ستاديون باسشىلىعى وبلىس اكىمىنە سپورت الاڭىندا ەلەۋلى پروبلەمالار جوق ەكەنىنە سەندىرۋگە تىرىستى, بىراق ولاردىڭ ءجاي قاراعان كوزگە دە كورىنبەۋى مۇمكىن ەمەس. ماسەلەن, جىلىتۋ جۇيەسى شامامەن ءبىر اي بۇرىن ىسكە قوسىلعانىنا قاراماستان, الاڭداعى كوگالدار ءالى كۇنگە دەيىن وسپەگەن. بۇل فۋتبول الاڭىنىڭ جىلىتۋ جۇيەسى تولىعىمەن جۇمىس اتقارمايدى جانە كۇردەلى جوندەۋدى تالاپ ەتەدى. بۇدان باسقا, كورەرمەندەردىڭ تريبۋناسىن جانە ستاديون عيماراتىن كۇردەلى جوندەۋ قاجەت.
قالانىڭ نەگىزگى سپورت ارەناسى جاقسى جاعدايدا بولماعانىن جانە ستاديوندى كىمنىڭ باسقاراتىنى تۋرالى تولىق ءارى تۇسىنىكتى جاۋاپتى وبجسم-نىڭ فۋتبول بويىنشا ديرەكتورى گۇلناز قارتانوۆا دا, دەنە شىنىقتىرۋ جانە سپورت باسقارماسىنىڭ باسشىسى مەيرامبەك ماحامبەتوۆ بەرە المادى.
«جاۋاپتى تۇلعالاردىڭ بويىندا جاۋاپتى ۇستانىم جوق. ەگەر تۋراسىن ايتاتىن بولساق, بۇل جاعداي ولاردىڭ كاسىبي دەڭگەيلەرى تۋرالى ويلاندىرادى. سونىمەن قاتار, ءبارىن جاقسى, ەشقانداي پروبلەمالار جوق, ماۋسىمعا دايىنبىز دەپ الداۋعا تىرىسىپ جاتىرسىزدار. تولىپ تۇرعان جاۋاپسىزدىق. ناتيجەسىندە الاڭ دايىن ەمەس, سەكتورلار دايىن ەمەس. مەن قانشاما جىلدار بويى العاش رەت ستاديوننىڭ وسىنداي جاعدايىن كورىپ تۇرمىن», - دەدى وڭداسىن ورازالين.
«قالانىڭ ءومىرى ءۇشىن, جالپى ستاديون مەن فۋتبولدىڭ قوعامدىق ماڭىزدىلىعىن ەسكەرە وتىرىپ, ۇيىمداستىرۋشىلىق, كادرلىق جانە قارجىلىق ماسەلەلەرگە بايلانىستى امالسىز توتەنشە شارالار قابىلدايمىن. ماسەلە دۇرىس شەشىلمەسە مۇنداعى كەيبىر ادامدار ەندى جۇمىس ىستەمەيدى», - دەدى وبلىس اكىمى.
وبلىس باسشىسىنىڭ تاپسىرماسىنا سايكەس وسى كۇنى ستاديونداعى كۇردەلى جوندەۋ جۇرگىزۋ ماسەلەسى بويىنشا ساراپشىلاردىڭ قاتىسۋىمەن كەڭەس شاقىرىلدى.
