اۋىلدىڭ يەسى وبلىستىق ءماسليحاتتىڭ دەپۋتاتى الەكساندر كاسيتسين. تاڭقالدىرعان شارۋاشىلىق. وسى جەردى وتانىم, ەلىم دەگەن اۋىلدا ءوسكەن نەمىس, ورىس, ۋكراين ۇلتى وكىلدەرى تۇرادى. سەرىكتەستىك 1998 جىلى قۇرىلعان. 2004 جىلدارى سەرىكتەستىكتە 5 مىڭعا جۋىق قارا مال, 200 شوشقا, 300 جىلقى, 4 مىڭداي قۇس بولدى. ينكۋباتور جۇمىس جاسادى. اسىل تۇقىمدى مال وسىرەتىن شارۋاشىلىق اتالعان سوڭ, ءسۇتتى مول بەرەتىن ءىرى قارانىڭ سيممەنتال تۇقىمى جانە قازاقتىڭ اق باس سيىرلارىن وسىرە باستادى. ءسويتىپ, شارۋاشىلىقتاعى ءىرى قارا مال تۇقىم ەرەكشەلىكتەرىنە وراي, ەليتا-رەكوردتى, ءبىرىنشى ەليتالىق كلاسس باعالارىن دا الىپ ۇلگەردى.
«مۇنداي باعاعا ءبىز مال شارۋاشىلىعىنا وزىق تەحنولوگيالاردى ەنگىزۋ جانە ءىسىمىزدى دۇرىس ۇيىمداستىرۋ ارقىلى قول جەتكىزدىك» دەيدى شارۋاشىلىق باسشىسى.
مۇندا ءاربىر جاڭا تۋعان ءتول ەرەكشە كۇتىمگە الىنادى. سودان كەيىن تۇقىم ەرەكشەلىكتەرىنە ساي كۇتىپ-باعىلىپ, جەم-ءشوپتىڭ ارنايى قۇرامى بويىنشا ازىقتاندىرىلدى.ءۇش ادامعا 300 باس سيىر بولىنەدى. مال قورالارى كەڭ دە جارىق, تازا. جۇمىستىڭ ءبارى مەحانيكا كۇشىمەن اتقارىلدى. مالعا كادىمگى سۋ جىلىتىپ بەرىلەدى. سوڭىندا وسىنداي كۇتىمدە باعىلعان مالدىڭ تىرىدەي ورتا سالماعى 400 كيلودان كەم بولمايدى ەكەن.
سەرىكتەستىكتە 3489 ءسۇت بەرەتىن ءىرى قارا مال, 643 جىلقى, 400 شوشقا, 5 مىڭداي قاز وسىرىلەدى. جىلىنا 412 توننا ءسۇت, 519 توننا ەت وندىرىلەدى. مال باسىنان جىلىنا 1087 بۇزاۋ, 158 ق ۇلىن الىنسا, ينكۋباتوردان 20 مىڭداي قاز بالاپاندارى ءوسىپ شىعادى.
وسىنداعى, تاۋلىگىنە 30 توننا ءسۇت وندىرەتىن «كلەۆەر» اتتى قوندىرعى, ول ءسۇتتىڭ قۇرامىن تەكسەرىپ, بەس ءمينوت ىشىندە ونىڭ تازالىعىن, مايلىلىعىن انىقتاپ بەرەدى. مال قورالارى, مال سەمىرتۋ الاڭدارى, جەم-ءشوپ تسەحتارى, مالدارىگەرلىك بولىمشە, ينكۋباتور, اۆتوگاراج, قىرمان, قويمالارى, ەلەكتر تسەحتارى, اعاش شەبەرحاناسى قاز-قاتار تىزىلگەن الىپ كەشەندى قۇرايدى. اينالادا شاشىلىپ جاتقان ءبىر بۇراۋ جوق, تاپ-تازا. قالادا اسفالت ۇستىندە جۇرگەندەيسىڭ. سەرىكتەستىك 22,6 مىڭ گەكتار جەرگە ءجۇگەرى, كۇنباعىس, تارى, قاراقۇمىق, بيداي, باسقا دا استىق داقىلدارىن سەۋىپ, جاز بويى باپتاپ وسىرەدى. شەتەلدىك تەحنيكانىڭ ەگىن ەگەتىن, جۇگەرى جينايتىن كانادالىق دەيسىز بە, نەمىستىكى دەيسىز بە ءتۇر-ءتۇرى, 132 تراكتورى, 110 ءماشينەسى, 66 جۇگەرى جينايتىن كومبايندارى, كانادالىق ەگىن سالۋ كەشەندەرى بار. جەرگە اسا ءبىر ۇقىپتىلىقپەن قارايدى. ۋاقىتىلى تىڭايتقىشتارمەن تىڭايتىلىپ, قار توقتاتىلىپ تۇرادى. بۇكىل اۋىل تۇرعىندارى وسى شارۋاشىلىقتا ەڭبەك ەتەدى.
