ايدىڭ باسىندا قازاقستاننىڭ باتىس بولىگىندە ىستىق (+35+43°س) ءارى قۇرعاق اۋا رايى ساقتالادى. دەگەنمەن, قازاقستاننىڭ وزگە وڭىرلەرىندە سولتۇستىك-باتىس اۋا اعىنىنا بايلانىستى قىسقا مەرزىمدى جاۋىن-شاشىن ساقتالادى, جەلدىڭ ءجيى-ءجيى سوعۋى مۇمكىن.
كەلەسى اپتانىڭ ورتاسىندا رەسپۋبليكانىڭ باتىسىنا قاراي جىلجىعان ءبىرشاما ىلعالدى ءارى جاڭا اۋا اعىنى اۋا تەمپەراتۋراسىنىڭ ازداپ تومەندەۋىنە سەپتىگىن تيگىزەدى. قازاقستان اۋماعىنىڭ قالعان بولىگىندە كۇننىڭ ىسۋىنا بايلانىستى ناعىز جازعى اۋا رايى ورناپ, اۋا تەمپەراتۋراسى سولتۇستىك وبلىستاردا +28+35°س, وڭتۇستىك وڭىرلەردە +35+43°س توڭىرەگىندە بولادى.
شىلدەنىڭ ەكىنشى ونكۇندىگىنىڭ باسىندا سولتۇستىك وڭىرلەردەگى بەلسەندى تسيكلوننىڭ ىقپالىنا بايلانىستى, كۇن جاۋىن-شاشىندى بولىپ, اۋا تەمپەراتۋراسى كليماتتىق نورمادان تومەندەۋى ىقتيمال. ايدىڭ ەكىنشى جارتىسىندا ەلدىڭ باستىسىندا نەگىزىنەن ىستىق ءارى قۇرعاق, ال شىعىستا سالقىنداۋ, جاڭبىرلى اۋا رايى بايقالادى. قورىتى ايتقاندا, باتىس قازاقستان, اتىراۋ, ماڭعىستاۋ, اقتوبە جانە قوستاناي وبلىستارىندا شىلدە ايىنداعى ورتاشا اۋا تەمپەراتۋراسى كليماتتىق نورمادان 1...2°س جوعارى, ال رەسپۋبليكانىڭ قالعان وبلىستارىندا نورماعا جۋىق بولادى.
باتىس قازاقستان, اتىراۋ, ماڭعىستاۋ, اقتوبە, قوستاناي, قىزىلوردا جانە تۇركىستان وبلىستارىندا جاۋىن-شاشىننىڭ ايلىق مولشەرى كليماتتىق نورمادان از, ال باسقا وڭىرلەردە نورماعا جۋىق بولادى. ايتا كەتەيىك, اۋا رايىنىڭ كونسۋلتاتيۆتىك بولجامىنا سينوپتيكالىق جاعدايدىڭ وزگەرۋىنە بايلانىستى, تۇزەتۋ ەنگىزىلىپ وتىرۋى مۇمكىن.
