وبلىس اكىمى جاپپاي كاسىپكەرلىكتى دامىتۋ ارقىلى 3 ماڭىزدى ماسەلە شەشىلىپ جاتقانىن: بىرىنشىدەن, سالىق بازاسىنىڭ ۇلعايۋى, ەكىنشىدەن, جاڭا جۇمىس ورىندارىنىڭ قۇرىلۋى جانە ۇشىنشىدەن, قوعامدىق-ساياسي احۋالدىڭ تۇراقتىلىعىنىڭ جاقسارعاندىعىن اتاپ ءوتتى..
- ءبىز بيىل جالپى بيۋدجەتى 32 ملرد. تەڭگەنى قۇرايتىن كەشەندى «جول كارتاسىن» ازىرلەدىك! ونىڭ ىشىندە اتالعان قاراجاتتىڭ 3 ملرد. تەڭگەدەن استام بولىگىن «ستارتاپ» جوبالارعا باعىتتادىق. جىل باسىنان بەرى قايتارىمسىز گرانتتار, نەسيە الۋدىڭ قادامدىق ءىس-ارەكەتىن, تيپتىك بيزنەس-جوسپارلاردى ازىرلەسەك, ال جوبالاردى سۇيەمەلدەۋ ءۇشىن ءاربىر اۋىلدىق وكرۋگكە وبلىستىق دەڭگەيدەگى لاۋازىمدى تۇلعالار بەكىتىلدى. بۇدان بولەك, بەكىتىلگەن لاۋازىمدى تۇلعالاردىڭ جاپپاي كاسىپكەرلىكتى دامىتۋ بويىنشا ەسەبىن اي سايىن تىڭدايمىز,-دەدى ول.
وبلىستا جىل باسىندا جۇمىس ىستەپ تۇرعان شاعىن جانە ورتا بيزنەس سۋبەكتىلەرىنىڭ سانى 37 450 بىرلىكتى قۇراسا, وندا اعىمداعى جىلدىڭ 10 ايداعى قورىتىندىسىمەن ونىڭ سانى 42 066 بىرلىككە جەتتى. ياعني, جىل باسىنان بەرى جۇمىس ىستەپ تۇرعانداردىڭ سانىن 4616 بىرلىككە تولىقتى. بۇل وتكەن جىلدىڭ سايكەستى كەزەڭىمەن سالىستىرعاندا ءوسىم 12,7% بولدى. سونداي-اق, ەگەر جىل باسىندا تىركەلگەن شاعىن جانە ورتا كاسىپكەرلىك سۋبەكتىلەرىنىڭ ىشىندەگى جۇمىس ىستەپ تۇرعانداردىڭ ۇلەسى 75 پايىز بولسا, وندا اعىمداعى جىلدىڭ 10 ايىندا ونىڭ ۇلەسى 81 پايىزعا جەتتى.
باقتيار تايجان,
«ەگەمەن قازاقستان»
قىزىلوردا وبلىسى