ءسۇت فەرماسى – جاڭا جوبا
مۇنداعى بارلىق تىرلىك اۆتوماتتاندىرىلعان. وتكەن جىلى جەلتوقسان ايىندا «گاليتسكوە» سەرىكتەستىگىندە «قازاگروقارجى» اق ارقىلى ينۆەستيتسيالىق جوبا شەڭبەرىندە 500 ساۋىن سيىرعا ارنالعان تاۋارلى ءسۇت فەرماسى اشىلدى. فەرمانىڭ جوبالىق قۋاتى زاماناۋي ستاندارتتارعا ساي جىلىنا 2000 تونناعا دەيىن ءسۇت وندىرۋگە ءمۇمكىندىك بەرەدى. تاۋارلى ءسۇت فەرماسىنا «اگراليز» اتالاتىن مال تۇراتىن ورىن, «ەلوچكا» اتتى ساۋىلاتىن الاڭشا, «براتسلاۆ» اتتى قۇرال-جابدىقتارى جيناقتالىمى گەرمانيانىڭ, ۋكراينانىڭ ەڭ جاڭا تەحنولوگيالارىمەن قامتىلعان. وسى جوبانىڭ ىسكە اسىرىلۋى ارقاسىندا قوسىمشا 13 تۇراقتى جۇمىس ورنى اشىلىپ, ءسۇت ءوندىرىسىنىڭ كولەمى ۇلعايدى. جوبانىڭ قۇنى 415,8 ملن. تەڭگە. ساۋىلعان ءسۇت وبلىس ورتالىعىنداعى «پاۆلودارمولوكو» اق-قا كۇندەلىكتى جەتكىزىلەدى. قازىرگى تاڭدا فەرمادا العاش بۇزاۋلايتىن 300 قۇناجىن بار, الداعى ۋاقىتتا ولاردى 500 باسقا دەيىن جەتكىزۋ جوسپارلانۋدا. ولار جىل بويى بايلاۋسىز, جايىلىمسىز-اق, قىسى-جازى كەشەن ىشىندە تازا جەردە باعىلادى. جەم-ءشوپ, جەم جانە ءسۇرلەم بەرىلەدى. مالعا قىزمەت كورسەتۋشىلەر فەرما مەڭگەرۋشىسى, 4 ساۋىنشى, 4 مالشى, 1 تەحنيك-ۇرىقتاندىرۋشى, 1 جيىستىرۋشى, زووتەحنيك, مال دارىگەرىنەن تۇرادى. سوندا 500 مالعا بار-جوعى ونشاقتى ادام قارايدى. الداعى ۋاقىتتا زاماناۋي بۇل ءسۇت-تاۋارلى فەرماسى ءونىم ءوندىرىسىن ۇلعايتادى, شىعىنداردى ازايتادى, ەڭبەك ءونىمدىلىگىن ارتتىرادى دەپ جوبالانىپ وتىر. مالدى دا تەحنيكا, كومپيۋتەر باسقارعان زامان دەگەنىمىز مىنە, وسى. بار بولعانى 4 ساۋىنشى باسقارۋ تەتىگىندە وتىرىپ, اۆتوماتتى قولدانۋ ارقىلى 500 سيىردان ءبىر ساتتە-اق ءسۇت ساۋىپ الادى.عاجايىپ قالاشىق
