وسى ۋاعدالاستىق اياسىندا جەرگىلىكتى ءتورت ستۋدەنت ساحا ەلىندە وقىپ, تاجىريبە جيناقتاپ كەلگەن ەدى. ەندى, مىنە, كورشى ەلدىڭ ستۋدەنتتەرى وسىندا اگرونوميا مەن ورمان رەسۋرستارى جانە ورمانشىلىق ماماندىقتارى بويىنشا بىلىمدەرىن جەتىلدىرمەك.
«سقمۋ قازاقستاندا جەتەكشى وقۋ ورىندارىنىڭ ءبىرى سانالاتىندىقتان, ستۋدەنتتەرىمىز كەلۋگە قۇشتار. مۇنداي ارىپتەستىك بايلانىس ەكى جاققا دا ءتيىمدى. ءبىر-بىرىمىزدەن ۇيرەنەرىمىز كوپ» دەيدى ياكۋت مەملەكەتتىك اۋىلشارۋاشىلىق اكادەمياسىنىڭ وقىتۋ جانە تاربيە جۇمىستارى جونىندەگى پرورەكتورى اننا چەركاشينا.
ساحا جەرىندە ءبىلىمىن جەتىلدىرگەن ستۋدەنتتەردىڭ ءبىرى دانا ءادىلوۆا كورشى ەلدە اگرونوميا باعىتى بويىنشا ءدارىس الىپتى. ءبىلىم بەرۋ جۇيەسى ۇقساس بولعاندىقتان تەز بەيىمدەلىپ كەتىپتى. تابيعاتى قاتال ايماقتا وسىمدىك شارۋاشىلىعىنا ماماندانىپتى. جىلقى شارۋاشىلىعى جاقسى دامىعانمەن, ورماندى القاپتاردى ىسكە ۇقساتۋ كەنجەلەر قالعان. بۇل ولقىلىقتى بىلىمىن جەتىلدىرۋگە كەلگەن ميروسلاۆ ماكسيموۆ تا مويىندايدى. ورمانشىلىقتىڭ قىر-سىرىن جەتە ۇيرەنىپ, ەل پايداسىنا جاراتقىسى كەلەتىنىن ايتادى.
ۋنيۆەرسيتەتتە «ۇتقىر» باعدارلاماسى بويىنشا رەسەيدىڭ ۋرال فەدەرالدى ۋنيۆەرسيتەتى جانە سلوۆاكيانىڭ وقۋ ورىندارىمەن تاجىريبە الماسۋ جونىندە كەلىسىم جاسالعان. بۇدان بولەك جەرگىلىكتى ستۋدەنتتەر گەرمانيا, قىتاي سىندى مەملەكەتتەردە تاجىريبە الماسىپ قايتىپتى. مەرۋەر ەگىزباەۆا قىتايدىڭ شەنتسي پروۆەنتسياسىندا بولىپ, زاماناۋي تەحنولوگيالارمەن جۇمىس ىستەۋگە توسەلىپتى.
اۋىل شارۋاشىلىق كافەدراسىنىڭ مەڭگەرۋشىسى مۇرات توقتاردىڭ ايتۋىنشا, قىتاي ەلىنىڭ سولتۇستىك – باتىس اۋىلشارۋاشىلىق ۋنيۆەرسيتەتىمەن «جىبەك جولى» باعدارلاماسى بويىنشا ارىپتەستىك قاتىناس ورناتىلعان.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
