قانت قىزىلشاسى ەگىستىگىنىڭ ارتۋى جەرگىلىكتى جەردەگى وڭدەۋ ءوندىرىسىنىڭ دە وركەندەۋىنە قوزعاۋ سالدى. مىسالى, وتكەن جىلى قايتا جاڭعىرتۋدان وتكەن ەكى ءوندىرىس وشاعى – كوكسۋ جانە اقسۋ قانت زاۋىتتارى 42 مىڭ توننا تازا اق قانت ءوندىردى. ماماندار بۇل دايىن ءونىمنىڭ ىشكى نارىقتى قامتۋعا جەتەعابىل ەكەنىن ايتۋدا. بيىل دا جەتىسۋ توپىراعىندا ءونىپ, وسكەن ءتاتتى تۇبىردەن الىناتىن تازا قانت كولەمى كوبەيمەك. قازىر قانت قىزىلشاسىن قازىپ, جيناۋ ناۋقانى قىزىپ تۇر.
جاقىندا اقسۋ قانت زاۋىتى وسى جىلعى قانت قىزىلشاسىنىڭ العاشقى ءونىمىن قابىلداي باستادى. ءبىرىنشى كۇنى اقسۋ جانە سارقان اۋداندارىنىڭ كاسىپكەرلەرى كاسىپورىننىڭ دايىنداۋ پۋنكتىنە 450 توننادان استام ءتاتتى ءتۇبىردى اكەلدى. جاقىن ارادا الاكول اۋدانىنىڭ قىزىلشا وسىرۋشىلەرى ءونىم جونەلتەتىن بولادى.
اقسۋ اۋدانىنداعى «اقمول» سەرۆيستىك-دايىنداۋ ورتالىعى دا العاشقى قاتاردا جينالعان قىزىلشانى زاۋىتقا وتكىزدى. سەرۆيستىك-دايىنداۋ ورتالىعى 2018 جىلى قۇرىل ەكەن, «جەتىسۋ» الەۋمەتتىك كورپوراتسياسى ارقىلى قانت قىزىلشاسىنىڭ ەليتالىق تۇقىمى مەن اۋىل شارۋاشىلىعى تەحنيكاسىن الىپ, ءىسىن ىلگەرلەتىپ وتىر. بيىل قىزىلشا القابىن 70 گەكتاردان 110 گەكتارعا دەيىن ۇلعايتىپتى.
- بۇيىرا, ءونىم مول بولادى دەپ كۇتىپ وتىرمىز. قىزىلشانىڭ ورتاشا ونىمدىلىگى گەكتارىنا 600 تسەنتنەردى قۇرادى. ءبىرىنشى كۇنى ءبىز كاسىپورىنعا 250 توننا قىزىلشا اكەلدىك. جالپى بيىل 6 مىڭ توننادان استام ءونىم الۋدى جوسپارلاپ وتىرمىز, - دەيدى «اقمول» سەرۆيستىك-دايىنداۋ ورتالىعى ديرەكتورى بەرىك تىنىشباەۆ.
ال 2017 جىلى ەكىنشى تىنىسى اشىلىپ, قايتا ىسكە قوسىلعان اقسۋ قانت زاۋىتى وتكەن ەكى جىل ىشىندە 170,3 مىڭ توننا قانت قىزىلشاسىن قابىلداپ, 13 مىڭ توننا قانت ءونىمىن شىعاردى. وسى جىلى 200 مىڭ توننا قىزىلشا قابىلداپ, 20 مىڭ توننا تازا قانت قۇمىن شىعارۋ جوسپارلانۋدا. «اقسۋقانت» جشس باس ديرەكتورى سامات نادىرباەۆتىڭ ايتۋىنشا, قانت ءوندىرىسى قازان ايىندا باستالادى.
- بيىل زاۋىتتى جاڭعىرتۋدىڭ ەكىنشى كەزەڭىن اياقتايمىز. بۇل ءوز كەزەگىندە ءوندىرىستى 4 مىڭ تونناعا دەيىن ارتتىرۋعا مۇمكىندىك بەرەدى. ءۇشىنشى كەزەڭ اياقتالعاننان كەيىن تولىق وندىرىستىك قۋاتتىلىعىنا كوشەمىز. ول كەزدە كاسىپورىن تاۋلىگىنە 4,5 مىڭ توننا ءونىم شىعارا الادى, - دەيدى سامات نادىرباەۆ.
قازىر زاۋىتتا 260 ادام ەڭبەك ەتەدى, ءوندىرىس تولىق كۇشىنە ەنگەندە جۇمىسشى سانى 550 ادامعا دەيىن ارتادى. ال كاسىپورىننىڭ تۇراقتى جۇمىسىن قامتاماسىز ەتۋ ءۇشىن «جەتىسۋ» الەۋمەتتىك-كاسىپكەرلىك كورپوراتسياسى ارقىلى جالپى قۇنى 4,5 ملرد تەڭگە بولاتىن 280 دانا جانە 28 ءتۇرلى قۇرال- جابدىق جيىنتىعى مەن اۋىل شارۋاشىلىعى تەحنيكاسى ليزينگكە بەرىلىپتى.
- جالپى وڭىردە قانت قىزىلشاسىن جاڭعىرتۋ مەن دامىتۋ ماقساتىندا «جەتىسۋ» الەۋمەتتىك-كاسىپكەرلىك كورپوراتسياسى جاۋاپكەرشىلىك الىپ وتىر. ءبىزدىڭ قولداۋىمىزبەن قىزىلشا وسىرۋشىلەردى قولداۋ ءۇشىن 29 سەرۆيستىك-دايىنداۋ ورتالىعى قۇرىلعان بولاتىن. شارۋالارعا 603 دانا اۋىل شارۋاشىلىعى تەحنيكاسى جانە 60 مىڭ سۇرانىستى قامتىعان داقىل تۇقىمى بەرىلدى. سەرۆيستىك-دايىنداۋ ورتالىقتارىن قۇرۋ ناتيجەسىندە قانت قىزىلشاسىنىڭ جالپى كولەمى 2014-2018 جىل ارالىعىنددا 24 مىڭ توننادان 440 مىڭ تونناعا دەيىن كوبەيدى. ال ەگىستىك الاڭى بيىلعا دەيىن ساتىلاپ ءوسىپ, 1200 گەكتاردان 14 مىڭ گەكتارعا دەيىن ۇلعايدى, - دەيدى«جەتىسۋ» الەۋمەتتىك-كاسىپكەرلىك كورپوراتسياسى اگروونەركاسىپ كەشەنى دەپارتامەنتىنىڭ ديرەكتورى قۋانىش توعايباەۆ.
الماتى وبلىسى