الەكساندر كاسيتسين باسقاراتىن «گاليتسكوە» جاۋاپكەرشىلىگى شەكتەۋلى سەرىكتەستىگىنە قاراستى اۋىل وركەنيەتتى. مۇندا ءبارى دە قالاداعىداي. اۋىل شەتىندەگى تاۋارلى ءسۇت فەرماسىنىڭ قاز-قاتار تىزىلگەن كەشەندەرى دە ادەمى كورىنىس بەرىپ تۇر. «وسىنداي جاڭا زامان اۋىلىن جاساۋ, سۋى كوككە شاشىرايتىن فونتاندار ورناتۋ, مەنىڭ بالا كەزگى ارمانىم ەدى, كورىپ تۇرعاندارىڭىزداي سول ارمان جۇزەگە اسقانداي» دەيدى الەكساندر. اۋىلدا مادەنيەت ءۇيى, ورتالىق مۇراجاي, ەمحانا, ءزاۋلىم مەكتەپ, ماڭايى باۋ-باقشاعا تولىپ تۇرعان اق شاڭقان ءساندى ۇيلەر, شاشتاراز, مونشا, سپورتتىق ورتالىق جۇمىس ىستەيدى. دارىگەرلىك امبۋلاتوريادا كۇندىز كەلىپ جاتىپ ەمدەلەتىن بولمەلەر بار. ۋچاسكەلىك پوليتسيا جانە ءۇش قوعامدىق ساقشى اۋىلدىقتار تىنىشتىعىن قورعايدى. گاليتسكوەدا ءبارى وزىندە. اناۋ-مىناۋ ىزدەپ قالاعا بارۋدىڭ قاجەتى دە جوق. مادەنيەت ءۇيى مەن بالالار ورتالىعىنىڭ الدىندا ءمولدىر سۋلى فونتاندار اتقىلاپ تۇر. اينالا تازا. ءاسفالتتى ءتۇزۋ كوشەلەر. بارلىعىنا شامدار تارتىلعان. ال, كەشكىلىك اۋىل كىشىگىرىم جارقىراعان قالاشىقتى كوزگە ەلەستەتەدى. ناۋبايحاناسى, ماكارون تسەحى, توقاشتار, تاتتىلەر ءپىسىرەتىن كونديتەر تسەحى اۋىلدىقتار قاجەتىن وتەۋدە. القاپ-القاپ ەگىن, جەيتىن نانى وزىنىكى, بيداي دەگەنىڭ جەتەدى, ارتىلعانىن ساتادى. جۇگەرى, قاراقۇمىق, كۇنباعىستان مول ءونىم الادى. وتكەن جىلدارى ەكى-ۇشتەن ءۇش-ءتورت پاتەرلى تۇرعىن ۇيلەر سالىپ الدى. بۇل ءۇردىس الداعى ۋاقىتتا دا جالعاسادى. وت جاقپايدى. ورتالىقتاندىرىلعان جىلۋ جۇيەسى بار, سۋ ۇيگە كەلىپ تۇرادى. قالاداعىداي كوممۋنالدىق قىزمەت اقىسىن ءتولەيدى. جىلىنا 7 مىڭ توننا كومىر جاعادى. اۋىل اكىمى كەڭەس جاندوسوۆتىڭ ايتۋىنشا گاليتسكوەدا 2 مىڭداي ادام, ونىڭ ىشىندە, 105 قازاق, 615 ورىس, 402 ۋكراين, 212 نەمىس, 258 ءارتۇرلى ۇلت وكىلدەرى تۇرادى. تاتۋ-تىرلىكتى, بىرلىگى جاراسقان اۋىل دەپ وسىنى ايت. فاريدا بىقاي. پاۆلودار وبلىسى, ۋسپەن اۋدانى.
