وبلىس اكىمى ارحيمەد مۇحامبەتوۆ قوستاناي مەن الماتى وبلىسى اراسىنداعى ەكونوميكالىق بايلانىس كەڭەيىپ كەلە جاتقاندىعىن اتاپ ءوتتى. مىسالى, وتكەن جىلى الماتىعا 9 ميلليارد تەڭگەدەن استام سومانىڭ ءونىمى جىبەرىلدى. بۇل بۇرناعى جىلمەن سالىستىرعاندا 14 پروتسەنتكە كوپ. سونداي-اق, الماتىلىق بيزنەس وكىلدەرىنىڭ قوستانايعا جىبەرگەن ءونىمى دە وسى قارالاس بولادى.
ارحيمەد مۇحامبەتوۆ ىنتىماقتاسىپ وتىرعان ەكى وبلىستا شەكارالىق ءوڭىر ەكەنىن اتاپ ايتتى. الماتى وبلىسى قىتايمەن, قوستاناي رەسەيمەن شەكتەسەدى. مۇنىڭ ءوزى ەكى وبلىستىڭ دا نارىعىن كەڭەيتە تۇسەدى. بۇل قوس وبلىستىڭ مەموراندۋم بويىنشا ەكى جاقتى ينۆەستيتسيا سالۋىنا قولايلىلىق تۋعىزادى. ارحيمەد بەگەجان ۇلى رەسەيگە ينۆەستيتسيا سالاتىن الماتىلىق كاسىپكەرلەرگە قوستانايدا وكىلدىگىن اشۋىنا ۇسىنىس جاسادى. قوستاناي وبلىسىنىڭ الماتىلىقتارعا سۇرانىسىنا قاراي ۇسىنارى دا جەتكىلىكتى.
ء«بىز وزىمىزدە قۇراستىرىلىپ جاتقان تەحنيكا تۇرلەرىن, ناقتىراق ايتساق, تراكتورلار, كومبايندار جانە باسقا دا اۋىل شارۋاشىلىعى تەحنيكالارىن بەرە الامىز. وسى جىلى قۋاتتى زاماناۋي تسەمەنت زاۋىتى ىسكە قوسىلادى, سىزدەرگە قىتايمەن شەكاراداعى جاڭادان سالىنىپ جاتقان نۇركەنت قالاسىنىڭ قۇرىلىسى ءۇشىن ونىڭ ءونىمىن ارتۋعا دا بولادى» دەدى وبلىس اكىمى ارحيمەد مۇحامبەتوۆ. سونىمەن قاتار وبلىس اكىمى الماتىنىڭ اسەم تابيعاتى, كورىكتى جەرلەرىنە قوستانايلىقتاردى دەمالۋعا, اسىرەسە, جۇمىسشىلار مەن بيۋدجەت سالاسىنىڭ قىزمەتكەرلەرىن جىبەرۋگە بولاتىنىن ايتتى.
ال الماتى وبلىسىنىڭ اكىمى اماندىق باتالوۆ ءوزىنىڭ تۋعان جەرى قوستاناي وبلىسىنا كەلگەنىنە, اسىرەسە, ونىڭ كوركەيگەنىن, وسكەنىن كورىپ قۋانعانىن جاسىرمادى. الماتىلىق دەلەگاتسيا قوستاناي قالاسىنداعى مەملەكەت-جەكەمەنشىك ارىپتەستىگىمەن سالىنعان قۇرىلىستار, قالانى كوركەيتۋ جۇمىستارىنان وزىق تاجىريبە دە الۋدى ۇيعاردى.
ارينە, مەگوپوليس الماتى قالاسى تۇرعان وبلىستى قوستاناي وبلىسىمەن سالىستىرۋعا بولماس. ولاردا 6 يندۋستريالىق ايماق بار, ال قوستانايدا بىرەۋى ەندى سالىنىپ جاتىر. بىراق اماندىق باتالوۆ ينۆەستيتسيا تارتۋ جاعىنان قوستاناي وبلىسىنىڭ العا كەتكەنىن مويىندادى. قوستانايداعى يندۋستريالىق ايماقتىڭ ينۆەستورلار ءۇشىن سونشالىقتى قولايلى ەتىپ سالىنىپ جاتقانىنا جوعارى باعا بەردى.
الماتىلىق ارىپتەستەر قوستانايلىق ينۆەستورلارعا جەر تەلمىن بەرۋگە ۋادە ەتتى. وندا «بايان سۇلۋ» كونديتەر فابريكاسىنىڭ ساۋدا پاۆيلونى سالىناتىن بولادى. دەمەك «بايان سۇلۋدىڭ» كونديتەرلىك ءونىمى قازاقستاننىڭ وڭتۇستىك ايماعىنا شىعارىلۋى ءۇشىن مۇمكىندىك تۋاتىن بولادى. باتالوۆ سونىمەن قاتار قوستانايلىق كونديتەر فابريكاسى ءۇشىن قانتتى دا سول جەردەگى زاۋىتتان بەرۋگە ۋادە ەتتى. الماتىلىقتار قانت قىزىلشاسىنىڭ القاپتارىن كەڭەيتىپ جاتىر. وندا قوستانايدا قۇراستىرىلعان «بەلورۋس» تراكتورىن پايدالاناتىن بولادى. قوس وبلىستىڭ اكىمدەرى ىنتىماقتاستىق جونىندەگى مەموراندۋمعا قول قويدى. وندا كورسەتىلگەن نەگىزگى جۇمىس باعىتتارىن ناقتىلاي ءتۇسۋ ءۇشىن ەكى وبلىس اكىمدەرىنىڭ ورىنباسارلارىنا تاپسىرما بەرىلدى.
ءنازيرا جارىمبەت,
«ەگەمەن قازاقستان»
قوستاناي
