ءبىر قوراپ تەمەكى كەلەسى جىلى 93 پايىزعا قىمباتتايدى
جۇما, 31 مامىر 2013 2:29
ەرەسەك قازاقستاندىقتاردىڭ 26,5 پايىزى قازىر تەمەكىگە تاۋەلدى بولىپ وتىر. بۇدان بولەك, جۇرتتىڭ 62,2 پايىزى وقتا-تەكتە بولسا دا اۋزىنا تەمەكى سالادى. ال كۇن سايىن شىلىم شەگەتىندەردىڭ شاماسى 20,3 پايىزدى قۇرايدى. سونىمەن بىرگە, شەگۋشىلەردىڭ 25,9 پايىزى تەمەكىنى قويا الماي ءجۇر. بۇل تۋرالى الماتى قالالىق سالاماتتى ءومىر سالتىن قالىپتاستىرۋ ورتالىعىنىڭ ديرەكتورى گۇلسارا سۇلەيمەنوۆانىڭ دەرەگىنە سىلتەمە جاساعان BNews.kz حابارلادى.
جۇما, 31 مامىر 2013 2:29
ەرەسەك قازاقستاندىقتاردىڭ 26,5 پايىزى قازىر تەمەكىگە تاۋەلدى بولىپ وتىر. بۇدان بولەك, جۇرتتىڭ 62,2 پايىزى وقتا-تەكتە بولسا دا اۋزىنا تەمەكى سالادى. ال كۇن سايىن شىلىم شەگەتىندەردىڭ شاماسى 20,3 پايىزدى قۇرايدى. سونىمەن بىرگە, شەگۋشىلەردىڭ 25,9 پايىزى تەمەكىنى قويا الماي ءجۇر. بۇل تۋرالى الماتى قالالىق سالاماتتى ءومىر سالتىن قالىپتاستىرۋ ورتالىعىنىڭ ديرەكتورى گۇلسارا سۇلەيمەنوۆانىڭ دەرەگىنە سىلتەمە جاساعان BNews.kz حابارلادى.
بۇگىنگى تاڭدا تەمەكىنىڭ زاردابىنان الەمدە كۇن سايىن ورتا ەسەپپەن 14 ادام قايتىس بولادى. بۇكىلالەمدىك دەنساۋلىق ساقتاۋ ۇيىمىنىڭ دەرەگى وسىنداي. دارىگەرلەر تەمەكىنى ءححى عاسىردىڭ باستى پروبلەمالارىنىڭ ءبىرى ساناپ وتىر.
سوڭعى جارتى جىلدىڭ كولەمىندە رەسپۋبليكادا تەمەكىمەن كۇرەستى كۇشەيتۋ ماقساتىندا ونىڭ اكتسيزدەرى باعاسىن كەزەڭ-كەزەڭىمەن كوتەرۋ شاراسى جۇرگىزىلۋدە. وسى تارتىپپەن كەلەسى جىلى ءبىر قوراپ تەمەكىنىڭ باعاسى ەكى ەسەگە دەيىن ءوسۋى مۇمكىن. اتاپ ايتقاندا, 2014 جىلى ونىڭ قۇنىن 93 پايىزعا كوتەرۋ مەجەلەنىپ وتىر.
قازاقستاندا دەنساۋلىق ساقتاۋ سالاسى بويىنشا زاڭنامالاردى جاقسارتۋدا ايتارلىقتاي ىلگەرى جىلجۋشىلىقتار بولعانىمەن, تەمەكىنىڭ باعاسىن كوتەرۋ ءجونىندە شەشىلمەگەن وزەكتى ماسەلەلەر ءالى دە بار.
«ءبىزدىڭ ەلىمىزدە تەمەكىنىڭ باعاسى ورتا ەسەپپەن 66 تسەنتتى قۇرايدى. بۇل – الەم بويىنشا ورتا باعادان ەداۋىر تومەن. ءبىز مۇنداي باعانىڭ تۇرعىنداردىڭ باسىم بولىگى ءۇشىن, اسىرەسە, جاستارعا قولجەتىمدى ەكەنىن جاقسى تۇسىنەمىز», دەيدى سالاماتتى ءومىر سالتىن قالىپتاستىرۋ پروبلەمالارى جونىندەگى ۇلتتىق ورتالىقتىڭ ديرەكتورى ءجاميلا باتتاقوۆا.
