ءوز باسىم تاۋەلسىزدىكتىڭ العاشقى جاريالانعان ساعاتتارىندا كۋا بولدىم. سول كۇنگى ماقتانىشىمىزدا, توبەمىز كوككە ەكى ەلى جەتپەي قالعان قۋانىشىمىزدا شەك جوق ەدى. تاۋەلسىزدىك العانعا دەيىن ويىمىز بۇعاۋدا, ءتىلىمىز بايلاۋدا بولدى. ءبىز وسىنى جان جۇرەگىمىزبەن سەزدىك. سوندىقتان تاۋەلسىزدىك الۋ كولدەنەڭ كەلگەن قۋانىش ەمەس, ءبىزدىڭ قانىمىزدا عاسىرلار بويعى ساقتالىپ كەلگەن سەزىم.
تاۋەلسىزدىكتىڭ ەڭ العاشقى جىلدارىندا ەلىمىزدىڭ پرەزيدەنتى ماعان دا ۇلكەن ءبىر جۇكتى ارتقان ەدى. سول كەزدەگى قانى شىعىپ تۇرعان ەڭ وزەكتى ماسەلەنىڭ ءبىرى – مەملەكەتتىك ءتىلىمىزدىڭ جاي-كۇيى بولاتىن. ەگەمەندىك العان مەملەكەتتىڭ العاشقى ارەكەتتەرىنىڭ ءبىرى – قازاق ءتىلىن وزىنە لايىق دارەجەگە كوتەرۋ ەدى. قاراجاتتىڭ از, جوقشىلىقتىڭ دەندەپ تۇرعان كەزى. وسى ۋاقىتتىڭ وزىندە, ءتىلىمىزدىڭ قۇرىپ كەتۋگە شاق تۇرعان جاعدايىندا ەل پرەزيدەنتى ءتىل كوميتەتىن قۇرىپ, ۇلكەن شەشىمگە باردى. مەنىڭ باعىما سول ءتىل كوميتەتىنە تۇڭعىش توراعالىق ەتۋ جازىلىپتى. العاشقى جىلدار ارپالىسقا, كۇرەسكە تولى بولدى. العاشقى كۇندەردەن باستاپ ءوزىمىزدىڭ اتى-ءجونىمىزدى ۇلتتىق سيپاتقا اينالدىرۋ باستالدى. كوميتەتتىڭ العاشقى بەس جىلداعى اتقارعان جۇمىسى مەملەكەتتىك ءتىلدىڭ تۇبىندە بيىككە شىعاتىنىن ايقىنداپ بەردى. وسى جولدا جۇزدەگەن شارۋا ىستەلىپ, حالىق بولىپ جۇمىلدىق. اسىرەسە زيالى قاۋىم مەملەكەتتىك ءتىلدىڭ وركەندەۋىنە ويىمەن دە, ىسىمەن دە ۇلەس قوستى. قيىندىققا مويىمادىق, «تاڭ اتپايىن دەسە دە كۇن قويمايدى» دەگەندەي تاۋەلسىز مەملەكەتتىڭ سارا جولى ءتىلىمىزدىڭ دامۋىنا ەرەن جول اشتى.
1993 جىلى العاش رەت تۇركيا ءبىزدىڭ پرەزيدەنتىمىزدى تاۋەلسىز مەملەكەتتىڭ باسشىسى رەتىندە شاقىرعان بولاتىن. سول ساپارىمىزدا تۇركيانىڭ حالىقارالىق اۋەجايىندا پرەزيدەنت ۇشاعى كەلىپ قونا قالعاندا, تۇرعىت ءوزال زايىبىمەن قارسى الدى. ال انكارا كوگىندە گۇرسىلدەي اتىلعان زەڭبىرەك ءۇنى مەن اۋەلەي شىرقالعان قازاقستان ءانۇرانى كوڭىلىمىزگە شاتتىق سىيلادى. تەبىرەنبەي كورىڭىز! تاۋەلسىزدىكتىڭ ارقاسىندا كەرەمەتتەي يگىلىكتەرگە قول جەتكىزدىك. سارى دالانىڭ توسىندە عاجايىپ قالا ورناتتىق. بۇل دا ءبىزدىڭ پرەزيدەنتىمىزدىڭ ەرىك-جىگەرى مەن قايراتكەرلىگىنىڭ ارقاسىندا بولعان دۇنيە. استانانىڭ ءار عيماراتىنىڭ سالىنۋ تاريحى مەنىڭ كوز الدىمدا كۇنى كەشەگىدەي سايراپ تۇر. سول كەزدەگى پرەمەر-ءمينيستردىڭ ورىنباسارى يمانعالي تاسماعامبەتوۆ باستاعان توپ اقمولانى ارالاۋعا شىقتىق. جاڭا استاناعا قونىس اۋدارۋ تۋرالى اڭگىمە ەندى-ەندى ايتىلىپ جاتقان كەز ەدى. سول جولى قالاداعى مادەني ورتالىقتاردىڭ اراسىنان ءىلىپ الار 4-5 عيماراتتىڭ ءوزىنىڭ جاي-كۇيى كەتىپ, توزا باستاعان. «قالاي بولار ەكەن» دەپ ابىرجىدىق, الاڭدادىق. تاريح ءۇشىن قاس-قاعىم ساتتە, اينالدىرعان جيىرما جىل ىشىندە استانا قالاي كوركەيىپ شىعا كەلدى! قالادان ورىن تەپكەن عاجايىپ عيماراتتار مەن كونتسەرت زالدارى, تەاتر ورىندارى الەمدەگى ۇزدىك مادەنيەت وشاقتارىمەن بوي تالاستىرادى. ءسوزىمدى قورىتىندىلاي كەلە, مىنانى ايتقىم كەلەدى, «سانامىز ىسىمىزدەن وزىپ ءجۇرۋى, ياعني ودان بۇرىن جاڭعىرىپ وتىرۋى ءتيىس», – دەپ ناقتى مىندەت قويعان ەلباسى رۋحاني جاڭعىرۋداعى ۇلتتىق بولمىسقا باسا نازار اۋدارىپ, بىرنەشە مىندەتتى ايقىنداپ بەردى. ۇلتتىق ءداستۇرىمىز بەن تاريحىمىزدى تابىستى جاڭعىرۋدىڭ العىشارتى ەتۋ الداعى جىلدارىمىزعا سەرپىن بەرەتىن يدەولوگيالىق باعىت رەتىندە قابىلدايمىن. عىلىمعا دا, مادەنيەتكە دە تاباندى ەڭبەكپەن ۇلەس قوسۋ زيالى قاۋىمىمىزدىڭ ەڭ ۇلكەن مىندەتى دەپ ويلايمىن.
سۇلتان ورازالين,
قازاقستاننىڭ ەڭبەك سىڭىرگەن قايراتكەرى
