ەلباسى نۇرسۇلتان نازارباەۆتىڭ جارلىعىمەن 1 شىلدە ۇلتتىق دومبىرا كۇنى بولىپ بەكىتىلگەن بولاتىن. قازاقتىڭ ءتول اسپابىن جالپىۇلتتىق دەڭگەيدە اسپەتتەيتىن جاڭا مەيرامنىڭ بولعانىنا مادەنيەت جانە سپورت مينيسترلىگىنە قاراستى جوعارى وقۋ ورىندارى جانە ونەر ۇجىمدارى ريزاشىلىقتارىن بىلدىرۋدە. بۇل جونىندە پروفەسسور, قازاقستاننىڭ ەڭبەك سىڭىرگەن ءارتىسى, قازاق ۇلتتىق ونەر ۋنيۆەرسيتەتىنىڭ پرورەكتورى تۇرار الىپباەۆ, قازاقستاننىڭ ەڭبەك سىڭىرگەن قايراتكەرى, قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەسترىنىڭ ديرەكتورى نۇرقيسا داۋىشەۆ, كۇيشى, قازاقستاننىڭ ەڭبەك سىڭىرگەن ءارتىسى, قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورى ايگۇل ۇلكەنباەۆا باياندادى.
مەملەكەت باسشىسى «ۇلتتىق دومبىرا كۇنىن بەكىتۋ تۋرالى» 2018 جىلعى 12 ماۋسىمداعى № 699 جارلىعىنا قول قويدى. ەلباسىنىڭ وسى جارلىعىن قولداۋ ماقساتىندا الماتىدان ارنايى احمەت جۇبانوۆ جانە كۇلاش بايسەيىتوۆا اتىنداعى مامانداندىرىلعان مەكتەپتەرىنەن 500 دارىندى وقۋشى دومبىراشىلار استاناعا ات باسىن تىرەمەك. قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەسترىنىڭ حالىقارالىق, رەسپۋبليكالىق بايقاۋلاردىڭ 90 لاۋرەات دومبىراشىسى جانە ن.تىلەنديەۆ اتىنداعى اكادەميالىق فولكلورلى-ەتنوگرافيالىق «وتىرار سازى» وركەسترىنەن 70 ادام ارنايى كەلىپ قاتىسپاقشى. سونىمەن قاتار قۇرمانعازى اتىنداعى قازاق ۇلتتىق كونسەرۆاتورياسىنان 200 ۇستاز بەن ستۋدەنت, قازاق ۇلتتىق ونەر ۋنيۆەرسيتەتىنەن 500 جاس ونەرپاز دومبىراشى قاتىسادى.
1 شىلدە كۇنى ساعات 12:00-دە «قازاق ەلى» مونۋمەنتىنىڭ الاڭىندا مەرەكەلىك كونتسەرت جانە «دومبىرا – اسىل مۇرا» كوپشىلىك سەرۋەندەرى وتەدى.
