قوعام • 26 شىلدە، 2019

اليمەنت تولەمەيتىندەردى قامايتىن ءۇي سالىنا ما؟

158 رەت كورسەتىلدى

قازىرگى قوعامدى وكشەلەپ كەلە جاتقان وزەكتى ماسەلەنىڭ ءبىرى – تۋعان بالاسىنان باس تارتىپ، الي­مەنت تولەۋدەن قاشۋ. اليمەنت تولەگىسى كەلمەي­تىن­دەردىڭ قاتارىندا كوكەك اكەلەر عانا ەمەس، بالا-شاعاسىن كۇيەۋىنە تاستاپ، گاككۋ قاعىپ كەتكەن ايەلدەر دە بار.

اليمەنت تولەگىسى كەلمەيتىندەردى تاۋبەگە كەلتىرىپ وتىراتىن ءتۇرلى شارالار بار. الايدا، ولاردىڭ كوبىنەن ءتۇرلى ايلا-شارعىمەن قۇتىلىپ كەتىپ جۇرگەندەر جەتكىلىكتى. سوندىقتان دا الماتىدا اليمەنت تولە­مەي­تىن­دەرگە ارنالعان «تۇرمە»، ياعني بالا-شاعاسىن باعۋدان قاشىپ جۇرگەندەردى ۇستايتىن ءۇي سالۋ ماسەلەسى كوتەرىلىپ ءجۇر.

الماتى قالالىق قوعامدىق كەڭەسىنىڭ سوڭ­عى وتى­رىسىندا كەڭەس مۇشەلەرى اليمەنت تولەمەيتىندەرگە ارنالعان ءۇي سالۋ ماسەلەسىن كوتەردى. ەندىگى جەردە بۇلارعا ارناۋلى تۇرمە سالىنباسا دا، سەيفۋللين داڭعىلىنداعى، بۇرىن جابىلىپ قالعان تەرگەۋ بارىسىنداعى ۋاقىتشا قاماۋ يزولياتورىندا اليمەنت تولەمەيتىندەر 40 تاۋلىك بويى قاماقتا بولۋى عاجاپ ەمەس.

سول سياقتى قالا اكىمىنىڭ ورىنباسارى ەرلان اۋ­كەنوۆ تە حالىقارالىق ستاندارتتارعا ساي كە­لەتىن قوناقۇيىن سالۋدى ۇسىنىپ وتىر. بىراق بۇل جوبانىڭ قۇنى 1،4 ميلليارد تەڭگەنى قۇرايدى.

«زاڭ جۇزىندە اليمەنت تولەۋدەن مۇلدە باسىن الا قاشقانداردى 40 تاۋلىككە دەيىن باس بوستاندىعىنان ايىرۋ ماسەلەسى قاراستىرىلىپ وتىر. ءبىر جىل بۇرىن پروكۋراتۋرانىڭ ۇسى­نى­سىمەن سەيفۋللين داڭعىلىندا جابىلىپ قالعان تەرگەۋ يزولياتورىن قالانىڭ كوممۋنالدىق مەن­شى­گىنە الۋ ماسەلەسى كۇن تارتىبىنە قويىلدى»،  دەيدى اكىمنىڭ ورىنباسارى.

ءوز كەزەگىندە بۇل ماسەلەدە قوعامدىق كەڭەس تۇركسىب اۋدانىندا بوس تۇرعان كامەلەتكە تولماعانداردى بەيىمدەۋ ورتالىعىن پايدالانۋدى ۇسىنىپ وتىر. بۇل عيماراتقا 10-15 ادام سىيادى. ءبىر كەزدە اتالعان ورتالىق وتباسىندا زورلىق-زومبىلىق كورگەن ايەلدەرگە ارنالىپ قايتا جابدىقتالعان-دى.

جەرگىلىكتى بيلىك قازىر اليمەنت تولەمەي­تىن­دەردى تاۋبەسىنە تۇسىرەتىن جەردى تابۋعا تىرىسىپ باعۋدا. قازىر تۇركسىب اۋدانىنداعى جوعارىداعى عيمارات تا قاماق ورنى رەتىندە قاراستىرىلىپ جاتىر. وعان دەيىن سەيفۋللين داڭعىلىنداعى، رەسپۋبليكا مەنشىگىندەگى ۋاقىتشا قاماۋ يزولياتورى اليمەنت تولەمەيتىندەردىڭ «تۇرمەسىنە» اينالادى.

سوڭعى جاڭالىقتار

اقجايناق استانا

ەلوردا • كەشە

ديماش پەن دجەكسون

ونەر • كەشە

ۇقساس جاڭالىقتار