ونىڭ سوزىنە قاراعاندا, ۇكىمەت مينيسترلىك وكىلدەرىنىڭ قاتىسۋىمەن وتىرىس وتكىزىپ, وندا تەمەكى ونىمدەرىنىڭ باعاسىن بىرتىندەپ كوتەرۋ ماسەلەسى تالقىلانعان كورىنەدى. شەنەۋنىكتەردىڭ ويىنشا, 2020 جىلعا قاراي قازاقستاندا تەمەكى شەگۋشىلەردىڭ سانى ايتارلىقتاي ازايۋعا ءتيىس.
«تەمەكى قورابىنىڭ سىرتىنا ونىڭ زياندىلىعىن اتاپ كورسەتەتىن گرافيكالىق بەينەلەر ەنگىزۋ جونىندەگى ۇكىمەت قاۋلىسى 2011 جىلى قابىلداندى. وسىعان وراي نيكوتين ونىمدەرىن وندىرۋشىلەرگە ءوز ءوندىرىستەرىن قايتا قۇرۋعا 18 اي مەرزىم بەرىلدى. ءسويتىپ, قورقىنىشتى سۋرەتتەر بەينەلەنگەن ونىمدەر الداعى شىلدە ايىنان باستاپ ساۋدا سورەلەرىنە شىعارىلۋعا ءتيىس بولاتىن. دەگەنمەن, كوپتەگەن تەمەكى كومپانيالارى بۇعان قاتىستى وندىرىستەرىن ءساۋىر ايىنان باستاپ كەتتى», دەپ مالىمدەدى الماتىدا بۇكىلالەمدىك تەمەكى تارتپاۋ كۇنىنە ارنالعان ءباسپاسوز ءماسليحاتىندا ج.باتتاقوۆا.
ونىڭ ايتۋى بويىنشا, مۇنداي تەمەكى ونىمدەرى يمپورت پەن ەكسپورتقا شىعارىلاتىن تاۋارلاردىڭ بارلىعىندا دا قولدانىلادى. سونىڭ ىشىندە ادامعا بارىنشا قاتتى اسەر ەتەتىندەرى رەتىندە تايلاند پەن برازيليادا قولدانىلعان 12 قورقىنىشتى سۋرەت تاڭداپ الىندى.
قازىرگى تاڭدا ەلىمىزدەگى تەمەكى شەگۋمەن كۇرەستە ءتۇرلى ايىپپۇلدار سالۋ ءجۇيەسى جۇزەگە اسىرىلۋدا. الماتى قالاسىندا ۇستىمىزدەگى جىلدىڭ العاشقى 4 ايىندا 1301 كامەلەتكە تولماعان جاس قوعامدىق ورىنداردا تەمەكى شەككەندەرى ءۇشىن اكىمشىلىك جاۋاپكەرشىلىككە تارتىلدى. الماتى قالاسى اكىمشىلىك پوليتسياسى باسقارما باستىعىنىڭ ورىنباسارى بىرلىك مولداباەۆتىڭ ايتۋى بويىنشا, قالاداعى ساۋدا نۇكتەلەرىنە جاسالعان رەيدتەردىڭ بارىسىندا 44 ءتارتىپ بۇزۋشىلىق فاكتىسى انىقتالدى.
«رەيد بارىسىندا سونداي-اق ويىن-ساۋىق مەكەمەسىنىڭ ديرەكتورى اكىمشىلىك جازاعا تارتىلدى. سونىمەن قاتار, جاستارى كامەلەتكە تولماعانداردى تۇنگى مەزگىلدە ويىن-ساۋىق ورىندارىنا جىبەرگەن 20 ادامعا قاتىستى ارنايى شارالار قولدانىلدى», دەپ تۇيىندەدى ءسوزىن ب.مولداباەۆ.
مۇرات ايتقوجا.
