– ءبىز الەمنىڭ وزىق دامىعان 30 ەلىنىڭ قاتارىنا قوسىلۋدى ماقسات تۇتقان بەرىك ءارى ورنىقتى مەملەكەت قۇردىق. دامۋ جولىن ۇستانا وتىرىپ, ءبىز ءتۇرلى سالالار مەن باعىتتاردا زور تابىسقا جەتتىك. بۇل جەتىستىكتەرگە بارشا قازاقستاندىقتاردىڭ كۇش-جىگەرى مەن جاسامپاز قۋاتىنىڭ ارقاسىندا قول جەتكىزدىك, – دەدى ەلباسى.
قازاقستان پرەزيدەنتى مەملەكەتىمىز جىل سايىن وتانىمىزدىڭ گۇلدەنۋىنە زور ۇلەس قوسقان ازاماتتارىن ناگرادالارمەن ماراپاتتاپ, سىيلىقتار تاپسىراتىنىن ايتىپ, مۇنداي ماراپاتقا ەڭ ۇزدىكتەر, كاسىبي تۇرعىدان بيىكتى باعىندىرعان جانە قوعام تاراپىنان مويىندالعان ادامدار عانا يە بولاتىنىنا توقتالدى.
– سىزدەر وسكەلەڭ ۇرپاق پەن ەلىمىزدىڭ بارشا ازاماتتارى ءۇشىن ايانباي قىزمەت ەتۋدىڭ, ەڭبەكتى ايرىقشا قۇرمەتتەۋدىڭ جانە ناعىز ءپاتريوتيزمنىڭ جارقىن ۇلگىسى بولىپ سانالاسىزدار. سىزدەردىڭ جەتىستىكتەرىڭىز مەملەكەتتىڭ ەڭ جوعارى باعاسىنا جانە حالىقتىڭ قۇرمەتىنە يە بولۋعا ءتيىس, – دەدى نۇرسۇلتان نازارباەۆ.
مەملەكەت باسشىسى «قازاقستاننىڭ ەڭبەك ەرى» اتاعىن «اقتوبە قالاسى سال اۋرۋىنا شالدىققان ازاماتتاردى قولداۋ ورتالىعى» قوعامدىق بىرلەستىگىنىڭ ءتورايىمى قۇرالاي بازاربايقىزى بايمەنوۆاعا بەرىپ, ونىڭ ءومىر قيىنشىلىقتارىنا مويىماي, كەرىسىنشە, تاعدىر تاۋقىمەتىن تارتقان ادامدارعا كومەك كورسەتىپ جۇرگەنىن اتاپ ءوتتى. قازىرگى كەزدە ق.بايمەنوۆا مۇمكىندىگى شەكتەۋلى جاندارعا قولداۋ كورسەتۋ جونىندەگى جوبالاردى ىسكە اسىرۋدا.
– «قازاقستاننىڭ ەڭبەك ەرى» مارتەبەلى اتاعىن الينا روبەرتوۆنا سولوۆەۆا يەلەنەدى. ول – ۇلاعاتتى ۇستاز, ءوز وڭىرىندەگى ءبىلىم بەرۋ جۇيەسىن دامىتۋعا مول ۇلەس قوستى. ا.سولوۆەۆا جاڭاشىل ءارى شىعارماشىل پەداگوگ رەتىندە الەمنىڭ ۇزدىك تاجىريبەلەرى مەن زاماناۋي تەحنولوگيالارىن وقۋ-تاربيە ۇدەرىسىنە بەلسەندى تۇردە ەنگىزىپ كەلەدى, – دەدى قازاقستان پرەزيدەنتى.
ەلباسى «قازاقستاننىڭ ەڭبەك ەرى» اتاعىمەن سايرامباي الىقۇل ۇلى دونەنباەۆتى ماراپاتتاي وتىرىپ, ءىرى شارۋا قوجالىعىنىڭ باسشىلى بولا تۇرا, ول ادال ەڭبەگى ارقىلى تۋعان جەرىنىڭ دامۋىنا جانە وركەندەۋىنە ايتارلىقتاي ۇلەس قوسىپ كەلە جاتقانىن ايتتى.
