كۇن تارتىبىندە ءبىرىنشى كەزەكتە جىلجىمالى قۇرامداعى اۆتوبۋس پاركىن جاڭارتۋ قارالعان. كۇن سايىن قالا تۇرعىندارى جۇمىس كۇندەرى 1 ,2 ميلليوننان استام رەت (دەمالىس كۇندەرى 800 مىڭ) قوعامدىق كولىكتەرگە وتىرادى ەكەن. ءبىرىنشى جارتىجىلدىقتا 180 ميلليوننان استام جولاۋشى تاسىمالدانعان. بۇل وتكەن جىلدىڭ وسى كەزەڭىمەن سالىستىرعاندا 20% -عا كوپ.
حالىققا قىزمەت كورسەتۋ ءۇشىن كۇن سايىن جول جەلىسىنە قوعامدىق كولىكتىڭ 1622 بىرلىگى شىعادى. اۆتوبۋس پاركى 80%-عا جاڭارعان. بيىلعى جىلى اۆتوبۋس پاركىن تولىقتاي جاڭارتۋ جوسپارلانعان.
قالا اكىمى ەڭبەك نارىعىنىڭ سۇرانىسىن ەسكەرە وتىرىپ, اۆتوپاركتەر ءۇشىن كادرلار دايارلاۋ جۇمىسىن جۇيەلى جانە تۇراقتى جۇرگىزۋگە ايرىقشا نازار اۋداردى. كوللەدجدەر بازالارى نەگىزىندە جۇرگىزۋشىلەر, سلەسارلار, مەحانيكتەر دايىنداۋ قاجەت. باستى ماقسات – سەرۆيس دەڭگەيىن كوتەرۋ.
كەڭەستە قالا سىرتىنا قاتىنايتىن جولاۋشىلار تاسىمالىن دامىتۋ, تروللەيبۋس جەلىلەرىن مودەرنيزاتسيالاۋ دا كەڭىنەن ءسوز بولدى. جىل اياعىنا دەيىن تيميريازەۆ كوشەسى بويىندا ۇزىندىعى 5,1 شاقىرىم بولاتىن سىم جەلىسى اۋىستىرىلادى. تروللەيبۋسقا قاتىستى بارلىق سىم جەلىلەرى مەن ترانسفورماتورلى قوسالقى ستانسالار جوندەلەدى, تروللەيبۋس پاركى جاڭارادى.
جيىن بارىسىندا جول مەن جولايرىقتارىن, باعدارشامدار نىساندارىن سالۋدىڭ بارىسى قارالدى.
«بۇل شارالاردىڭ باستى ماقساتى – قالالىقتارعا ساپالى كولىك قىزمەتىن كورسەتۋ جانە جولاۋشى تاسىمالىنىڭ قاۋىپسىزدىگىن قامتاماسىز ەتۋ», دەيدى قالا اكىمى.
الماتى
