وسىلايشا رەسەيدەگى ەڭ ءىرى «روزا حۋتور» تاۋ كۋرورتى تاياۋ كۇندەرى قازاقستاننان كەلگەن مىڭىنشى ءتۋريستى قۇرمەتتەپ قارسى الدى. وسى ماۋسىمدا سوچيگە مىڭىنشى بولىپ بارعان الماتىلىق قايرات قىدىراليەۆكە سوچيلىكتەر قوناقجايلىق سىي كورسەتكەن.
ورايى كەلىپ تۇرعاندا, «روزا حۋتور» الەمدىك دارەجەدەگى جىل بويى جۇمىس ىستەيتىن تاۋ كۋرورتى ەكەندىگىن, 2014 جىلى سوچيدە وتكەن XXII وليمپيالىق جانە XI پاراليمپيادالىق قىسقى ويىندارىنىڭ ءىرى نىسانى بولعانىن ايتا كەتۋ كەرەك.
سول سياقتى الماتىنىڭ تاۋ تۋريزمىندەگى ءتاجى ىسپەتتى «شىمبۇلاق» تاۋ كۋرورتىنا دا 2011 جىلى قىسقى ازيا ويىندارىنا دايىندىق بارىسىندا كۋرورتقا ەكى رەت جاڭعىرتۋ جۇمىستارى جۇرگىزىلدى. جولدىڭ ۇزىندىعى 20 شاقىرىمنان استامعا دەيىن ۇزارتىلدى. ادام كوپ باراتىن جەرلەردە سىرعانايتىن اۋماق 10-20 ەسە كەڭەيتىلدى. سونداي-اق «ازيادا-2011» دايىندىق بارىسىندا «مەدەۋ» سپورت كەشەنىنەن «شىمبۇلاق» تاۋ شاڭعىسى بازاسىنا دەيىن, ۇزىندىعى 4,5 شاقىرىمدىق زاماناۋي ارقانجول سالىندى. كۋرورت اۋماعىندا 7 زاماناۋي كوتەرگىش جۇمىس ىستەيدى.
«روزا حۋتورعا» ءبىرىنشى رەت كەلگەن مىڭىنشى قازاقستاندىق «ماكروتەحينداستريز» سەرۆيستىك كومپانياسىندا جۇمىس ىستەيدى. ءوز قۇرمەتىنە جاسالعان مۇنداي مەرەكە ونىڭ ەسىندە تاماشا دەمالىستىڭ ءبىرى بولىپ قالاتىنى انىق.
قايرات قىدىراليەۆ «روزا حۋتورعا» «شىمبۇلاقتا» بىرگە دەمالاتىن دوستارىنىڭ ۇسىنىسىمەن كەلگەن ەكەن. «ولاردىڭ اقىل-كەڭەسىنە قۇلاق اسقانىما وكىنبەيمىن. جەتى كۇن بويى كاۆكاز تاۋلارىنىڭ سۇلۋلىعىن تاماشالادىم جانە قارا تەڭىز جاعالاۋىنداعى جاعاجاي دەمالىسىمەن راقاتتاندىم. ارينە اتاقتى سوچي-2014 وليمپيادالىق نىساندارىمەن تانىسۋ دا وتە قىزىقتى بولدى. بۇل جەر كورۋگە تۇرارلىق, سەرۆيسى دە جوعارى دەڭگەيدە!», دەيدى جەرلەسىمىز.
سونىمەن قازاقستان مەن رەسەي اراسىنداعى تۋريستىك اعىم سوڭعى جىلدارى بەلسەندى تۇردە ارتىپ كەلەدى. بۇعان بەلگىلى «شىمبۇلاق» پەن «روزا حۋتور» تاۋ كۋرورتتارى اراسىنداعى ىنتىماقتاستىق تۋرالى مەموراندۋم اجەپتەۋىر ىقپال ەتىپ وتىر.
