بۇل تۋرالى وڭىرلىك كوممۋنيكاتسيالار قىزمەتىندەگى بريفينگ بارىسىندا قوعامدىق دەنساۋلىق ساقتاۋ دەپارتامەنتى باسشىسىنىڭ ورىنباسارى ەربولات ۋايسوۆ مالىمدەدى. سپيكەردىڭ ايتۋىنشا, ۇلتتىق ساراپتاما ورتالىعى اتىراۋ وبلىستىق فيليالىنىڭ ماماندارى بالىقتىڭ جاپپاي قىرىلۋ سەبەپتەرىن انىقتاۋ ءۇشىن جايىق وزەنىنەن 40 سىناما الدى.
- سۋ حيميالىق كورسەتكىشتەرگە, ۋلى حيميكاتتارعا, ميكروبيولوگيالىق كورسەتكىشتەرگە جانە پارازيتارلىققا تەكسەرىلدى. زەرتحانالىق زەرتتەۋلەر ناتيجەلەرى بويىنشا سۋ قۇرامىندا شەكتى رۇقسات ەتىلگەن كورسەتكىشتەردەن ەشقانداي اسۋ كورسەتكىشتەرى تىركەلگەن جوق. سوندىقتان, جايىق وزەنىندەگى سۋ تۇرعىندارعا قاۋىپ توندىرمەيدى, - دەدى ەربولات ۋايسوۆ.
سونىمەن قاتار, ۆەتەرينارلىق دارىگەرلەر ورتالىق قالالىق بازارلاردا ساپاسىز ونىمدەردى ساتۋعا جول بەرمەۋ ماقساتىندا بالىقتاردى كۇندەلىكتى تەكسەرۋدى جۇرگىزۋدە. سونداي-اق, ۆەتەرينارلار قالاداعى جول جيەگىندەگى بازارلاردان جانە جەكە ساۋداگەرلەردەن بالىق ونىمدەرىن ساتىپ الماۋعا كەڭەس بەرەدى.
