بۇل جولعى سايىسقا رەسەي, ۆەنگريا, يسپانيا, موڭعوليا, قىرعىزستان, بىرىككەن اراب امىرلىگى, قىتاي, تۇركىمەنستان ءتارىزدى جەتى مەملەكەتتىڭ قۇس ءتىلىن بىلەتىن, اقسۇيەك ونەردى جانىنا سەرىك ەتكەن ساياتشىلارى قاتىسىپ وتىر. قازاقستاننىڭ ءار ايماعىنان دا قىرانىنىڭ قايراتىنان ءۇمىت ەتكەن ەلۋگە جۋىق قۇسبەگىلەر جينالعان. كەيبىرەۋى قولدارىنا قوس-قوستان قىران قوندىرعان.
حالىقارالىق ءتۋرنيردىڭ اشىلۋ سالتاناتىندا ءسوز سويلەگەن وبلىس اكىمى مالىك مىرزالين وڭىردە ۇلتتىق سپورتتىڭ ءوڭى جاقسارىپ, ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ», « ۇلى دالانىڭ جەتى قىرى» ماقالالارىنان كەيىن سونى سەرپىن العاندىعىن ەرەكشە ەكپىن ءتۇسىرىپ ايتىپ ءوتتى. بۋراباي اسپانىن قىران قۇستىڭ كەرەگە قاناتتارىمەن كومكەرىپ, رۋحتاندىرعان جارىسقا الىستان ات ارىلتىپ جەتكەن شەتەلدىك قوناقتار دا وسى ءبىر وزگەشە سالتاناتتى, ايرىقشا قىزعىلىقتى ءتۋرنيردى ۇيىمداستىرۋشىلارعا اق العىستارىن ايتا كەلىپ, ءوز تاڭدانىستارىن دا ءبىلدىردى.
–باياناۋىلدان كەلدىك,–دەيدى قۇسبەگى تاسىباي يمانزايىپ,–ەكى بۇركىت اكەلدىم. ەكەۋى دە قولبالا قۇستار. ارينە, ءتۇز قۇسىنىڭ وجەتتىگى, الىمدىلىعى كۇشتى عوي.
حالىقارالىق ءتۋرنيردىڭ كورەرمەندەرى نەكەن-ساياق. نەگىزىندە قۇسبەگىلەردىڭ وزدەرى مەن اتقوسشىلارى. قالام ۇستاعان جازارمان قاۋىم, تورەشىلەر مەن ۇيىمداستىرۋشىلار. تۋ سوناۋ تاۋ باسىنان قۇلديلاپ, جاقتان سۋىرىلعان جالعىز جەبەدەي ىسقىرا ۇيىتقىپ كەلىپ, تاۋ ەتەگىندەگى اڭعارعا زىمىراي جۇيتكىپ بارا جاتقان اڭ اتاۋلىعا ون نايزاسىن وقتالعان, نايزاعايداي اتىلعان سۇراپىل ونەردىڭ سالتاناتىن بىلايعى جۇرت نەگە كورمەسكە؟! ءتىپتى, وسى ءبىر كورىنىستىڭ ءوزى الپىس ەكى تامىرىڭدا قالعىپ كەتكەن باعزى ءبىر سەزىمدەردى ءدۇر ەتكىزىپ وياتىپ, كەۋدەڭدى الاپات شاتتىق بيلەيدى ەكەن. كوك اسپاننىڭ كوركى بولعان, اقشا بۇلتپەن استاسقان سوناۋ بيىكتەگى قىراندى ايتقانىنا كوندىرىپ, دەگەنىنە جۇرگىزىپ, كوزدەگەنىنە ۇشىرىپ وتىرعان قۇسبەگىلىك ونەر قانداي كەرەمەت, شىركىن! وزەكتى ورتەر وكىنىشى دە سول, قانسوناردىڭ قىزىعىن قانشا قاۋىم كورە المادى. الدە جارناماسى كەم, قۇلاقتاندىرىلۋى از. ايتپەسە, نەگە كورمەسىن؟!
الدىمەن ىرىكتەۋ سايىسى وتكىزىلگەن. اينىماي تۇسكەن قىراندار اقتىق سىنعا جولداما الدى. جارىس بارىسىندا قىران كەلبەتى دە, ءتۇر-ءتۇسى دە, بەينە-ءبىتىمى دە ەسكەرىلدى. ەڭ باستىسى, العىرلىعى. قويانعا قىر اسىرماعان قىراندار الپىس ەكى ايلالى تۇلكىگە كەلگەندە ابجىلدىگى القىنعانداي. قازىلار القاسىنىڭ شەشىمىمەن جەرلەسىمىز, كراسنىي يار اۋىلىنىڭ تۇرعىنى, قۇسبەگى رۋسلان تۋمۋرزين باس جۇلدە – «نيۆا» اۆتوكولىگىنە يە بولدى. بارلىق جەڭىمپاز قۇسبەگىلەرگە كادەلى سىيلىقتار تارتۋ ەتىلدى. ەكى كۇن بويى بۋراباي باۋرايىن بوكتىرگەن قۇسبەگىلەر سايىسى ەلىمىزدە ءتول ونەرىمىزدىڭ تۋىن تىكتەپ كەلە جاتقاندىعىن جەتى مەملەكەتتەن جينالعان ءتامام ەلگە تانىتتى.
بايقال ءبايادىل,
«ەگەمەن قازاقستان»
اقمولا وبلىسى,بۋراباي اۋدانى