– ءىى دارەجەلى «بارىس» وردەنىمەن اباي قاباتاي ۇلى بايگەنجين ماراپاتتالادى. ونىڭ بۇكىل كاسىبي قىزمەتى مەديتسينا سالاسىمەن تىكەلەي بايلانىستى. ول ەلىمىزدىڭ دەنساۋلىق ساقتاۋ سالاسىنىڭ جەتەكشى مەكەمەلەرىن قۇرۋ جانە دامىتۋ ىسىنە زور ۇلەس قوستى, – دەدى نۇرسۇلتان نازارباەۆ.
ەلباسى قازاقستاننىڭ حالىق جازۋشىسى قابدەش ءجۇمادىلدى ءىى دارەجەلى «بارىس» وردەنىمەن ماراپاتتاپ, ونىڭ تاريحي روماندارى مەن شىعارمالارى الەمنىڭ كوپتەگەن تىلىنە اۋدارىلعانىن جانە قازاق ادەبيەتىنىڭ التىن قورىنا ەنگەنىن اتاپ ءوتتى.
– ءىىى دارەجەلى «بارىس» وردەنى ولەگ ۆلاديميروۆيچ دانيلەنكوعا تابىس ەتىلەدى. ول شيرەك عاسىردان استام ۋاقىت بويى ەلىمىزدىڭ اۋىل شارۋاشىلىعىندا جەمىستى ەڭبەك ەتتى. و.دانيلەنكو باسقاراتىن ارگوفيرما اسىل تۇقىمدى مال شارۋاشىلىعىندا جوعارى ناتيجەلەرگە قول جەتكىزىپ, اۋىلدىڭ الەۋمەتتىك سالاسىنا لايىقتى قولداۋ كورسەتىپ كەلەدى, – دەدى مەملەكەت باسشىسى.
قازاقستان پرەزيدەنتى ءىىى دارەجەلى «ەڭبەك داڭقى» وردەنىن «Kazakhmys Smelting» جاۋاپكەرشىلىگى شەكتەۋلى سەرىكتەستىگى مىس قورىتۋ زاۋىتىنىڭ بالقىتۋشىسى تەمىرجان سابىرجان ۇلى بەكجانوۆقا تابىس ەتتى.
نۇرسۇلتان نازارباەۆ استانا قالالىق ىشكى ىستەر دەپارتامەنتى جول-پاترۋلدىك پوليتسياسىنىڭ ينسپەكتورى ازامات قانات ۇلى بالتاباەۆتى ءىى دارەجەلى «ايبىن» وردەنىمەن ماراپاتتاي وتىرىپ, قاھارمان كاسىبىنىڭ يەلەرى ازاماتتارىمىزدىڭ قاۋىپسىزدىگى مەن تىنىشتىعىن قامتاماسىز ەتۋ جولىندا ءاردايىم ەرلىك كورسەتۋگە ءازىر ەكەنىن ايتتى.
– قيىن جاعدايدا, وزىنە قاۋىپ ءتونىپ تۇرسا دا, ازامات ءتورت ادامنىڭ, سونىڭ ىشىندە ءبىر بالانىڭ ءومىرىن قۇتقارىپ قالدى, – دەدى ەلباسى.
مەملەكەت باسشىسى ادام ءومىرىن قۇتقارۋدا ەرلىك پەن باتىلدىق تانىتقانى ءۇشىن ءىىى دارەجەلى «ايبىن» وردەنىمەن ىشكى ىستەر مينيسترلىگىنىڭ قىزىلوردا وبلىستىق توتەنشە جاعدايلار دەپارتامەنتىنىڭ №2 ورتكە قارسى مامانداندىرىلعان بولىمشەسىنىڭ كومانديرى ەرمەكبەك پازليەۆتى ماراپاتتادى.
سونىمەن قاتار, قازاقستان پرەزيدەنتى ماراپاتتالۋشىلار قاتارىندا عىلىم, مادەنيەت جانە ونەر قايراتكەرلەرى, ءبىلىم بەرۋ جانە دەنساۋلىق ساقتاۋ سالاسىنىڭ قىزمەتكەرلەرى, كاسىپكەرلەر مەن وندىرىسشىلەر, اسكەريلەر مەن قۇقىق قورعاۋ ورگاندارىنىڭ قىزمەتكەرلەرى, ەڭبەك ارداگەرلەرى, سپورتشىلار مەن مەملەكەتتىك قىزمەتشىلەر بار ەكەنىن اتاپ ءوتتى.
