سەرگەي قالمىكوۆ سامارقان قالاسىنىڭ تۋماسى. ماسكەۋدە جانە سانكت-پەتەربۋرگتە وقىپ, ءومىرىنىڭ كوپ بولىگىن ورىنبور مەن الماتىدا وتكىزگەن. الاتاۋ باۋرايىندا وتكەرگەن شابىتقا تولى جالىندى جىلدارى ونىڭ شىعارماشىلىعىن بيىككە كوتەردى. قازاق دالاسىنىڭ سۇلۋلىعى, الماتىنىڭ ارايلى كەشتەرى سۋرەتشىنىڭ دارىنىنا قانات ءبىتىردى. قىلقالام شەبەرى اسپانمەن تالاسقان بيىك تاۋلارى, جىلى شىرايلى ادامدارى مەن وزىندىك قايتالانباس اتموسفەراسى بار الماتىنى ۇنەمى قايتىپ ورالا بەرگىسى كەلەتىن «جۇلدىزدى توستاعانعا» بالاپتى. قازاق دالاسىنىڭ تۇمسا تابيعاتى ونىڭ شىعارماشىلىعىندا دارا مانگە يە.
كورمەنىڭ اشىلۋ راسىمىنە قاتىسقان ەلىمىزدىڭ سانكت-پەتەربۋرگتەگى باس كونسۋلى بولات يمانباەۆ, رەسەي جەرىندە قازاق كورمەلەرىن وتكىزۋ يگى داستۇرگە اينالعاندىعىن اتاپ ءوتتى. «قازاقستان قازاق ونەرىن الەمدە ءىلگەرىلەتۋ بويىنشا «رۋحاني جاڭعىرۋ» باعدارلاماسىن بەلسەندى تۇردە جۇزەگە اسىرۋدا. «سەرگەي كالمىكوۆتىڭ جۇلدىزدى توستاعانى» كورمەسى وسى باعدارلامانىڭ قيسىندى جالعاسى. قاستەەۆ مۋزەيىنىڭ كورمەسى ءىرى ءمادەني مۇرالاردىڭ التىن وشاعى دەپ ايتا الامىز. جىل سايىن ەكى مەملەكەت اراسىنداعى مادەني قاتىناستار قارقىندى جانە ءار قيلى دامۋ ۇستىندە. مۇندا ءمادەنيەت سالاسىنداعى كوپتەگەن ءىس-شارالار, جاستارعا ارنالعان باعدارلامالار, بيزنەس-فورۋمدار ءوتىپ تۇرادى. قازاقستان مەن رەسەي – مادەنيەت پەن ءبىلىم بەرۋ سالاسىندا كوپتەگەن جوبالاردى جۇزەگە اسىرىپ كەلە جاتقان جاقسى كورشىلەر», – دەيدى كونسۋل.
كالمىكوۆتىڭ كوللەكتسياسى ەلىمىزدىڭ بەينەلەۋ ونەرى تاريحىندا ايرىقشا ورىن الادى. كورمەگە قويىلعان ءار شىعارمانىڭ وزىنە ءتان تاريحى بار. رەسەيلىك كورەرمەننىڭ نازارىنا ۇسىنىلعان كارتينالار جيىنتىعىن ۋاقىت پەن زامان تىنىسىن اسا دالدىكپەن بەرگەن بىرەگەي تۋىندىلار قۇراعان.
«سەرگەي كالمىكوۆتىڭ ءومىرى مەن قىزمەتى – قازاقستان مەن رەسەيدىڭ ورتاق تاريحي تاعدىرى كەزەڭىندەگى تىعىز ءوزارا مادەني بايلانىستارىنىڭ جارقىن مىسالى. بۇگىندە, ونىڭ كوپ قىرلى شىعارماشىلىعى زەرتتەۋشىلەردىڭ قىزىعۋشىلىعىن تۋدىرۋدا. ءبىزدىڭ مۋزەي ءۇشىن كورمەنى وسىنداي تاريحي ماڭىزى بار ورىندا وتكىزۋ ءۇلكەن قۇرمەت», دەيدى ءا.قاستەەۆ اتىنداعى ونەر مۋزەيىنىڭ ديرەكتورى گۇلميرا شالاباەۆا.
