بيىل كونفەرەنتسيا وتكىزۋ قۇقىعىنا نۋ-مەن بىرگە سينگاپۋر, جاپونيا, قىتاي, تايۆان جانە ءۇندىستان ۋنيۆەرسيتەتتەرى كۇرەستى.
نۋ گۋمانيتارلىق جانە الەۋمەتتىك عىلىمدار مەكتەبىنىڭ ستۋدەنتى جانە نازارباەۆ ۋنيۆەرسيتەتىنىڭ ستۋدەنتتىك ۇكىمەتىنىڭ پرەزيدەنتى, The HPAIR Astana 2019 ۇيىمداستىرۋ كوميتەتىنىڭ جەتەكشىسى لەيلا احمەتوۆا اتاپ وتكەندەي, تۇپكىلىكتى شەشىم قابىلداۋ ماقساتىندا گارۆارد ۋنيۆەرسيتەتىنىڭ (اقش) HPAIR ۇيىمداستىرۋ كوميتەتىنىڭ مۇشەلەرىنەن قۇرىلعان دەلەگاتسيا استانا قالاسىنا كەلىپ, نازارباەۆ ۋنيۆەرسيتەتىنىڭ ۇيىمداستىرۋ كوميتەتىنىڭ مۇشەلەرىمەن كەلىسسوزدەر وتكىزدى. ەندى نازارباەۆ ۋنيۆەرسيتەتىنىڭ كومانداسى ءىس-شارانى بىرلەسىپ دايىنداۋ ماقساتىندا گارۆاردقا اتتانادى.
ايتا كەتەتىن ءجايت, HPAIR-2019 كونفەرەنتسياسى استانا قالاسىندا جاستار جىلى وتەدى جانە قازاقستاندىق جاس ۇرپاققا جاڭا مۇمكىندىكتەردى ۇسىنادى. ءىس-شارانىڭ كۇن تارتىبىنە التى تاقىرىپتىق پانەلدەر كىرەدى: 1) الەۋمەتتىك ساياسات جانە ينكليۋزيۆتىك دامۋ, 2) الەمدىك ەكونوميكا, 3) قاۋىپسىزدىك جانە ديپلوماتيا, 4) بيزنەس جانە تەحنولوگيالار, 5) قورشاعان ورتانىڭ تۇراقتىلىعى جانە ەنەرگەتيكا, 6) مادەنيەت جانە مەديا.
«ازيا جانە حالىقارالىق قاتىناستار جونىندەگى گارۆارد جوباسى (The Harvard College Project for Asian and International Relations / HPAIR)» كونفەرەنتسياسى ازيا ەلدەرىندە گارۆارد ۋنيۆەرسيتەتىنىڭ باستاماسىمەن وتەتىن ەڭ ءىرى ستۋدەنتتىك كونفەرەنتسيا بولىپ تابىلادى. كونفەرەنتسيا ستۋدەنتتەر مەن جاس ماماندار ءۇشىن تىنىق مۇحيت ايماعىنداعى جانە ازيا ەلدەرىندەگى ەڭ ماڭىزدى ەكونوميكالىق, ساياسي جانە الەۋمەتتىك ماسەلەلەردى تالقىلاۋ ماقساتىندا پىكىرتالاس الاڭى رەتىندە قۇرىلدى. كونفەرەنتسيا 1991 جىلدان باستاپ 32 000 قاتىسۋشىلاردى تارتا وتىرىپ, الەمنىڭ 12 ەلىندەگى جوعارى وقۋ ورىندارىندا ءوتتى. كونفەرەنتسيانىڭ بۇرىنعى سپيكەرلەرىنىڭ اراسىندا ەلدەردىڭ كوشباسشىلارى, تانىمال عالىمدار مەن نوبەل سىيلىعىنىڭ لاۋرەاتتارى, ديپلوماتتار, حالىقارالىق ۇيىمداردىڭ باسشىلارى بار.
