي كەلىپ, دنپۋتاتتار ماڭىزدى ماسەلەلەردى ودان ءارى تالقىلاۋعا, ولاردى دەپۋتاتتىق ساۋالدار بارىسىندا دا, كوللەكتورلىق قىزمەت تۋرالى زاڭنامانى جەتىلدىرۋ اياسىندا دا شەشۋگە دايىن ەكەنىن اتاپ ءوتتى.
