قاراعاي مەن سامىرسىنى جايقالىپ وسكەن نۋ ورمان ىشىندەگى دەمالىس بازاسى الىستان كوز تارتادى. قاز-قاتار ورنالاسقان اعاشتان ءورىپ سالىنعان بىرنەشە تۇرعىن ءۇي, 250 ادامعا ارنالعان اپپاق شاتىر, باسسەين, سپورت الاڭدارى «ەلىم-اي» دەمالىس بازاسىنىڭ كوركى. ديرەكتورى ساۋلە وسپانوۆا اۋداننان كەلگەن وقۋشىلاردى جىلى قارسى الدى. ءبىز وسى جەردەن اۋدان اكىمى داۋلەت باتىرباەۆتى, اۋداندىق وقۋ ءبولىمى باستىعىنىڭ مىندەتىن اتقارۋشى سۆەتلانا حايداروۆا, بەرەزوۆكا ورتا مەكتەبىنىڭ ديرەكتورى ەرلان قورعانباەۆتى جولىقتىردىق.
– بۇرىن اۋداننىڭ وقۋشىلارى 650 شاقىرىم جەردەگى الاكولدىڭ جاعاسىنداعى ء«ۇرجارايىم» دەمالىس بازاسىندا دەمالۋشى ەدى. اۋداندىق ءماسليحات دەپۋتاتتارىمەن كەلىسىپ, تاياق تاستام جەردەگى سەمەي قالاسىنىڭ ماڭىنداعى نۋ ورماندا قونىس تەپكەن «ەلىم-اي» دەمالىس بازاسىندا تۇڭعىش رەت دەمالىس لاگەرىن ۇيىمداستىرۋدى شەشتىك. وعان اۋداندىق بيۋدجەتتەن 8 ميلليون تەڭگە قاراستىرىلدى. وسى جولى 60 بالا كەلدى. كۇزگە دەيىن تاعى 250 بالا دەمالادى. ولارعا بەس ۋاقىت تاعام بەرىلەدى. دەمالىس بازاسىنىڭ ديرەكتورى ساۋلە نەسىلحانقىزىنا العىسىمىزدى ايتامىز, ول بىزگە تۇسىنىستىكپەن قارادى. ءبىر كۇنگى بەس ۋاقىت تاعامى, توسەك-ورنى, باسسەينگە تۇسۋىنە 5500 تەڭگە تولەۋ كەرەك بولسا, ونى 45 پايىزعا ازايتتى. مۇندا كۇنكورىسى تومەن وتباسىلاردىڭ بالالارى, مۇمكىندىگى شەكتەۋلى بالالار, وقۋدا, سپورتتا جوعارى ناتيجەگە جەتىپ جۇرگەندەر ءبىرىنشى كەزەكتە دەمالادى, – دەدى اۋدان اكىمى داۋلەت باقىت ۇلى.
ەلباسىنىڭ قازاقستان حالقىنا جولداۋىندا ءتۋريزمدى دامىتۋ جونىندە ناقتى تاپسىرما بەرىلگەنى بەلگىلى. «ەلىم-اي» دەمالىس بازاسىنا تەك سەمەي قالاسى ەمەس, وبلىستىڭ باسقا اۋداندارىنان دا دەمالۋشىلار كەلمەك. اۋاسى تازا, ادام اعزاسىنا پايدالى ورمان ىشىندە دەمالعانعا نە جەتسىن؟! سوڭعى جىلدارى بۇل جەردە ادامدار دەمالاتىن ورىن, باسسەين, سالىندى. بالالاردىڭ الاڭسىز دەمالۋىنا بارلىق جاعداي جاسالدى. ۆولەيبول, باسكەتبول, فۋتبول الاڭدارى بار. بۇگىنگە دەيىن ءار وترياد ۆولەيبول, باسكەتبول, سۋعا جۇزۋدەن جارىس وتكىزدى. جەڭىمپازدارعا سىيلىق بەرىلدى. ءبىز ءار وقۋشىنىڭ ءبىر كۇندىك دەمالىسىنا 3 مىڭ تەڭگەدەن الدىق, – دەيدى «ەلىم-اي» دەمالىس بازاسىنىڭ ديرەكتورى س. وسپانوۆا.
ءار وتريادتىڭ بالالارىنا تەگىن كيىم بەرىلگەن. اق, كوك, سارى ءتۇستى كيىم كيگەن بالالارعا قاراپ, ولاردىڭ قاي مەكتەپتەن كەلگەنىن انىقتاۋعا بولادى. ولار اعىلشىن ءتىلىن ۇيرەنىپ, سپورتتىق جارىستارعا قاتىسۋدا. ءار وتريادتىڭ بالالارى سپەكتاكل قويىپ, ءوز ونەرلەرىن ورتاعا سالادى. ورمان ىشىندە سەرۋەندەۋ جانعا شيپا. اۋداندىق ءبىلىم ءبولىمى باستىعىنىڭ مىندەتىن اتقارۋشى س.حايداروۆانىڭ ايتۋىنشا, ون كۇن سايىن مەكتەپتىڭ ديرەكتورلارى, اعىلشىن ءتىلىنىڭ ماماندارى اۋىسىپ تۇرادى ەكەن. وقۋشىلار تاڭەرتەڭ ساعات 9.00-دە ۇيقىسىن قاندىرىپ تۇرعان سوڭ دەنە قيمىلىن جاسايدى. باسسەينگە تۇسەدى. بالالاردىڭ دەنساۋلىعىن تەكسەرىپ تۇراتىن دارىگەرلەر بار.
بەسقاراعاي اۋدانىنداعى 21 مەكتەپتە 3600 وقۋشى بار. ارينە ولاردىڭ بارلىعىنىڭ دەمالىس بازاسىندا دەمالۋىنا مۇمكىندىك شامالى. الايدا, اتا-انالار ءوز قارجىلارىنا بالالارىن دەمالدىرىپ جاتىر. وقۋشى جازى كوڭىلدى وتسە, شاكىرتتەردىڭ جاڭا وقۋ جىلىنا تىڭ كۇشپەن كەلەتىنى ءسوزسىز.
وڭداسىن ەلۋباي,
جۋرناليست
شىعىس قازاقستان وبلىسى,
بەسقاراعاي اۋدانى
