نۇرسۇلتان نازارباەۆتىڭ اتىنا قازاقستان رەسپۋبليكاسىنىڭ تاۋەلسىزدىگى كۇنىنە وراي شەت مەملەكەتتەر مەن ۇكىمەتتەر باسشىلارىنان قۇتتىقتاۋ جەدەلحاتتارى مەن حاتتار كەلىپ تۇسۋدە.
گەرمانيا فەدەراتيۆتىك رەسپۋبليكاسىنىڭ پرەزيدەنتى فرانك-ۆالتەر شتاينمايەر مەملەكەت باسشىسىن قۇتتىقتاپ, زور دەنساۋلىق پەن اماندىق, ال قازاقستان حالقىنا – بەيبىت ءومىر مەن جارقىن بولاشاق تىلەدى.
«ۇزاق جىلدار بويى قازاقستان مەن گەرمانيانى سەنىمدى ىنتىماقتاستىق بايلانىستىرىپ كەلەدى. سىزدەردىڭ ەلدەرىڭىز وڭىردە ماڭىزدى ءرول اتقارادى جانە گەرمانيانىڭ ورتالىق ازياداعى ءىرى ساۋدا سەرىكتەسى بولىپ سانالادى. قازاقستاننىڭ وسى جىلدىڭ باسىندا بۇۇ-نىڭ قاۋىپسىزدىك كەڭەسىنە توراعالىق ەتۋى ەلدەرىڭىزدىڭ حالىقارالىق دەڭگەيدە دە وزىنە جاۋاپكەرشىلىك الۋعا دايىن ەكەنىن تاعى دا دالەلدەدى», دەلىنگەن جەدەلحاتتا.
تۇركيا رەسپۋبليكاسىنىڭ پرەزيدەنتى رەجەپ تايپ ەردوعان جولداعان حاتىندا نۇرسۇلتان نازارباەۆتىڭ تاۋەلسىز قازاقستان تاريحىنداعى ءرولىن ايرىقشا اتاپ وتكەن.
ء«بىز قازاقستاننىڭ ەگەمەندىك العان ساتتەن باستاپ حالىقارالىق ارەنادا قول جەتكىزگەن تابىستارىنا, سونداي-اق ەلدەرىڭىزدىڭ دامۋى مەن وركەندەۋىنىڭ ناتيجەلەرىنە قۋانامىز ءارى ماقتان تۇتامىز. بۇل جەتىستىكتەر تۇركى الەمىنىڭ اقىلمانى سانالاتىن ءوزىڭىزدىڭ سىندارلى ساياساتىڭىزدىڭ ناتيجەسى ەكەنى ءسوزسىز. ءسىز جاھاندا بەيبىتشىلىك پەن تۇراقتىلىق ورناتۋ ىسىنە ۇلەس قوسا بەرەتىنىڭىزگە, قازاقستاننىڭ حالىقارالىق بەدەلى ودان ءارى ارتا تۇسەتىنىنە سەنىمدىمىن», – دەلىنگەن تۇركيا رەسپۋبليكاسى پرەزيدەنتىنىڭ جەدەلحاتىندا.
يران يسلام رەسپۋبليكاسىنىڭ پرەزيدەنتى حاسان رۋحاني قۇتتىقتاۋ حاتىندا مەملەكەتتەرىمىزدىڭ يگىلىگى جولىندا ەكىجاقتى قارىم-قاتىناستاردى ودان ءارى نىعايتۋعا نيەتتى ەكەنىن ءبىلدىردى.
ء«سىزدى جانە قازاقستان رەسپۋبليكاسىنىڭ حالقىن تاۋەلسىزدىكتىڭ 27 جىلدىعىمەن شىن جۇرەكتەن قۇتتىقتايمىن. ەكى حالىقتىڭ يگىلىگى جولىنداعى ءوزارا ىنتىماقتاستىعىمىز تەرەڭدەي تۇسەدى دەپ ويلايمىن», دەلىنگەن جەدەلحاتتا.
بەلارۋس رەسپۋبليكاسىنىڭ پرەزيدەنتى الەكساندر لۋكاشەنكو نۇرسۇلتان نازارباەۆتى تاۋەلسىزدىك كۇنىمەن قۇتتىقتاپ, جاۋاپتى مەملەكەتتىك قىزمەتىنە جاڭا تابىس, ال قازاقستان ازاماتتارىنا بەيبىت ءومىر مەن باقىت تىلەدى.
