ايتا كەتەرلىگى, كوككولدى كورگىسى كەلەتىن تۋريستەردىڭ سانى دا جىل ساناپ ارتىپ كەلەدى ەكەن. ءتىپتى جەرگىلىكتى تۇرعىندار مۇندا جول بولماسا دا جىل سايىن شەتەلدىك تۋريستەر كەلىپ, قۇپياعا تولى كولدى تاماشالايتىنىن ايتادى. الايدا, بۇگىندە بۇل جەردى تۋريستىك ورتالىققا اينالدىرۋ ماقساتىندا جۇمىستار دا اتقارىلۋدا.
جالپى, بۇل كول جەرگىلىكتى تۇرعىنداردىڭ اراسىندا «اۋليەكول» اتانىپ كەتكەن. سونىمەن قاتار جۇرت «اۋليەكول» اتايتىن ەرەكشە كولگە قاتىستى اڭىزدار دا كوپ. ماسەلەن, كەيبىر تۇرعىندار مۇندا ايداھار بار دەسە, ەندى ءبىرى اقىرعان بۋرانى كورگەندەرىن ايتادى. سونداي-اق ءبىر اڭىزدا بۇل جەردى جىلانباستى, مويىنى ۇزىن, ءبىر وركەشتى تۇيەگە ۇقسايتىن ماق ۇلىقتىڭ دا مەكەندەيتىنى ايتىلادى. سەبەبى كول بەتىمەن ۇشقان بارلىق قۇس, سۋ ىشۋگە كەلگەن مال اتاۋلى عايىپتان تايىپ, سۋعا تارتىلىپ كەتەدى ەكەن. الايدا, اتالعان كول وسى ۋاقىتقا دەيىن تولىق زەرتتەلمەي, جۇمباق كۇيىندە قالىپ كەلەدى. ال كوككولدى ەرەكشە دەيتىنىمىز, اۋەلى كولدىڭ اۋماعى جۇرەككە ۇقساس. سونداي-اق بۇل كولگە ەشقانداي دا اعىن سۋ كەلىپ قوسىلمايدى. ءوزى دە ەشقايدا سۋ جىبەرمەيدى. بىراق سۋدىڭ دەڭگەيى ءتورت ماۋسىمدا دا ءبىر قالىپتا تۇرا بەرەدى ەكەن. ولكەتانۋشى سەرىك قۇرالباەۆتىڭ ايتۋىنشا, ءتۇپسىز كولگە كەڭەستىك كەزەڭدە ءتۇرلى ەكسپەديتسيالار دا ۇيىمداستىرىلعانىمەن, ودان ەشقانداي ناتيجە شىقپاپتى. سودان وسى ۋاقىتقا دەيىن كولدىڭ تەرەڭدىگى دە انىقتالماعان.
قازاق دالاسىندا قۇپياعا تولى جەرلەر از ەمەس. ال كوككولدىڭ قۇپياسى ءالى كۇنگە دەيىن جەرگىلىكتى جۇرتشىلىقتىڭ تاڭدانىسىن تۋدىرىپ كەلەدى. ماسەلەن, كول ايدىنىندا ەشقانداي قوقىس نەمەسە جاپىراق جاتپايدى ەكەن. سۋ بەتىندەگى ۋلترادىرىلدەن سۋعا تۇسكەن كەز كەلگەن زات سىرتقا شىعىپ كەتەدى. قۇلاما جارتاستى وتكەلدەرى بار قۇپياعا تولى بۇل كولدىڭ زەرتتەلۋ تاريحى ەندى بولاشاقتىڭ ەنشىسىندە.
جامبىل وبلىسى
