كەزدەسۋ بارىسىندا باس باسىلىمنىڭ تىنىس-تىرشىلىگى, گازەتتە بولىپ جاتقان وزگەرىستەر مەن جاڭا جوبالار تۋرالى كەڭىنەن ءسوز بولدى.
«باۋىرجان مومىش ۇلىنىڭ «كەنشى دە, قويشى دا, عالىم دا, تراكتورشى دا, زيالى قاۋىم دا, ءبارى – ۇستازدان» دەگەن ءسوزى بار. سوندىقتان ۇستازدىڭ ءبىزدىڭ قوعامدا ءجونى دە, جولى دا بولەك. ويتكەنى ميلليونداعان ۇرپاق سىزدەردەن قاناتتانادى. اتا-انادان كەيىنگى قۇدىرەت تە – وسى ۇستازدار قاۋىمىندا», دەدى جيىن بارىسىندا گازەت شولۋشىسى سۇلەيمەن مامەت.
ءوز كەزەگىندە ءسوز العان ۇستازدار ۇجىمى ەل گازەتى «ەگەمەننەن» وقىعىسى كەلەتىن تاقىرىپتارى تۋرالى ويلارىن ورتاعا سالدى.
«مەن ەندى 15 جىلدان كەيىن مەكتەپكە مۇعالىم تابۋ قيىن بولا ما دەپ قورقامىن. نەگە دەسەڭىز, قازىرگى اتا-انالارىمىزدىڭ كوبىنىڭ ويى – بالالارىنىڭ گرانتقا ءتۇسۋى عانا. ءوزىنىڭ تاعدىر جولىندا تاڭداعان ماماندىعىنا ماحابباتپەن كەلمەگەسىن ودان جاقسى مۇعالىم شىقپايدى. قازىر مۇعالىمنىڭ ايلىعى كوتەرىلىپ جاتىر. كەي جەرلەرگە بارساق, ەلدىڭ ءبارى 20-30 پايىز قوسىلدى دەيدى. بۇل ءبىزدىڭ اي سايىنعى الاتىن جالاقىمىزعا ەمەس, بازالىققا عانا قوسىلدى. تاعى ءبىر ماسەلە وقۋدى ءبىتىرىپ كەلگەن جاس مامانداردىڭ الاتىن ايلىعى – شامامەن 80 مىڭ تەڭگە. جاس ماماندا پاتەر جوق. ەر بالالار ءبىر كوستيۋممەن جۇرە بەرەمىز. قىز بالالاردىڭ تۇتىناتىن زاتتارى كوپ. ودان بولەك, ءىشىپ-جەيتىن تاماعىنا, پاتەراقىسىنا, جارىق, سۋعا تاعى تولەيدى. مەنىڭ ويىمشا, ەڭ ءبىرىنشى مۇعالىمنىڭ مارتەبەسىن كوتەرۋ ءۇشىن جاس ماماندارعا ارناپ جاتاقحانا سالىپ بەرۋ كەرەك. مۇعالىمنىڭ ايلىعىن كوتەرسەك, تۇرمىستىق جاعدايىن جاقسارتساق قانا بۇگىنگى وقۋشىلار كەلەشەكتە مۇعالىم ماماندىعىنا ماحابباتپەن كەلەتىن بولادى», دەدى «ۇزدىك پەداگوگ» اتاعىنىڭ يەگەرى قابانباي بەكەت ۇلى.
جيىن سوڭىندا مەكتەپ ديرەكتورى روزا ابىلاكىمقىزى رايىمبەك باتىر اتىنداعى №50 «قازعارىش» مەكتەپ-ليتسەيىنىڭ مۇعالىمدەرى «ەگەمەن قازاقستان» گازەتىن كىتاپحانادان جازدىرىپ وقىپ جۇرگەندەرىن تىلگە تيەك ەتىپ, الداعى ۋاقىتتا رەداكتسيامەن بىرلەسە جۇمىس ىستەۋدى جالعاستىرا بەرەتىندەرىن جەتكىزدى.
راۋان قايدار,
«ەگەمەن قازاقستان»