«ەلدەرىڭىز ەكونوميكادا, الەۋمەتتىك جانە ساياسي تۇراقتىلىقتى قامتاماسىز ەتۋ جولىندا ايتارلىقتاي ناتيجەلەرگە قول جەتكىزدى. قازاقستان ەۋرازيا كەڭىستىگىندەگى قاۋىپسىزدىكتى نىعايتۋ, قاقتىعىستاردى شەشۋدىڭ ءتيىمدى تەتىكتەرىن ازىرلەپ, ونى جۇزەگە اسىرۋ ىسىنە زور ۇلەس قوسىپ كەلەدى.
بەلارۋس پەن قازاقستان اراسىنداعى ءوزارا سەنىم مەن تابىستى ىنتىماقتاستىققا نەگىزدەلگەن ستراتەگيالىق قارىم-قاتىناستار حالىقتارىمىزدىڭ يگىلىگى جولىندا ودان ءارى بەلسەندى دامي بەرەتىنىنە سەنىمدىمىن», دەلىنگەن جەدەلحاتتا.
وزبەكستان رەسپۋبليكاسىنىڭ پرەزيدەنتى شاۆكات ميرزيوەۆ جەكە ءوزىنىڭ جانە وزبەكستان حالقىنىڭ اتىنان نۇرسۇلتان نازارباەۆتى جانە بارشا قازاقستاندىقتى تاۋەلسىزدىك كۇنىمەن قۇتتىقتادى.
«قازاقستان زاماناۋي, باسەكەگە قابىلەتتى ءارى قارقىندى دامىپ كەلە جاتقان مەملەكەت رەتىندە ەكونوميكالىق, تەحنولوگيالىق, الەۋمەتتىك جانە مادەني-گۋمانيتارلىق سالالارداعى زور جەتىستىكتەرىمەن الەمدىك قوعامداستىقتا لايىقتى ورىن الىپ وتىر.
ءبىز ءسىزدى حالىقارالىق دەڭگەيدە مويىندالعان مەملەكەت قايراتكەرى, ىسكەر ءارى تالانتتى رەفورماتور, قازاقستان حالقىنىڭ كوشباسشىسى رەتىندە قۇرمەتتەيمىز», دەلىنگەن وزبەكستان رەسپۋبليكاسى پرەزيدەنتىنىڭ جەدەلحاتىندا.
تاجىكستان رەسپۋبليكاسىنىڭ پرەزيدەنتى ەمومالي راحموننىڭ حاتىندا ەكى ەل اراسىنداعى كوپجاقتى ستراتەگيالىق ءوزارا ىقپالداستىقتىڭ قازىرگى دەڭگەيىنە جوعارى باعا بەرىلەدى.
«سىزدەردىڭ ەلدەرىڭىزگە جاساعان رەسمي ساپارىم بارىسىندا قول قويىلعان قۇجاتتار جانە ولاردى ىسكە اسىرۋ جونىندەگى بىرلەسكەن كۇش-جىگەرىمىز ەلدەرىمىز بەن حالىقتارىمىزدىڭ مۇددەلەرىنە ساي كەلەدى. بۇل تاجىكستان مەن قازاقستاننىڭ ءوزارا ءتيىمدى ىنتىماقتاستىعىنا تىڭ سەرپىن بەرەدى دەپ سەنەمىن», – دەلىنگەن جەدەلحاتتا.
قىرعىز رەسپۋبليكاسىنىڭ پرەزيدەنتى سوورانباي جەەنبەكوۆ جەكە ءوزىنىڭ جانە قىرعىزستان حالقىنىڭ اتىنان نۇرسۇلتان نازارباەۆتى تاۋەلسىزدىك كۇنىمەن قۇتتىقتادى.
«تاۋەلسىزدىك جىلدارى ىشىندە قازاقستان ءسىزدىڭ باسشىلىعىڭىزبەن زور جەتىستىكتەرگە جەتتى. ءوزىڭىز باستاماشى بولعان اۋقىمدى مەملەكەتتىك رەفورمالار ەلدىڭ الەۋمەتتىك-ەكونوميكالىق وسىمىنە, حالىقتىڭ ءال-اۋقاتىن ارتتىرۋعا جانە قازاقستاننىڭ حالىقارالىق ارەناداعى بەدەلىن نىعايتۋعا سەپتىگىن تيگىزدى», دەلىنگەن جەدەلحاتتا.
ارمەنيا رەسپۋبليكاسىنىڭ پرەزيدەنتى ارمەن ساركيسيان ءوزىنىڭ حاتىندا ەكى مەملەكەت اراسىنداعى ءوزارا ءتيىمدى ىنتىماقتاستىقتى ودان ءارى دامىتۋدىڭ جانە نىعايتۋدىڭ ماڭىزدىلىعىنا توقتالدى.
