تۋيتتەر-ساياسات جانە جاڭا مالىمدەمە. ترامپ 21 ناۋرىز كۇنى ءوزىنىڭ تۋيتتەردەگى پاراقشاسىندا «52 جىل وتكەن سوڭ گولان مەكەنىن يزرايل مەنشىگى دەپ مويىندايتىن كەز كەلدى» دەگەن جازباسىن قالدىردى. ال كەيىنىرەك امەريكا باسشىسى ءوزىنىڭ بۇل قادامىن يزرايل مەملەكەتىنىڭ قاۋىپسىزدىگىن قامتاماسىز ەتۋ ءۇشىن جاساعانىن ايتىپ, اقتالدى. جالپى, ترامپتىڭ تۋيت-جازبالارى كەيىن اقش-تىڭ ساياساتىنا اينالارىنا بىرنەشە رەت كوز جەتتى. بۇل جولى دا سولاي بولدى. ءارينە جەرىنەن ايىرىلىپ وتىرعان سيريا قاراپ وتىرعىسى كەلمەيدى. سيريانىڭ بۇۇ-داعى ەلشىسى باشار دجافاري: «ءبىز بىرنەشە كۇن بۇرىن قورعانىس مينيسترىمەن كەزدەسۋ وتكىزىپ, گولاندى بارلىق مۇمكىندىكتى قولدانىپ قايتارۋعا ءتيىسپىز دەگەن ۇيعارىمعا كەلدىك. سولاردىڭ قاتارىندا زاڭدى, اسكەري تاسىلدەر دە بار. قارۋعا باسقا امال قالماعاندا جۇگىنۋگە ءماجبۇر بولامىز. گولان جوتالارى 1967 جىلى وككۋپاتسيالاندى. ترامپ پەن ونىڭ اكىمشىلىگىنىڭ ساناسى وزگەرگەنىن كۇتىپ وتىرا المايمىز», – دەپ مالىمدەدى.
جاقىندا اياقتالعان ازاماتتىق سوعىستان السىرەپ, ەكونوميكاسى قۇلدىراعان سيريا ەلشىسى باشار دجافاري ايتقانداي جەرىن قايتارۋ ءۇشىن يزرايلمەن اشىق سوعىسقا بارۋى مۇمكىن بە؟ مەنىڭشە, ەكىتالاي. قۋاتى جاعىنان الەمدە 16-ورىن الاتىن يزرايل ارمياسىنا سيريا اسكەرى قارسى تۇرا الماسى انىق. وعان قوسا, 52 جىل بويى گولان جوتاسى ءۇشىن اشىلماعان سوعىستىڭ ەندى جاقىن ارالىقتا باستالۋىنا سەنۋ قيىن.
الەم نە دەدى؟ الايدا اقش-تىڭ يزرايل يەلىگىن مويىنداعانى وزگە ەلدەر دە وسى پوزيتسيادا دەگەن ءسوز ەمەس. كەرىسىنشە. ەڭ الدىمەن, بۇۇ گولان جوتالارى سيريا جەرى دەگەن ۇستانىمىنان اينىمادى. كەيىن ەۋرووداق تا ءيزرايلدىڭ يەلىگىن مويىندامايتىنىن مالىمدەدى. رەسەي و باستان قارسى. وعان قوسا, ماسكەۋ سوڭعى 3 جىلدا سيريا ءۇشىن سوعىسقانىن ەسكە الساق, وندا رەسەي بۇل ماسەلەدە ۇنەمى يزرايلگە قارسى بولارى بەلگىلى. ءتىپتى اقش-تىڭ جاقىن وداقتاستارى ساۋد ارابياسى مەن كۋۆەيت تە دونالد ترامپتىڭ بۇل قادامىن سىنادى. قىسقاسى, يزرايل تاراپىندا تەك قانا امەريكا, سيريا جاعىندا قالعان الەم.
ترامپ نەگە مويىندادى؟ ەندى دونالد ترامپ گولان جوتالارىن نەگە مويىندادى جانە سايكەس بۇيرىققا نەگە قازىر قول قويدى دەگەن ساۋالعا كەلسەك. بىرىنشىدەن, ترامپ بيلىككە كەلگەلى بەرى يزرايلدى جاقتاپ كەلەدى. وسى مەملەكەت ءۇشىن يرانمەن جاسالعان يادرولىق كەلىسىمدى بۇزدى, يۋنەسكو قۇرامىنان شىقتى جانە بۇۇ-نىڭ ادام قۇقىعى جونىندەگى كەڭەستەن شىقتى جانە اقش ەلشىلىگىن تەل-اۆيۆتەن يەرۋساليمگە كوشىردى. وسى ارقىلى يەرۋساليم قالاسى يزرايلدىكى دەپ تاعى مويىندادى. ال بۇل شەشىم پالەستيندىكتەردىڭ اشۋ-ىزاسىن تۋعىزىپ, سوڭى قارسىلىققا ۇلاسىپ, 60 ادام كوز جۇمدى, 2700-ءى جارالاندى.
