ەگەمەن ەلىمىزدى ودان ءارى ءوركەندەتۋ مەن حالىقتىڭ تۇرمىس دەڭگەيىن جاقسارتۋ, قوعامنىڭ دامۋىنا كەدەرگى كەلتىرىپ وتىرعان كەسەل – سىبايلاس جەمقورلىقتى جويۋ, كوكەيكەستى الەۋمەتتىك-ەكونوميكالىق جانە ەڭبەك قاتىناستارىنا بايلانىستى ماسەلەلەردى شەشۋ باعىتىنداعى يگى ىستەر مەن ماڭىزدى مىندەتتەردەن كاسىپوداق تا تىسقارى قالمايدى. ەكى ميلليوننان استام مۇشەسى بار قوعامدىق ۇيىم ەلىمىزدى جاڭعىرتۋ باعىتىنداعى اۋقىمدى جۇمىستاردىڭ بەل ورتاسىندا بولاتىنى ءسوزسىز.
كاسىپوداق – ازاماتتىق قوعامنىڭ نەگىزگى تىرەگىنىڭ ءبىرى. سوندىقتان ءبىز تاياۋ ۋاقىتتا اتقارىلاتىن اۋقىمدى جۇمىستاردىڭ ويداعىداي جۇزەگە اسۋى جولىندا كۇش-جىگەرىمىزدى سارقا جۇمساۋعا ءتيىستىمىز. كاسىپوداق جۇمىسشىلاردىڭ ءمۇددەسى مەن قۇقىن قورعايتىن ۇيىم بولعاندىقتان, جەرگىلىكتى جەردەگى ەڭبەك ۇجىمدارىمەن تىكەلەي جانە تىعىز بايلانىستا, ديالوگ تۇرىندە جۇمىس ىستەۋدى جالعاستىرا بەرەمىز.
مەملەكەت باسشىسى قاسىم-جومارت توقاەۆ ۇكىمەتتىڭ كەڭەيتىلگەن ءماجىلىسىندە دە وسى ءماسەلەنى – بيلىك پەن قوعام اراسىنداعى ديالوگتى دامىتۋ قاجەتتىگىن باسا ايتتى. جاڭادان قۇرىلعان كوميسسيانىڭ دا باستى ماقساتى وسى. بيلىك تارماقتارى ەلمەن ەتەنە بايلانىستا بولۋى ءتيىس. سوندا عانا حالىقتىڭ جاعدايى مەن تۇرمىس-تىرشىلىگىن, الەۋمەتتىك ماسەلەلەرىن جان-جاقتى بىلۋگە ءمۇمكىندىك بولادى. ەشتەڭەنى جاسىرىپ-جابۋدىڭ قاجەتى جوق. اشىقتىق قاجەت. شىندىق بار جەردە سەنىم بار. حالىق وزدەرى كوتەرگەن ماسەلەلەردى بيلىكتىڭ ەسكەرۋسىز قالدىرمايتىنىنا ءشۇباسىز سەنىمدە بولۋى كەرەك.
الەۋمەتتىك-ەڭبەك قاتىناستارىنا بايلانىستى ماسەلەلەردى وڭتايلى شەشۋدىڭ بىردەن-ءبىر جولى – الەۋمەتتىك ارىپتەستىك. وعان كەيىنگى جىلدارى ناقتى كوز جەتتى. بۇل – جۇمىس بەرۋشىلەر, جۇمىسشىلار مەن مەملەكەتتىك ورگاندار اراسىنداعى ەڭبەك جانە الەۋمەتتىك-ەكونوميكالىق قاتىناستاردى رەتتەۋ ماسەلەلەرى بويىنشا ءمۇددەلەردى كەلىستىرۋدى قامتاماسىز ەتۋگە باعىتتالعان ءوزارا ءتيىمدى قارىم-قاتىناس جۇيەسى. وسىنداي ۇشجاقتى كوميسسيا رەسپۋبليكالىق, سالالىق جانە اۋماقتىق دەڭگەيدە بار. رەسپۋبليكالىق ۇشجاقتى كوميسسيانىڭ قۇرامىنا قازاقستان رەسپۋبليكاسىنىڭ ۇكىمەتى, كاسىپوداقتار فەدەراتسياسى جانە «اتامەكەن» ۇلتتىق كاسىپكەرلەر پالاتاسى ەنگەن. ال سالالىق ۇشجاقتى كوميسسيانىڭ قۇرامىندا ءتيىستى مينيسترلىك, سالالىق كاسىپوداق, ۇلتتىق كاسىپكەرلەر پالاتاسى بار. ال اۋماقتىق كوميسسيا اكىمدىك, اۋماقتىق كاسىپوداق, جەرگىلىكتى كاسىپكەرلەر پالاتاسى اراسىنداعى الەۋمەتتىك ءارىپتەستىكتى قالىپتاستىرىپ وتىر. سوندىقتان وسى باعىتتاعى جۇمىستاردى ودان ءارى جانداندىرۋ – ءبىزدىڭ باستى ماقساتىمىز.
باقىتجان ءابدىرايىم,
قازاقستان رەسپۋبليكاسى كاسىپوداقتار فەدەراتسياسىنىڭ توراعاسى
