ەگەر ازاماتتىڭ ەلەكتروندىق-تسيفرلىق قولتاڭباسى بولسا, مامانداندىرىلعان حالىققا قىزمەت كورسەتۋ ورتالىعى نەمەسە ءىىم تىركەۋ-ەمتيحان بولىمشەلەرىنە بارماي-اق,اۆتوكولىكتەرىن ەلەكتروندىق ۇكىمەت پورتالىندا راسىمدەي الادى.
«ۆەدومستۆوارالىق كوميسسيانىڭ اياسىندا ءبىز مەملەكەتتىك قىزمەتتەردى وڭتايلاندىرۋ جۇمىستارىن جۇرگىزۋدەمىز. اۆتوكولىكتەردى تىركەۋ قىزمەتىنە دەگەن سۇرانىس قارقىندى تۇردە ءوسىپ كەلە جاتقاندىقتان, ءبىز بۇل قىزمەتتى ەلەكتروندىق نۇسقاعا اۋىستىرۋ تۋرالى ۇسىنىس جاسادىق. بۇل جاڭاشىلدىق قىزمەت الۋشىلاردىڭ ۋاقىتىن ۇنەمدەپ قانا قويماي, سونداي-اق مامانداندىرىلعان حقو-داعى جۇكتەمەنى ازايتۋعا مۇمكىندىك بەرەدى. ماسەلەن, ءبىزدىڭ كورپوراتسيا ارقىلى بيىلعى بەس ايدا اۆتوكولىكتى تىركەۋ جانە قايتا تىركەۋ بويىنشا 745 592 قىزمەت كورسەتىلدى», - دەدى «ازاماتتارعا ارنالعان ۇكىمەت» باسقارماسىنىڭ توراعاسى ابىلايحان وسپانوۆ.
پورتال ارقىلى ءوتىنىم بەرگەندە, ەشقانداي قۇجاتتىڭ سكان-نۇسقاسىن ۇسىنۋدىڭ قاجەتى جوق, سەبەبى قاجەتتى مالىمەتتەردىڭ بارلىعى اقپاراتتىق جۇيەلەر ارقىلى الىنادى.
«بۇعان دەيىن كولىكتى ساتۋشى مەن ساتىپ الۋشى ءوتىنىم بەرۋ ءۇشىن ءبىر ۋاقىتتا «ازاماتتارعا ارنالعان ۇكىمەتتىڭ» فرونت-وفيسىنە بارىپ, قاجەتتى قۇجاتتاردى تاپسىرۋى ءتيىس ەدى. ەندى ازاماتتار ءوتىنىمدى ۇيدەن شىقپاي-اق, ونلاين تارتىپتە جولداي الادى. ەلەكتروندىق ۇكىمەت پورتالى ارقىلى ءبىز الداعى ۋاقىتتا تاعى دا ءبىراز مەمەلكەتتىك قىزمەتتەردى الۋ پروتسەسىن جەڭىلدەتپەكپىز», - دەيدى «ۇلتتىق اقپاراتتىق تەحنولوگيالار» اق باسقارما توراعاسى اسەت تۇرىسوۆ.
قىزمەتتى ونلاين الۋ ءۇشىن egov.kz پورتالىندا اۆتوريزاتسيادان ءوتىپ, ساتىلاتىن كولىك جايلى اقپاراتتى ەنگىزىپ, ايىپپۇلدار مەن سالىق تولەمدەرىن, تەحنيكالىق جاعدايىنتەكسەرۋگە سۇرانىس جولداۋ كەرەك. ەگەر قارىزدار بولسا, ەلەكتروندىق پورتال ارقىلى وتەۋگە بولادى. مۇنان كەيىن اۆتوكولىكتى ساتىپ الۋشى ازامات ەلەكتروندىق ۇكىمەت پورتالىنداعى جەكە كابينەتى ارقىلى ساتۋشى قالدىرعان وتىنىممەن تانىسىپ, ايىپپۇلداردى تەكسەرگەننەن كەيىن ءنومىر بەلگىسىنە, كولىك قۇرالىن تىركەۋگە جانە تىركەۋ تۋرالى كۋالىككە تولەم جاساي الادى. ساتىپ الۋشى ءوزىنىڭ ەتسق-مەن سمارت-كەلىسىمدى راستاعان سوڭ مامانداندىرىلعان حقو-عا ءنومىر بەلگىسىن الىپ كەتۋ ءۇشىن عانا كەلەدى. سونداي-اق ءنومىردى ۇيگە جەتكىزۋ قىزمەتىنە دە تاپسىرىس بەرۋگە بولادى.
ەسكە سالا كەتەيىك, بيىلعى مامىر ايىنان باستاپ قر ءىىم اۆتوكولىكتى تىركەۋ كەزىندەگى سالىستىرۋدى الىپ تاستاعان بولاتىن. ەندى ەسەپتەن شىعارۋ نەمەسە كولىكتى تىركەۋ كەزىندە نومىرلىك اگرەگاتتى تەكسەرتۋدىڭ قاجەتى جوق. مۇنداي تالاپ تەك كولىكتى العاشقى رەت تىركەگەندە قويىلادى. سونداي-اق جۇرگىزۋشى كۋالىگىنىڭ مەرزىمى وتكەنگە دەيىن اۋىستىرۋ نەمەسە جوعالتىپ العان جاعدايدا مەديتسينالىق تەكسەرىستەن ءوتۋدىڭ جانە پسيحياتر, ناركولوگتان انىقتاما اكەلۋدىڭ قاجەتى جوق. ال ازاماتتىڭ ەتسق-سى بولسا, جۇرگىزۋشى كۋالىگىن ەلەكتروندىق ۇكىمەت پورتالى ارقىلى ونلاين تارتىپتە اۋىستىرۋعا بولادى.