– بۇگىن ءبىز ەڭ ۇزدىكتەردى, سونىڭ ىشىندە ەلىنىڭ گۇلدەنۋى مەن حالقىنىڭ ءال-اۋقاتىنىڭ ارتۋى ءۇشىن بار ءبىلىمىن, قۋاتى مەن كۇشىن جۇمساۋعا ءازىر ءوز وتانىنىڭ ناعىز پاتريوتتارىن ماراپاتتاپ وتىرمىز. سىزدەر ءوز ىستەرىڭىزگە ادال بولعاندىقتان, ەڭبەكتى سۇيگەندىكتەرىڭىزدەن, ەرلىك جاساعاندىقتان ارىپتەستەرىڭىزدىڭ اراسىندا بەدەلگە يە بولىپ, قوعامىمىزدىڭ قۇرمەتىنە بولەندىڭىزدەر, – دەدى نۇرسۇلتان نازارباەۆ.
ەلباسى ادەبيەت پەن ونەر سالاسىنداعى جوعارى ماراپاتتى تىنىشتىقبەك ابدىكاكىموۆكە, اقۇشتاپ باقتىگەرەەۆاعا جانە وتەگەن ورالباەۆقا تابىس ەتىپ, ازاماتتارىمىزدىڭ رۋحاني تۇرعىدان جاڭعىرۋى مەن شىعارماشىلىق الەۋەتىنىڭ دامۋى ەلىمىزدىڭ ماڭىزدى باسىمدىعى بولىپ سانالاتىنىن ايتتى.
– مەملەكەتتىك سىيلىقتار «اباي» وپەراسىن قويعان جانە «اناعا اپارار جول» ءفيلمىن تۇسىرگەن شىعارماشىلىق ۇجىمدارعا بەرىلەدى. بۇل جوعارى كوركەمدىك دەڭگەيدە ورىندالعان تۋىندىلار قازاقستان مادەنيەتى مەن ونەرىن الەمدە ىلگەرىلەۋگە سەپتىگىن تيگىزەدى, – دەدى مەملەكەت باسشىسى.
بۇدان بولەك, ءراسىم بارىسىندا ءى, ءىى, ءىىى دارەجەلى «بارىس» وردەندەرى ەڭبەك ارداگەرى ج.س.كارىبجانوۆكە, «قازاقستان تەمىر جولى» ۇك» اق باسقارما توراعاسى س.م.مىڭباەۆقا, «قازاق ۇلتتىق ونەر ۋنيۆەرسيتەتى» رمم پروفەسسورى س.ش.ورازالىعا, ورتالىق سايلاۋ كوميسسياسىنىڭ توراعاسى ب.م.يماشەۆكە تابىس ەتىلدى.
«پاراسات» وردەنىمەن سولتۇستىك قازاقستان وبلىسىنىڭ اكىمى ق.ءى.اقساقالوۆ, قورعانىس جانە اەروعارىش ونەركاسىبى ءمينيسترى ب.ب.اتامقۇلوۆ, مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى اپپاراتىنىڭ جەتەكشىسى س.ق.احمەتجانوۆ, «اباي اتىنداعى قازاق ۇلتتىق پەداگوگيكالىق ۋنيۆەرسيتەتى» رمك رەكتورى ت.و.بالىقباەۆ, «قازاقستان رەسپۋبليكاسى پرەزيدەنتىنىڭ تەلەراديوكەشەنى» كەاق باس ديرەكتورى ە.ق.بەكحوجين, پرەمەر-ءمينيستردىڭ ورىنباسارى ە.ا.دوساەۆ, جامبىل وبلىسىنىڭ اكىمى ا.ي.مىرزاحمەتوۆ, «Uniserv» جشس باقىلاۋشى كەڭەسىنىڭ توراعاسى ن.ساتباەۆ, ماڭعىستاۋ وبلىسىنىڭ اكىمى ە.ل.توعجانوۆ ماراپاتتالدى.
«قۇرمەت» وردەنىمەن ماراپاتتالعاندار قاتارىندا دەنساۋلىق ساقتاۋ ءمينيسترى ە.ا.ءبىرتانوۆ, «قازاق ۇلتتىق حورەوگرافيا اكادەمياسى» كەاق وقىتۋشىسى ل.ۆ.ماكارتسەۆا, ۇلتتىق ەكونوميكا ءمينيسترى ت.م.سۇلەيمەنوۆ, ن.تىلەنديەۆ اتىنداعى اكادەميالىق فولكلورلى-ەتنوگرافيالىق وركەسترىنىڭ باس ديريجەرى د.ن.تىلەنديەۆا بار.
