باتىس قازاقستان وبلىسىنىڭ ەكى وبلىستىق, 12 اۋداندىق گازەتتەرىن بىرىكتىرگەن «جايىق پرەسس» مەدياحولدينگىندە جۋرناليستەردىڭ ءبىلىمىن جەتىلدىرۋگە ارنالعان سەمينار-ترەنينگ ءوتتى. جەرگىلىكتى تىلشىلەر الماتىدان ارنايى شاقىرىلعان بەلگىلى مەدياترەنەر, سۇلەيمەن دەميرەل ۋنيۆەرسيتەتىنىڭ وقىتۋشىسى اسحات ەركىمبايدىڭ دارىستەرىن قىزىعا تىڭدادى.
- اسحات ەركىمباي - بەلگىلى مەدياترەنەر, بلوگەر, مۋلتيمەديا, جاڭا مەديا بويىنشا شەتەلدە تەرەڭ ءبىلىم العان, تىنىمسىز ەڭبەكتەنىپ, وسى تاقىرىپتارعا ارنايى وقۋلىق جازىپ جۇرگەن ايتۋلى مامان. بۇگىن اتتاي قالاپ, وزدەرىڭىز ءۇشىن ارنايى الدىرىپ وتىرمىز. الاتىن دəرىستەرىڭىز بارىنشا قىزىقتى, پايدالى بولىپ, بىلىمگە, ءوز قىزمەتىڭىزگە دەگەن قىزىعۋشىلىقتى ارتتىرادى دەپ سەنەمىن, - دەدى ەكىكۇندىك سەميناردى اشقان «جايىق پرەسس» مەدياحولدينگىنىڭ باس ديرەكتورى راۋان سəبيت ۇلى.
دارىسكە قاتىسقان جەرگىلىكتى تىلشىلەردىڭ پىكىرىنشە, سەمينار-ترەنينگ وتە قىزىقتى, كاسىبي پايدالى بولعان. ءوزارا پىكىر الماسۋ ويىن تۇرىندە ۇيىمداستىرىلعان دəرىسكە قاتىسۋشىلار بەلسەندى قاتىسىپ, كوپ تاجىريبە جيناقتاعان. سەرىكتەستىككە قاراستى 2 وبلىستىق جانە 12 اۋداندىق باسىلىمنىڭ 40-قا جۋىق ءجۋرناليسى «جاڭالىقتىڭ ساپاسىن انىقتاۋ جولدارى», «ينتەرنەتتە اقپارات ىزدەۋ جۇيەلەرىن جۋرناليست جۇمىسىندا بەيىمدەۋ», «مۋلتيمەديالى كونتەنت جاساۋ ادىستەرى» تاقىرىپتارىندا ءدارىس تىڭداپ, مەديانىڭ زاماناۋي جاڭالىقتارىنا قانىقتى.
- ورال ءوڭىرىنىڭ جۋرناليستەرىمەن العاش رەت كەزدەسىپ وتىرمىن. كەزدەسۋدىڭ ءبىرىنشى كۇنى New York-تەگى Stony Brook University كۋرسىنىڭ «مەديا ساۋاتتىلىق» ءمودۋلىنىڭ ءبىر تاراۋىنا ارنالدى. بىلتىر پوزنان ۋنيۆەرسيتەتىندەگى (پولشا) جيناعان تاجىريبەممەن ءبولىستىم. فاكتى مەن پىكىردىڭ ايىرماسى, جۋرناليستيكاداعى ءماتىننىڭ تۇرلەرى قاراستىرىلدى. ال ەكىنشى كۇن كوبىنە مۋلتيمەدياعا ارنالدى. اقپاراتتى ءتيىمدى ىزدەۋ جانە الەۋمەتتىك جەلىنى اقپارات كوزى رەتىندە قولدانۋ جاعىن تالقىلادىق. سوڭىنا قاراي ۆيزۋالدى كونتەنت جاساۋعا كىرىستىك. پراكتيكالىق تۇردەگى تاپسىرمانى قاتىسۋشىلار سوڭىنا دەيىن جاساپ ۇلگەردى. ارينە, بەرىلگەن التى ساعات ازدىق ەتتى. ونىڭ ۇستىنە ءۇش ءتۇرلى توپقا بولىنگەن سوڭ, اۋديتوريانىڭ دەڭگەيى دە ءارتۇرلى. نەگىزگى ماقسات – قاتىسۋشىلار اراسىندا جۋرناليسكە كەرەك داعدىنى قالىپتاستىرۋ, ءارى قاراي ىزدەنۋگە, ۇيرەنۋگە قاجەتتى رەسۋرستاردى تانىستىرۋ جانە ءوزارا ىنتىماقتاستىقتى ارتتىرۋ ەدى. بۇل «جايىق پرەسس» قولعا الىپ وتىرعان ۇلكەن جۇمىستىڭ باسى دەپ ۇعىپ وتىرمىن. ورال وڭىرىندەگى جۋرناليستيكانى جاڭا دەڭگەيگە كوتەرۋدى جۋرناليستەردىڭ باسىن قوسىپ, ترەنينگ وتكىزۋدەن باستاۋى دۇرىس شەشىم بولدى. مەدياحولدينگ باسشىسى راۋان ءسابيت ۇلىنا جانە ونىڭ كومانداسىنا ساتتىلىك تىلەيمىن! – دەيدى اسحات ەركىمباي.
جۋرناليست ماماندارىن دايىندايتىن ءداستۇرلى ورتالىقتاردان شالعاي جاتقان اق جايىق وڭىرىندە جەرگىلىكتى تىلشىلەردىڭ كاسىبي بىلىكتىلىگىن ارتتىرۋ, تەرەڭدەتۋ ءىسى وتە وزەكتى بولىپ تۇر. بۇل اسىرەسە مەملەكەتتىك باسىلىمداردا بايقالادى. سوندىقتان مۇنداي سەمينار-ترەنينگتەر بولاشاقتا دا ءجيى ۇيىمداستىرىلىپ تۇرماق.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
سۋرەتتى تۇسىرگەن
دينارا كەندىرباەۆا
