– ءبىلىم بەرۋ, دەنساۋلىق, الەۋمەتتىك سالا جانە كوپ قاباتتى ۇيلەردىڭ بارلىعى جىلىتۋ ماۋسىمىنا ساقاداي-ساي. وسىلاردىڭ بارلىعىنىڭ ازىرلىگىن پىسىقتاۋ ءۇشىن قازىر جىلۋ جۇيەسىندە گيدراۆليكالىق كۇزگى سىناقتار جۇرگىزىپ, تەكسەرىپ جاتىرمىز. وسىنداي جۇمىس بارىسىندا 32 قۇبىردان اقاۋ تابىلدى. ەڭ اۋقىمدى جۇمىس «سسكوب» اكتسيونەرلىك قوعامىنىڭ رۋدنىي جىلۋ-ەنەرگەتيكالىق ورتالىعىندا ءجۇردى. سوڭعى ءۇش جىلدا جىل سايىن وسى ورتالىقتىڭ جوندەۋ جۇمىستارىنا 5 ملرد تەڭگە جۇمسالادى, – دەيدى وبلىس اكىمىنىڭ ورىنباسارى عاۋەز نۇرمۇحامبەتوۆ.
بيۋدجەتتىك مەكەمەلەر مەن كاسىپورىندار ءۇشىن كومىردىڭ 90 پايىزى, ال تۇرعىندار ءۇشىن قاجەتتى وتىننىڭ 80 پايىزى جەتكىزىلدى. ال كەنشىلەر قالاسى مەن ءوندىرىستى جىلۋمەن, ەلەكتر ەنەرگياسىمەن قامتاماسىز ەتىپ وتىرعان سوكولوۆ-سارىباي كەن ءوندىرۋ بىرلەستىگىنىڭ رۋدنىي جىلۋ-ەلەكتر ورتالىعىنا كومىر جىل بويى تاسىلادى. وعان جىلىنا 931 مىڭ توننا كومىر جەتكىزىلەدى. قازىر قىس ماۋسىمىنا ارنالعان ءتيىستى كومىر قورى جاسالدى.
قالانى مازۋت ارقىلى جىلىتىپ وتىرعان ارقالىق قالاسى ءۇشىن قىس ماۋسىمى وتە قىمباتقا تۇسەدى. سەبەبى مازۋت قىمبات, ول ۋاقتىلى جەتكىزىلمەسە, 40 مىڭنان اسا حالقى بار قالانىڭ جاعدايى قاقاعان اياز بەن تۇتەگەن بوراندا قيىن بولاتىنى بەلگىلى. وبلىس اكىمدىگىنىڭ حابارلاۋىنشا بيىلعى قىستا مازۋت جەتكىلىكتى بولادى. ارقالىق جىلۋ ەنەرگەتيكالىق ورتالىعىندا قازىر 1,84 مىڭ توننا بىلتىردان ارتىلعان مازۋت بار. قاجەتتى 21,1 مىڭ توننا مازۋت ەنەرگەتيكا مينيسترلىگىنىڭ جاساعان كەستەسىنە سايكەس مۇناي جانە مۇناي ونىمدەرىمەن قامتاماسىز ەتەتىن وبلىستاردان قازان ايىنان كەلەر جىلدىڭ اقپانىنا دەيىن تاسىلادى. قالانى جىلىتۋدى الداعى جىلدارى كومىرگە اۋىستىرۋ ءۇشىن جۇرەتىن جۇمىستاردىڭ قۇجاتتارى دايىندالۋدا. ول ءۇشىن وبلىس بيۋدجەتىنەن 500 ميلليون تەڭگە ءبولىندى, جەتپەگەنى جەرگىلىكتى بيۋدجەتتەن قارالادى. نەگىزى ارقالىق جىلۋ-ەنەرگەتيكالىق ورتالىعىن مازۋتتان كومىرگە كوشىرۋ بىرنەشە جىلدان بەرى ايتىلىپ كەلەدى. قازىر جوبانىڭ سمەتالىق قۇجاتتارى دايىندالىپ, كوميسسيالىق قارالۋعا جىبەرىلدى. الداعى جىلى ول ىسكە اسادى دەگەن بولجام بار. سوندا شۇباركولدەن تاسىلاتىن كومىر ارقالىق جىلۋ-ەنەرگەتيكالىق ورتالىعى ءۇشىن ءارى ارزان جانە ءتيىمدى بولادى.
جىلۋ وبلىس قالالارىنا اۋا رايىنا قاراي قازاننىڭ باسىنان باستاپ ساتىلاپ بەرىلەدى.
قوستاناي
