قوستاناي وبلىستىق پوليتسياسى باسقارما شتابىنىڭ باستىعى مەيرام قاجكەنوۆتىڭ ايتۋىنشا, رەسەي مەن قوستاناي وبلىسى قۇقىق قورعاۋ ورگاندارى قىزمەتكەرلەرى قىلمىسكەرلەردى قۇرىقتاۋدا كوپتەگەن جىلدار بويى تىعىز بايلانىستا جۇمىس ىستەپ كەلەدى. اسىرەسە, پوليتسەيلەر كولىك ۇرلىعىن اشكەرەلەگەندە تىزە قوسىپ ارەكەت ەتەدى.
«قوستاناي وبلىسىنىڭ رەسەيمەن شەكاراسى 1242 شاقىرىمدى قۇرايدى. سول ارقىلى كولىك تاسقىنى ءارى-بەرى ءوتىپ جاتادى. سوندىقتان كورشى, شەكارالاس وبلىستار پوليتسەيلەرىنە قىلمىسپەن كۇرەستە جەدەل ارەكەت ەتۋ ءۇشىن اقپاراتتى دەر ۋاقىتىندا حابارلاپ وتىرۋ كەرەك» دەيدى مەيرام قاجكەنوۆ.
پوليتسەيلەردىڭ ەكى جاقتى كەزدەسۋىندە كورشى مەملەكەتتەردەن كولىك ۇرلاۋدىڭ جولىن جابۋ ءۇشىن بىرلەسكەن جەدەل-ىزدەستىرۋ شارالارىن ۇزدىكسىز جۇرگىزۋگە شەشىم قابىلدادى. سونداي-اق قىلمىسكەرلەردى جانە ءىز-ءتۇزسىز جوعالعانداردى ىزدەستىرۋدە, ەسىرتكى بيزنەسىمەن كۇرەسۋدە ەكى جاقتى ىنتىماقتاسا جۇمىس ىستەۋدىڭ كەشەندى ماسەلەلەرى جەتە قارالدى. قوستاناي وبلىستىق پوليتسيا دەپارتامەنتى قىلمىستىق پوليتسياسى باسقارماسى باستىعىنىڭ ورىنباسارى ەربول تايبەكوۆ مۇنداي باسقوسۋلاردىڭ وڭ ناتيجە بەرەتىندىگىن, ەكى جاقتى ىنتىماقتاسا جۇمىس ىستەۋدىڭ نەگىزگى تەتىگىنىڭ ءبىرى جەدەل اقپارات الماسۋ مەن ونى جەتىلدىرىپ, كەشەندى جۇزەگە اسىرۋ ەكەنىن ايىرىقشا ايتتى. سوندىقتان الداعى ۋاقىتتا دا ۇزدىك تاجىريبەلەر الماسۋ جانە ىنتىماقتى جۇمىستى ۇزبەۋ كەرەكتىگىن ەكى ەل پوليتسەيلەرى دە اتاپ ءوتتى.
كەزدەسۋ سوڭىندا قۇقىق ءتارتىبىن رەتكە كەلتىرىپ وتىرۋداعى كوپتەگەن ورتاق مىندەتتەردى جۇزەگە اسىرۋ ءۇشىن پروتوكولعا قول قويىلدى.
ءنازيرا جارىمبەت,
«ەگەمەن قازاقستان»
قوستاناي