ء«بىز بىرلەسە كۇش جۇمىلدىرۋدىڭ ارقاسىندا ەلدەرىمىزدىڭ مەملەكەتارالىق ءىس-قيمىلىنىڭ تيىمدىلىگىن ارتتىرۋعا, ساۋدا-ەكونوميكالىق جانە مادەني-گۋمانيتارلىق بايلانىستاردى نىعايتۋعا, ارمەنيا مەن قازاقستان اراسىنداعى كوپجاقتى ىنتىماقتاستىقتىڭ الەۋەتىن تولىق پايدالانۋعا جول اشامىز دەپ ويلايمىن», دەلىنگەن ارمەن ساركيسياننىڭ حاتىندا.
بىرىككەن اراب امىرلىكتەرىنىڭ پرەزيدەنتى حاليفا بەن زايد ءال-ناھايان, بىرىككەن اراب امىرلىكتەرىنىڭ ۆيتسە-پرەزيدەنتى, پرەمەر-ءمينيسترى, دۋباي امىرلىگىنىڭ بيلەۋشىسى شەيح مۇحاممەد بەن راشيد ءال-ماكتۋم, ءابۋ-ءدابيدىڭ تاق مۇراگەرى, بىرىككەن اراب امىرلىكتەرى قارۋلى كۇشتەرىنىڭ جوعارعى باس قولباسشىسىنىڭ ورىنباسارى شەيح مۇحاممەد بەن زايد ءال-ناھايان وزدەرىنىڭ جەدەلحاتتارىندا مەملەكەت باسشىسىن تاۋەلسىزدىك كۇنىمەن قۇتتىقتاپ, بارشا قازاقستان حالقىنا باق-بەرەكە تىلەدى.
كورەيا رەسپۋبليكاسىنىڭ پرەزيدەنتى مۋن چجە ين نۇرسۇلتان نازارباەۆتى جانە قازاقستان حالقىن ۇلتتىق مەرەكەمەن قۇتتىقتادى. كورەيا رەسپۋبليكاسىنىڭ پرەزيدەنتى ءوزىنىڭ جەدەلحاتىندا: «قازان ايىندا وتكەن اسەم سامميتىندە ەلدەرىمىز اراسىنداعى قاتىناستاردى ودان ءارى دامىتۋعا مۇددەلىلىك تانىتقانىمىزعا قۋانىشتىمىن», دەپ اتاپ وتكەن.
باحرەين كورولى حاماد بەن يسا ءال-حاليفا ءوزىنىڭ قۇتتىقتاۋ حاتىندا نۇرسۇلتان نازارباەۆتىڭ دانا باسشىلىعىمەن قازاقستاننىڭ ودان ءارى دامي بەرۋىنە نيەتتەستىك ءبىلدىرىپ, ىستىق ىقىلاسىن جەتكىزەدى.
الجير حالىق دەموكراتيالىق رەسپۋبليكاسىنىڭ پرەزيدەنتى ابدەل ءازيز بۋتەفليق ءوزىنىڭ حاتىندا قازاقستان حالقىنا باق-بەرەكە تىلەپ, ءوسىپ-وركەندەي بەرۋىنە نيەتتەستىك ءبىلدىردى.
موڭعوليا پرەزيدەنتى حالتمااگين باتتۋلگا نۇرسۇلتان نازارباەۆتى تاۋەلسىزدىك كۇنىمەن قۇتتىقتاي وتىرىپ, مەملەكەتارالىق بايلانىستاردى كەڭەيتۋگە جانە ءوزارا قارىم-قاتىناستاردى تەرەڭدەتۋگە مۇددەلىلىك تانىتتى.
قازاقستان رەسپۋبليكاسىنىڭ تاۋەلسىزدىگى كۇنىنە وراي ءوز قۇتتىقتاۋلارىن مىسىر اراب رەسپۋبليكاسىنىڭ پرەزيدەنتى ابدەل فاتتاح اس-سيسي, سينگاپۋر رەسپۋبليكاسىنىڭ پرەزيدەنتى حاليما ياكوب, ءۇندىستان رەسپۋبليكاسىنىڭ پرەزيدەنتى رام ناتح كوۆيند, سونداي-اق تايلاند كورولدىگىنىڭ پرەمەر-ءمينيسترى گەنەرال پرايۋت چان-وچا جولدادى.