2018 جىلعى قازاندا قول قويىلعان قۇجات كۋرورتتاردىڭ اكىمشىلىكتەرى تۋريزم مەن مادەني-ساۋىقتىرۋ دەمالىس سالاسىنداعى بىرلەسكەن جوبالاردى ىسكە اسىرۋ, كونفەرەنتسيالار, سەمينارلار مەن باسقا دا ءىس-شارالاردى وتكىزۋ ءۇشىن بارلىق قولجەتىمدى مەحانيزمدەردى پايدالاناتىن بولادى. بۇل رەتتە ءوزارا اقپاراتتىق, ءبىلىم بەرۋ, ادىستەمەلىك جانە كونسۋلتاتسيالىق قولداۋ كورسەتۋ جوسپارلانىپ وتىر. مۇنداي قىزمەتتىڭ ماڭىزدى تارماعى – ستاتيستيكالىق, انىقتامالىق جانە باسقا دا دەرەكتەر الماسۋ. بۇل كۋرورتتارعا كورشىلەس ەلدەردىڭ تاۋ شاڭعىسىن, تاۋ, سپورتتىق ءتۋريزمىن جاقسى تۇسىنۋگە كومەكتەسەدى, ال كەلەشەكتە قازاقستاندىق بەلسەندى دەمالۋشىلار اراسىندا «روزا حۋتوردىڭ», رەسەيلىكتەر اراسىندا «شىمبۇلاقتىڭ» تانىمالدىعىن ارتتىرادى.
«جۇيەلى اۋە قاتىناسىن ۇيىمداستىرۋدىڭ ارقاسىندا قازاقستان تۋريستەرى «روزا حۋتورعا» ءجيى كەلە باستادى. بۇل جەرگە ولاردى بەلسەندى جانە الۋان ءتۇرلى دەمالۋ مۇمكىندىگى تارتادى: تاۋعا جاياۋ شىعۋ باعدارلارى, رودەلبان ءتارىزدى تارتىمدى ويىن-ساۋىق, اسپالى كوپىر, بيىك تاۋداعى اتكەنشەك, ۆەلوسيپەد سەرۋەندەرى, قارا تەڭىزدەگى فيرمالىق جاعاجاي. بىزدە بالالاردىڭ ويىن-ساۋىعى دا جاقسى ۇيىمداستىرىلعانى ءمالىم, مەيرامحانالاردىڭ اۋقىمدى تاڭداۋى, مازمۇندى كونتسەرتتىك باعدارلاما دا بار. بىلتىر ءبىز قازاقستاننان كەلگەن مىڭنان اسا دەمالۋشىنى قارسى الدىق, قازىر ءالى شىلدە ايى, ال ءبىز مىڭىنشى ءتۋريستى قۇتتىقتاپ وتىرمىز!», دەدى «روزا حۋتور» كۋرورتى باس ديرەكتورىنىڭ ورىنباسارى سەرگەي حۆوروستيانىي.
وسى ىنتىماقتاستىقتىڭ ارقاسىندا بيىل «روزا حۋتوردا» «شىمبۇلاق» كۇندەرى ءوتتى. كۋرورتتىڭ باس الاڭىندا كيىز ءۇي تىگىلدى, قوناقتار قازاق تاعامدارىنىڭ ءدامىن تاتىپ, قازاق ۇلتتىق ونەرىمەن تانىستى. ولاردىڭ كوبى قازاقستانعا بارۋ مۇمكىندىگىنە قىزىعۋشىلىق تانىتتى. وعان قوسا, ەكى كۋرورتتىڭ دوستىعى شەڭبەرىندە «روزا حۋتورعا» قىسقى سىرعاناققا اپتالىق سكي-پاسس ساتىپ الىپ, ال سوسىن وسىنداي كەزەڭدە «شىمبۇلاقتا» تەگىن سىرعاناۋعا بولادى. مۇنداي ۇلگى كەرى تارتىپتە دە ارەكەت ەتەدى: ەگەر قازاقستاندىق كۋرورتتا اپتالىق سكي-پاسس ساتىپ الىنسا, رەسەيلىك كۋرورتتىڭ سكي-پاسى تەگىن.
«مۇنداي بىرلەسكەن ماركەتينگتىك باعدارلامالار مەن اكتسيالار كۋرورتتارىمىزدىڭ ناسيحاتتالۋىنا مۇمكىندىك جاسايتىندىعىنا سەنىمدىمىز. كۇزدە ءبىز «شىمبۇلاقتا» «روزا حۋتور كۇندەرىن» وتكىزۋدى جوسپارلاپ وتىرمىز جانە بۇل باعدارلامانىڭ قوناقتارىمىزدى قۋانتاتىنىنا, تاماشا ەستەلىكتەر سىيلايتىنىنا سەنىمدىمىن», دەيدى ءوز كەزەگىندە «شىمبۇلاق» تاۋ كۋرورتىنىڭ باس ديرەكتورى ەرجان ەركىنباەۆ.
الماتى