ال گولان جوتالارىن قازىر مويىنداۋىنىڭ ءبىر سەبەبى ءيزرايلدىڭ پرەمەر-ءمينيسترى بينيامين نەتانياحۋعا پارلامەنت سايلاۋى الدىندا قولداۋ كورسەتۋ. ويتكەنى بۇل ەلدە پارلامەنتى كنەسسەتكە سايلاۋ 9 ءساۋىرگە جوسپارلانعان. از ۋاقىت قالدى. قازىرگى بولجام بويىنشا نەتانياحۋ پارتياسى ەكىنشى ورىن الۋى مۇمكىن. وعان قوسا, اقپان ايىندا بۇل ەلدىڭ باس پروكۋرورى پرەمەر نەتانياحۋعا جەمقورلىق جانە الاياقتىق باپتارى بويىنشا ايىپ تاعىلۋى مۇمكىن ەكەنىن مالىمدەدى. ياعني بۇل جاڭالىقتار سايلاۋ الدىندا ونىڭ ەلەكتورات اراسىنداعى ابىرويىن كۇرت ءتۇسىرىپ جىبەرۋى مۇمكىن. سايكەسىنشە, نەتانياحۋ بيلىكتەن كەتۋى عاجاپ ەمەس. مىنە, وسى قاتەرلەردى ەسكەرە وتىرىپ, دونالد ترامپ ونىڭ ابىرويىن كوتەرىپ, قولداۋ ءۇشىن گولان جوتالارىن ءدال سايلاۋ الدىندا يزرايل جەرى دەپ مويىندادى. وعان قوسا, ترامپ پەن بينيامين نەتانياحۋدىڭ ساياسي كوزقاراستارى كوپ جاعدايدا سايكەس كەلەدى. ماسەلەن, ەكەۋى دە يرانمەن جاسالعان يادرولىق كەلىسىم قاۋىپتى دەپ ەسەپتەيدى. الايدا بۇل كەلىسىمدى قولدايتىن ءارى قازىرگى پرەمەرگە قارسى شىعاتىن ءيزرايلدىڭ وزىندە باسقا ساياساتكەرلەر از ەمەس.
حالىقارالىق قۇقىق قايدا قالدى؟ سونىمەن اقش-تىڭ گولان جوتالارى يزرايل مەنشىگى دەپ جاريالاۋى نەنى كورسەتتى؟ بىرىنشىدەن, كەز كەلگەن ەلدە ساياسي باسشىلىقتىڭ اۋىسۋى بۇل مەملەكەتتىڭ ساياساتىن ءوزگەرتىپ جىبەرۋى مۇمكىن ەكەن. ماسەلەن, ترامقا دەيىن باراك وباما يزرايلگە سونشالىق قولداۋ بىلدىرمەدى, قايتا پالەستينانىڭ مەملەكەت بولىپ قۇرىلۋىن قولدادى جانە يرانمەن يادرولىق كەلىسىم جاساۋعا مۇددەلى ەدى. ەكىنشىدەن, حالىقارالىق قۇقىق كەيدە اقيقات جاقتا ەمەس, بىلەكتىنىڭ جاعىندا بولۋى مۇمكىن ەكەن. ماسەلەن, اقش رەسەيدىڭ قىرىمدى باسىپ العانىن سىناپ, سانكتسيا جاريالاپ كەلەدى. ال بىراق ءوزى يزرايلدىڭ سيريادان جاۋلاپ العان جەرىن مويىندادى. سونداي-اق رەسەي دە ۋكراينادان قىرىمدى وككۋپاتسيالاپ, ونى ءوز جەرى دەپ جاريالادى, بىراق ءيزرايلدىڭ گولان جوتالارىن يەمدەنۋىنە قارسى. جالپى, الەمدىك ساياساتتا حالىقارالىق قۇقىقتىڭ ەمەس, قۋاتتى ارميانىڭ ءسوزى جۇرەتىن مۇنداي جاعدايلار جەتەرلىك.
