اۋماعى اتشاپتىرىم دەمالىس ورنىنا قىلقان جاپىراقتى 100 ءتۇپ اعاش جانە جەرگىلىكتى كليماتقا بەيىمدەلگەن 600 ءتۇپ قارا اعاش وتىرعىزىلعان. جايلى ورىندىقتار قويىلىپ, كەلۋشىلەردىڭ دەمالۋىنا جاعداي جاسالعان. جاۋىن مەن ىستىق كۇننەن قورعان بولاتىن زاماناۋي باستىرمالار دا ساياباقتىڭ اجارىن اشىپ تۇر. كوكتەم ايلارىندا ساياباق ءىشى كومپوزيتور ءانىنىڭ نوتالارى بەينەلەنە وتىرىپ, گۇلدەرمەن كومكەرىلمەك.
ەل يگىلىگىنە بەرىلگەن ساياباق تورىندە اسا كورنەكتى سازگەر, قازاقستان مادەنيەتىنە ەڭبەگى سىڭگەن قايراتكەر, قازاقستاننىڭ حالىق ءارتىسى ءشامشى قالداياقوۆتىڭ ەڭسەلى ەسكەرتكىشى دە بوي كوتەردى. ساياباقتىڭ اشىلۋ سالتاناتىندا اۋدان اكىمى ەرلان ايتاحانوۆ تۇرعىنداردى تاۋەلسىزدىكتىڭ 27 جىلدىق مەرەيلى مەرەكەسىمەن قۇتتىقتاپ, كومپوزيتور ساياباعى مەن ەسكەرتكىشىنىڭ لەنتاسىن قيدى.
«ەلباسىنىڭ جۋىردا جارىققا شىققان « ۇلى دالانىڭ جەتى قىرى» ماقالاسىنىڭ « ۇلى دالانىڭ ۇلى ەسىمدەرى» بولىمىندە ۇلى تۇلعالار شوعىرىن كەڭىنەن ناسيحاتتاپ, ەسكەرتكىشتەر مەن تۇلعالار گالەرەياسىن جاساۋ سىندى بىرقاتار ماڭىزدى باستاما كوتەرگەنى بەلگىلى. بار قازاقتى اسەم انىمەن الديلەپ, ونەر كوكجيەگىن سىرلى اندەرىمەن كومكەرگەن سازگەر اتىنداعى ساياباق اۋىل تۇرعىندارى مەن ونىڭ قوناقتارى ءۇشىن تاماشا دەمالىس ورنى بولماق. ەلىمىزدىڭ ەڭ باستى بايلىعى, ەڭ اسىل قازىناسى - حالقى. سول حالىقتىڭ سالاۋاتتى, ءارى رۋحاني كۇش-قۋاتقا باي بولىپ ءومىر ءسۇرۋى ءۇشىن وسى سەكىلدى ساياباقتار قىزمەت ەتە بەرەدى دەگەن سەنىمدەمىن»,- دەدى ەرلان ايتاحانوۆ.
سالتاناتتى شارا بارىسىندا ۇلى سازگەردىڭ بالالىق شاعىنان كورىنىستەر قويىلىپ, اندەرى شىرقالدى.
عالىمجان ەلشىباي,
«ەگەمەن قازاقستان»
تۇركىستان وبلىسى
