«2017 جىلى ەلىمىزدە مەديتسينالىق كومەككە جان باسىنا شاققاندا 91 مىڭ تەڭگە نەمەسە 280 اقش دوللارى جۇمسالعان. البەتتە, 2013 جىلمەن سالىستىرعاندا بۇل كورسەتكىشتەن 35 مىڭ تەڭگەگە كوپ. الايدا, ەكونوميكالىق ىنتىماقتاستىق جانە دامۋ ۇيىمى ەلدەرىندە بۇل كورسەتكىش 3000 دوللاردان اسىپ-جىعىلادى», - دەدى قور توراعاسى.
ايتۋىنشا, قارجى تاپشىلىعىنا – تەحنولوگيا باعاسىنىڭ قىمباتتاۋى, ادامداردىڭ ءومىر جاسىنىڭ ۇزارۋى جانە مەديتسينالىق قىزمەتتەردى تۇتىنۋ كولەمىنىڭ, مەدقىزمەتتى ءجيى پايدالاناتىن – بالالار مەن قارت كىسىلەر سانىنىڭ ارتۋى, سونداي-اق, جۇقپالى ەمەس سوزىلمالى اۋرۋلاردىڭ كوبەيۋى سەبەپ.
2020-2022 جىلدارعا ارنالعان بيۋدجەت جوباسىندا 2020 جىلى مەديتسينالىق كومەككە جۇمسالاتىن قارجى 1 ترلن 620 ملرد تەڭگە دەپ بەلگىلەنگەن. بۇل بيىلعى شىعىنداردان 67 پروتسەنت كوپ. اتالعان قارجىنىڭ 967,7 ملرد. تەڭگەسى تەگىن مەديتسينالىق كومەككە, 652,8 ملرد تەڭگەسى – ساقتاندىرۋ پاكەتى بويىنشا كورسەتىلەتىن قىزمەتتەرگە جۇمسالادى.
«بىراق بۇل مىندەتتى مەديتسينالىق ساقتاندىرۋ ەنگىزىلگەننەن كەيىن سالاداعى قارجى تاپشىلىعى ماسەلەسى بىردەن شەشىمىن تابادى دەگەن ءسوز ەمەس. شىن مانىندە, ساقتاندىرۋ حالىقتىڭ قالتاسىنان شىعاتىن شىعىنداردى قىسقارتۋعا ەمەس, ونىڭ ءوسۋ قارقىنىن تومەندەتۋگە مۇمكىندىك بەرەدى. ولاي دەيتىن سەبەبىمىز, حالىق سانى الداعى ۋاقىتتا دا ارتادى, سونىڭ ىشىندە مەديتسينالىق قىزمەتتەردى كوپ پايدالاناتىن بالالار ۇلەسى 2,4%, قارتتار ۇلەسى 4% كوبەيەدى. وعان ۇنەمى قىمباتتاپ وتىراتىن تەحنولوگيالاردىڭ باعاسىن قوسىڭىز. سونىمەن قاتار, مەديتسينا توقتاۋسىز دامىعاندىقتان الداعى ۋاقىتتا مەديتسينالىق ساقتاندىرۋ/كەپىلدەندىرىلگەن تەگىن مەديتسينالىق كومەك پاكەتتەرىنە ەنبەگەن قىزمەت تۇرلەرى پايدا بولادى. وسىنىڭ ءبارى جۇرتشىلىقتىڭ دەنساۋلىق ساقتاۋعا جۇمسايتىن جەكە شىعىندارىنىڭ وسۋىنە ىقپال ەتەرى ءسوزسىز», - دەدى ا.جۇماعۇلوۆ.
سونىمەن قاتار, پرەزيدەنتتىڭ دەنساۋلىق ساقتاۋ سالاسىنا بولىنەتىن قارجىنى ءىجو-ءنىڭ 5 پروتسەنتىنە جەتكىزۋ تۋرالى تاپسىرماسى تاپشىلىقتى ەداۋىر ازايتۋعا سەپتىگىن تيگىزەرى انىق, دەپ قورىتتى مسق باسشىسى.
