وبلىستىق كاسىپكەرلەر پالاتاسىنىڭ ءبولىم مامانى ايگۇل ماقسوتوۆا «يندۋستريالىق سەرتيفيكاتى بار كاسىپكەرلەر مەملەكەتتىك ساتىپ الۋلارعا قاتىسادى, «سامۇرىق-قازىنا» حولدينگىنىڭ وتاندىق تاۋار وندىرۋشىلەر تىزىمىنە ەنەدى جانە سىرتقى نارىقتاردا وتاندىق تاۋار, جۇمىس, قىزمەت تۇرلەرىن ىلگەرىلەتۋ بويىنشا شىعىندارى وتەلەدى», دەيدى. «اتامەكەن» ۇكپ باسەكەگە قابىلەتتىلىكتى ارتتىرۋعا نەگىزدەلگەن بۇل جاڭالىقتى ءالى دە جەتىلدىرۋ باعىتىندا جۇمىس ىستەپ جاتىر. ماماننىڭ سوزىنە سۇيەنسەك, سەرتيفيكاتتى الۋ ءۇشىن الدىمەن سالالىق قاۋىمداستىق ۇسىنعان ساراپشى كاسىپورىننىڭ بارلىق قۇجاتتارىن قاراپ, وندىرىسكە كوشپەلى تالداۋ جۇرگىزەدى, قۇجاتتارداعى مالىمەتتەر مەن ناقتى احۋالدىڭ سايكەستىگىن سالىستىرادى. سودان كەيىن ساراپشىنىڭ قابىلداعان شەشىمى نەگىزىندە وڭىرلىك كاسىپكەرلەر پالاتاسى جەرگىلىكتى اتقارۋشى ورگانمەن بىرلەسە وتىرىپ, وندىرىستىك تەكسەرۋ جۇرگىزەدى. بارلىق تەكسەرۋ شارالارىنان وتكەن كاسىپورىن عانا تاۋار, جۇمىس, قىزمەت كورسەتۋ بويىنشا وتاندىق وندىرۋشىلەردىڭ تىزىمىنە ەنەدى. اتىراۋدا يندۋستريالىق سەرتيفيكاتتى العاشقىلاردىڭ قاتارىندا قازاق ساڭىراۋلار قوعامىنىڭ اتىراۋ وقۋ-وندىرىستىك كاسىپورنى مەن قازاق سوقىرلار قوعامىنىڭ وڭىردەگى وقۋ-وندىرىستىك كاسىپورنى الدى.
كورۋ قابىلەتى ناشار جانداردى جۇمىسقا ورنالاستىرۋ باعىتىنداعى مەكەمەدە قازىر 35 ادام ەڭبەك ەتەدى. كورپە-توسەك جابدىقتارى, ماتراتس, مۇراعاتقا ارنالعان قوراپتار دايىندايتىن, جيھاز شىعاراتىن تسەحتارى بار. كاسىپورىن باسشىسى ءسابيت قاتىشەۆ «يندۋستريالىق سەرتيفيكات – جالعان كاسىپكەرلىكتىڭ تاۋەكەلىن ازايتىپ, وندىرۋشىلەرگە باسەكەگە قابىلەتتى ورتادا جۇمىس ىستەۋگە مۇمكىندىك بەرەدى», دەيدى. اتىراۋ وبلىسىندا ازىرگە 4 كاسىپورىن عانا جاڭا قۇجاتقا قول جەتكىزدى.
اتىراۋ