«قازاقستاننىڭ ەڭبەك سىڭىرگەن قايراتكەرى» اتاعى كينو ءارتىسى س.ءى.ەسلياموۆاعا جانە «قۇرمانعازى اتىنداعى قازاق ۇلتتىق كونسەرۆاتورياسى» رمم اعا وقىتۋشىسى يا.س.رۋدكوۆسكيگە بەرىلدى.
اسكەري جانە قىزمەتتىك بورىشىن ۇلگىلى اتقارعانى, زاڭدىلىق پەن قۇقىقتىق ءتارتىپتى قامتاماسىز ەتۋ, ەلدىڭ ۇلتتىق قاۋىپسىزدىگى مەن قورعانىس قابىلەتىن نىعايتۋ كەزىندە كورسەتكەن ەرلىگى مەن قاجىرلىلىعى ءۇشىن ءىى دارەجەلى «داڭق» وردەنىمەن جانە «جاۋىنگەرلىك ەرلىگى ءۇشىن» مەدالىمەن اسكەري قىزمەتشىلەر مەن قۇقىق قورعاۋ ورگاندارى وكىلدەرىنىڭ ءبىر توبى, اتاپ ايتقاندا ۇلتتىق قاۋىپسىزدىك كوميتەتى سولتۇستىك قازاقستان وبلىسى بويىنشا دەپارتامەنتىنىڭ باستىعى ا.ا.اقشاەۆ, قورعانىس ءمينيسترىنىڭ ورىنباسارى م.م.التىنباەۆ, الماتى قالاسىنىڭ پروكۋرورى ب.ق.جۇيرىكتاەۆ, قازاقستان رەسپۋبليكاسى قارۋلى كۇشتەرى اۋە قورعانىسى كۇشتەرى اسكەري-اۋە كۇشتەرىنىڭ قولباسشىسى د.ج.قوسانوۆ, مەملەكەتتىك كۇزەت قىزمەتى وبەكتىلەردى قورعاۋ قىزمەتى «ايبىن» پرەزيدەنتتىك پولكى» راسىمدىك باتالونى قۇرمەت قاراۋىل روتاسىنىڭ بولىمشە كومانديرى ءا.ا.تورەبەكوۆ ماراپاتتالدى.
سونىمەن قاتار, ءراسىم بارىسىندا قازاقستان رەسپۋبليكاسىنىڭ ادەبيەت پەن ونەر سالاسىنداعى 2018 جىلعى مەملەكەتتىك سىيلىق «اباي» وپەراسى ءۇشىن ت.ن.الپيەۆ, س.ءا.بايعوجين, ع.ا.احمادياروۆتان قۇرالعان اۆتورلار ۇجىمىنا جانە «اناعا اپارار جول» تولىقمەترلى كوركەم ءفيلمى ءۇشىن ا.ق.ساتاەۆ, ءا.ن.نازارباەۆا, ا.ب.نوگەربەك, ءا.ە.احمەتوۆتان قۇرالعان اۆتورلار ۇجىمىنا تابىس ەتىلدى.
سوڭىندا قازاقستان پرەزيدەنتى مەملەكەتتىك ناگرادالار مەن سىيلىقتار ەلىمىزدىڭ باستى مەرەكەسى – تاۋەلسىزدىك كۇنى قارساڭىندا تابىس ەتىلۋىنىڭ سيمۆولدىق مانىنە توقتالدى.
– سىزدەر مەملەكەتتىڭ وسى جوعارى باعاسىنا لايىقتى بولىپ, قازاقستان حالقىنىڭ يگىلىگى جولىندا قىزمەت ەتە بەرەتىندەرىڭىزگە سەنىمدىمىن. جاستارىمىز سىزدەر سالعان جولمەن ءجۇرىپ, جاڭا بەلەستەر مەن ىستەردى باعىندىراتىن بولادى. وتانىمىزدىڭ قاۋىپسىزدىگى مەن باقۋاتتىلىعى سىزدەردىڭ قولدارىڭىزدا! وسى جوعارى ءارى مارتەبەلى ميسسياعا ارقاشان لايىق بولىڭىزدار! – دەدى نۇرسۇلتان نازارباەۆ.
