كەزدەسۋ قازاقستان رەسپۋبليكاسى پارلامەنتى سەناتى دەلەگاتسياسىنىڭ رەسەيگە رەسمي ساپارى اياسىندا ءوتتى.
داريعا نازارباەۆا كەزدەسۋ بارىسىندا جىلى شىرايلى قابىلداۋلار ءۇشىن پاتريارحقا العىس ايتتى جانە قازاقستان رەسپۋبليكاسى مەن ماسكەۋ پاتريارحاتى اراسىندا ءوزارا سىندارلى ءىس-قيمىل قالىپتاسىپ, سەنىمدى قارىم-قاتىناس ورناعانىن اتاپ ءوتتى.
«الەمدىك جانە ءداستۇرلى دىندەر ليدەرلەرىنىڭ IV سەزىنە ءسىزدىڭ قاتىسۋىڭىز فورۋم جۇمىسىنا باعا جەتپەس ۇلەس قوستى جانە ونىڭ مازمۇنىن ايتارلىقتاي بايىتا ءتۇستى. ءبىزدىڭ ىنتىماقتاستىعىمىز بەن ءوزارا قارىم-قاتىناسىمىز الداعى ۋاقىتتا دا ەلدەرىمىز اراسىنداعى بەيبىتشىلىك پەن كەلىسىمدى نىعايتۋعا ىقپال ەتەدى دەپ ۇمىتتەنەمىز. ءسىزدى 2021 جىلدىڭ ماۋسىم ايىندا وتەتىن كەلەسى فورۋمعا قۇرمەتتى قوناق رەتىندە قاتىسادى دەپ ۇمىتتەنەمىز», - دەدى داريعا نازارباەۆا.
پاتريارح كيريلل ءوز كەزەگىندە داريعا نازارباەۆاعا فورۋمعا شاقىرعانى ءۇشىن العىسىن ءبىلدىردى جانە قوعامدار, دىندەر مەن مادەنيەتتەر اراسىندا سىندارلى ۇنقاتىسۋ ورناتۋداعى, دىنارالىق توزىمدىلىكتى, ىزگى نيەت پەن ءوزارا تۇسىنىستىك قالىپتاستىرۋداعى ءدىني يەرارحتار سەزىنىڭ ماڭىزدى ەكەنىن اتاپ ءوتتى.
«قازاقستان – قاسيەتتى مەكەن. ءبىز ەلىمىزدىڭ جانە ءوزارا قارىم-قاتىناسىمىزدىڭ وڭ دامۋىنا وتە قۋانىشتىمىز. سەزد الەم قاۋىمداستىعىن تولعاندىراتىن ماڭىزدى جانە ناقتى ماسەلەلەر شەشىلەتىن اشىق الاڭ. بۇل رەتتە تۇڭعىش پرەزيدەنت ن. نازارباەۆتىڭ ءرولى مەن ەڭبەگى وتە زور. ءبىز بارلىق باعىتتار بويىنشا قولداۋ مەن تىعىز ىنتىماقتاستىققا, ونىڭ ىشىندە كونفەسسياارالىق جانە وركەنيەتارالىق ديالوگتى دامىتۋ جونىندەگى ن.نازارباەۆ ورتالىعىمەن بايلانىستى نىعايتۋعا ىقىلاستىمىز», - دەپ قورىتىندىلادى پاتريارح كيريلل.
