كورمە ماقساتى – كوپشىلىك اراسىندا شىمكەنت قالاسىنىڭ ىشكى ءتۋريزمدى دامىتۋداعى الەۋەتىن جان-جاقتى كورسەتە وتىرىپ, قالادا الداعى ۋاقىتتا قولعا الىنعالى وتىرعان جوبالاردى فوتوسۋرەت تىلىمەن جەتكىزۋ.
حالىقارالىق ەكسپەديتسيا قۇرامىندا قازاقستاندىق ارحەولوگ, گەوگرافتار مەن جۋرناليستەردەن بولەك, تايلاند ەلىنەن ارنايى شاقىرتىلعان 2 فوتوگراف پەن ءار سالادا ماشىقتانعان قازاقستاندىق فوتوسۋرەت ونەرىنىڭ ماماندارى دا بولدى.
«National Geographic Qazaqstan» جۋرنالىنىڭ 13 قىزمەتكەرىنەن قۇرالعان توپ مۇشەلەرى مامىردىڭ 20-سى مەن ماۋسىمنىڭ 2-ءسى ارالىعىندا شىمكەنت قالاسى مەن قالا ماڭىنداعى قىرىققا جۋىق تاريحي-مادەني ورىن مەن كيەلى جەردى ارالاپ شىعىپ, 1,5 مىڭ شاقىرىمدىق جولدى ءجۇرىپ ءوتتى. ولار قالانىڭ ەسكى بولىگىندەگى كونە عيماراتتار مەن اقمەشىت ۇڭگىرى, سايرام كەسەنەلەر شوعىرى مەن قاسقاسۋ شاتقالى سەكىلدى تابيعاتى اسەم جەرلەردىڭ تاڭعاجايىپ كورىنىستەرىن تاسپاعا ءتۇسىرىپ وتىردى.
– شىمكەنت قالاسى قاشاندا كەز كەلگەن سالادا باستاماشى, ەلىمىزدەگى وڭ وزگەرىستەردىڭ قوزعاۋشىسى بولىپ كەلگەنىن ەشكىم جوققا شىعارا قويماس. بۇگىنگى كورمە سوعان دالەل. بولاشاقتا بۇل قالادا ۇلكەن سەرپىلىس بولاتىنىنا سەنىم ارتامىن, – دەدى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى وردەنبەك مازباەۆ.
