ءتارتىپ ساقشىلارى بالا ەڭبەگىن پايدالانۋى مۇمكىن دەگەن مەكەمەلەردى ءسۇزىپ شىقتى. قازاقستان رەسپۋبليكاسىنىڭ ەڭبەك تۋرالى كودەكسىنە سايكەس, بالالارعا 14 جاستان باستاپ جۇمىس ىستەۋگە رۇقسات ەتىلەدى. تەك, ولاردىڭ جۇمىس ۋاقىتى اپتاسىنا 24 ساعاتتان اسپاۋعا ءتيىس. ال, 16 جاستان 18 جاسقا دەيىنگى جاسوسپىرىمدەردىڭ جۇمىس ۋاقىتى اپتاسىنا 36 ساعاتتان اسپاۋ كەرەك. سونداي-اق, كامەلەتكە تولماعاندارعا تۇنگى ۋاقىتتا جۇمىس ىستەۋگە, اۋىر, قاۋىپتى ەڭبەك جاعدايلارىنا بايلانىستى جۇمىستاردى ورىنداۋعا تىيىم سالىنادى.
وسى ماسەلەلەردى باقىلاۋدا ۇستاۋ, كامەلەتكە تولماعاندارعا قاتىستى ەلەۋلى قۇقىق بۇزۋشىلىقتار مەن قىلمىستاردىڭ جاسالۋىنا جول بەرمەۋ ءۇشىن پوليتسەيلەر بىرقاتار كولىك جۋ ورىندارىن, ءدامحانالاردى, ويىن-ساۋىق مەكەمەلەرىن تەكسەردى. «جۇمىسپەن قامتۋ» رەيدى بارىسىندا تۇنگى ۋاقىتتا ويىن-ساۋىق ورىندارىنا بارعان كامەلەتكە جاسى تولماعان جەتكىنشەكتەردىڭ اتا-انالارىنا زاڭ تالاپتارى ءتۇسىندىرىلدى. ماسەلەن, كومپيۋتەرلىك كلۋبتا 2002 جىلى تۋعان جاسوسپىرىمدەردىڭ وتىرعانى انىقتالىپ, ناتيجەسىندە وسى مەكەمەنىڭ يەسىنە اكىمشىلىك جازا تاعايىندالدى.
ۇستىمىزدەگى جىلدىڭ جەتى ايىندا كامەلەتكە تولماعاندارعا ىشىمدىك ىشكىزگەن 11 ادام اكىمشىلىك جاۋاپكەرشىلىككە تارتىلىپ, جيىرما ءبىر جاسقا دەيىنگى جاستارعا الكوگول ءونىمىن ساتقانى جايلى 28 حاتتاما تولتىرىلعان. جاسوسپىرىمدەردىڭ تۇنگى ۋاقىتتا ويىن-ساۋىق مەكەمەلەرىندە بولۋىنا جول بەرگەنى ءۇشىن 46 حاتتاما تولتىرىلىپ, بالالاردى قوعامعا جات ءىس-ارەكەتتەر جاساۋعا يتەرمەلەگەنى ءۇشىن قازاقستان رەسپۋبليكاسى قىلمىستىق كودەكسىنىڭ 133-بابى بويىنشا 85 ازاماتقا ايىپپۇل سالىندى.
