جيىنعا «قازاقستاننىڭ ماشينا جاساۋشىلار وداعى» زتب باسقارما توراعاسى مەيرام پىشەمباەۆ پەن ينۆەستيتسيالار جانە دامۋ مينيسترلىگى يندۋستريالدى دامۋ جانە ونەركاسىپتىك قاۋىپسىزدىك كوميتەتىنىڭ توراعاسى الماس باتانوۆ قاتىسىپ, اتالعان سالاداعى اتقارىلىپ جاتقان جۇمىستاردى باياندادى. بەلگىلى بولعانداي, بيىلعى جىلدىڭ ءبىرىنشى جارتىجىلدىعىندا ماشينا جاساۋ ءوندىرىسىنىڭ كولەمى 12,2 پايىزعا ارتقان.
− قازاقستاننىڭ ماشينا جاساۋ سالاسى 2015-2016 جىلدارى دامۋدىڭ كۇردەلى كەزەڭدەرىنەن ءوتىپ, بىلتىردان بەرى ءوسىم ديناميكاسىن كورسەتىپ كەلەدى. ىلگەرىلەۋشىلىك اسىرەسە اۆتوكولىك جاساۋ سالاسىندا بايقالىپ وتىر, – دەدى ا.باتانوۆ. ونىڭ ايتۋىنشا, ءوندىرىستىڭ كۇرت وسۋىنە نارىقتاعى سۇرانىستىڭ قالپىنا كەلۋى, ەكسپورتتىق نارىقتاردىڭ كەڭەيۋى, سونداي-اق اۆتوكولىك سەكتورىنىڭ دامۋىنا وڭ اسەرىن تيگىزەتىن جەڭىلدەتىلگەن اۆتونەسيە بەرۋ باعدارلاماسى ىقپال ەتىپ وتىر.
2017 جىلى ءار ءۇشىنشى ساتىلعان اۆتوموبيل وتاندىق كاسىپورىنداردا شىعارىلعان. 2018 جىلدىڭ 5 ايىنىڭ قورىتىندىسى بويىنشا اۆتوموبيل جاساۋ وندىرىسىنەن تۇسكەن پايدا 71,5 ملرد تەڭگەنى قۇرادى, – دەپ اتاپ ءوتتى كوميتەت توراعاسى.
ەلىمىزدە وتكەن جىلى 19,5 مىڭ اۆتوموبيل شىعارىلسا, بيىلعى جىلدىڭ 4 ايداعى كورسەتكىشى بويىنشا 9 مىڭ وتاندىق تەمىر تۇلپار ساۋدا نارىعىنا قويىلعان. ال جىلدىق جوسپار بويىنشا شامامەن 35 مىڭ كولىك شىعارۋ كوزدەلىپ وتىر. ايتا كەتەرلىگى, وتاندىق اۆتووندىرۋشىلەر سىرتقى نارىققا شىعىپ, باسەكەگە قابىلەتتىلىكتى ارتتىرۋدى كوزدەيدى. بىلتىر ەكسپورتتالعان 1548 اۆتوكولىكتىڭ باسىم كوپشىلىگى قىتايعا جىبەرىلگەنى انىقتالىپ وتىر. بۇدان بولەك, ەلەكتروتەحنيكالىق ماشينا جاساۋ وندىرىسىندەگى, اتاپ ايتقاندا, ترانسفورماتورلار, اككۋمۋلياتورلار, كابەلدى-وتكىزۋشى ونىمدەر جانە تاعى باسقالارى جوعارعى سۇرانىسقا يە.
ايتا كەتەرلىگى, «قاينار-اكب» جشس ءوندىرىسىنىڭ 50%-دان استامى ەكسپورتتىق نارىققا جىبەرىلىپ وتىر. بۇعان قوسا, «Alageum Electric» اق قازاقستانداعى ترانسفورماتورلار وندىرەتىن 4-ءشى زاۋىت سالىنىپ جاتىر. بىراق ماشينا جاساۋ ونەركاسىبىندەگى قازاقستاندىق ۇلەس ازىرگە 30 پايىزدان اسپاي تۇر. ال دامىعان مەملەكەتتەردە بۇل كورسەتكىش 50 پايىزدان كوپ.
ماسەلەنى شەشۋ ءۇشىن قازىر 2019-2030 جىلدارعا ارنالعان سالانى دامىتۋدىڭ كەشەندى جوسپارى ازىرلەنىپ جاتىر. باستى ماقسات – وتاندىق تاۋار وندىرۋشىلەردى قولداپ, ەكسپورتقا نەگىزدەلگەن ءونىم شىعارۋ. ارينە وندىرىسكە تسيفرلاندىرۋدى ەنگىزۋ دە ماڭىزدى مىندەتتىڭ ءبىرى. م.پىشەمباەۆتىڭ ايتۋىنشا, بۇگىنگى تاڭدا كەيبىر جەكە كومپانيالار ءوندىرىستى اۆتوماتتاندىرىپ, روبوتتاردى ەنگىزۋدە. مىسالى ءبىر تەحنولوگيالىق كەشەن 50-80 ادامدى الماستىرىپ وتىر. وسىلايشا ەڭبەك ونىمدىلىگىن ارتتىرىپ ءارى ساپالى ونىمگە قول جەتكىزۋگە بولادى.
ەركەجان ايتقازى,
«ەگەمەن قازاقستان»
