ءىس-شاراعا قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى ل.پروكوپەنكو, قر پارلامەنتى ءماجىلىسىنىڭ دەپۋتاتتارى, قحا مۇشەلەرى, عىلىمي-ساراپشىلىق كەڭەس پەن ەتنومادەني بىرلەستىكتەردىڭ مۇشەلەرى, ديپلوماتيالىق كورپۋستاردىڭ, حالىقارالىق ۇيىمداردىڭ, مەملەكەتتىك ورگانداردىڭ وكىلدەرى, نازارباەۆ ۋنيۆەرسيتەتتىڭ پروفەسسورلارى, وڭىرلىك قحا عىلىمي-ساراپشىلىق توپتارى مەن كافەدرالارىنىڭ مۇشەلەرى, جوعارى وقۋ ورىندارىنىڭ وكىلدەرى, قوعام قايراتكەرلەرى, عىلىمي جانە شىعارماشىلىق زيالى قاۋىم, ۇكىمەتتىك ەمەس ۇيىمدار مەن باق وكىلدەرى قاتىسۋدا.
وتىرىستىڭ ماقساتى – ورتالىق ازيا ايماعىنداعى ەتنوالەۋمەتتىك زاماناۋي ۇدەرىستەرى تۋرالى پىكىر الماسۋ; قوعامدىق سانانىڭ جاڭعىرۋ جاعدايىنداعى ەتنومادەني ديالوگتىڭ دامۋىنىڭ وزەكتى ترەندتەرىن انىقتاۋ.
وتىرىس جۇمىسىنىڭ نەگىزگى باعىتتارى: مەملەكەتتىك-ازاماتتىق, وڭىرلىك جانە ەتنيكالىق بىرەگەيلىكتى قالىپتاستىرۋ ۇردىستەرىن جاڭعىرتۋ; جاڭا الەۋمەتتىك جاعدايدىڭ فاكتورلارىن تالداۋ; ەتنودەموگرافيالىق ۇردىستەردىڭ وزەكتى ماسەلەلەرى; ميگرانتتاردىڭ بەيىمدەلۋى مەن بىرىگۋ ماسەلەلەرى; جاستار ەتنومادەني ديالوگتا; ورتالىق ازيا ەلدەرى بايلانىستارىنىڭ كەلەشەگى; ورتالىق ازيانىڭ تۇراقتى جانە بەيبىت دامۋ ماسەلەلەرى; اسەم "People to people" (ازيا-ەۋروپا فورۋمى) باستاماسىن ىسكە اسىرۋداعى قحا ءرولىن تالقىلاۋ.
ءىس-شارا مودەراتورى - قر پرەزيدەنتىنىڭ جانىنداعى مەملەكەتتىك باسقارۋ اكادەمياسى ورتالىق ازيا وڭىرىندەگى ەتنوسارالىق جانە كونفەسسياارالىق قاتىناستاردى زەرتتەۋ ورتالىعىنىڭ باسشىسى, قحا عسك ءتورايىمى, الەۋمەتتىك عىلىمدارىنىڭ دوكتورى ا.سادۋاقاسوۆا.
