قازاقستاندىق دەلەگاتسيانى سىرتقى ىستەر ءمينيسترىنىڭ ورىنباسارى رومان ۆاسيلەنكو, ال شۆەيتساريالىق دەلەگاتسيانى شۆەيتساريا فەدەرالدىق سىرتقى ىستەر مينيسترلىگى مەملەكەتتىك حاتشىسىنىڭ ورىنباسارى كريستينا مارتي لانگ باسقاردى.
تاراپتار كەزدەسۋدە ەكى ەل اراسىنداعى ديپلوماتيالىق قارىم-قاتىناستىڭ شيرەك عاسىردا قول جەتكىزىلگەن ساياسي جانە ەكونوميكالىق ىنتىماقتاستىق دەڭگەيىن جوعارى باعالاپ, ءتيىمدى ارىپتەستىكتى ودان ءارى دامىتۋعا دەگەن ءوزارا نيەتىن راستادى. شۆەيتساريا فەدەرالدى پرەزيدەنتى دوريس ليويتحاردتىڭ 2017 جىلدىڭ تامىز ايىندا استاناعا جاساعان ساپارى جانە ونىڭ قازاقستان پرەزيدەنتى نۇرسۇلتان نازارباەۆپەن وتكىزگەن كەلىسسوزدەرى قاتىناستاردىڭ دامۋىنا ايتارلىقتاي سەرپىن بەرگەنى جانە ىنتىماقتاستىقتىڭ باسىم باعىتتارىن انىقتاعانى اتاپ ءوتىلدى.
وسىعان بايلانىستى بەرندەگى كەلىسسوزدەردىڭ بارىسىندا قارجى, فارماتسەۆتيكا, ەنەرگەتيكا سالالارىنداعى ساۋدا-ەكونوميكالىق ىنتىماقتاستىقتى نىعايتۋعا جانە وڭىرلەر اراسىنداعى ارىپتەستىكتى دامىتۋعا ەرەكشە كوڭىل ءبولىندى. بۇگىندە شۆەيتساريا قازاقستانداعى ءۇشىنشى ءىرى شەتەلدىك ينۆەستور بولىپ تابىلادى.
ك.لانگ ەكونوميكالىق ىنتىماقتاستىقتىڭ ەكىجاقتى شارتتىق بازاسىنىڭ تيىمدىلىگىن, ۇكىمەتارالىق كوميسسيا جانە ىسكەرلىك كەڭەس سياقتى ءوزارا ءىس-قيمىلدىڭ ءتيىستى تەتىكتەردىڭ بولۋىن اتاپ ءوتتى جانە شۆەيتساريانىڭ وسى باعىتتى جانداندىرۋعا, ناقتىسىن ايتقاندا حالىقارالىق كولىكتىك-ينفراقۇرىلىمدىق جوبالاردى ىسكە اسىرۋعا ۇمتىلىسىن ءبىلدىردى.
ر.ۆاسيلەنكو شۆەيتساريا تاراپىن الداعى ۋاقىتتاعى ەلوردانىڭ 20 جىلدىعى اتاپ وتىلەتىنىن, ونىڭ اياسىندا «استانا» حالىقارالىق قارجى ورتالىعىنىڭ سالتاناتتى اشىلۋى بولاتىنىن حاباردار ەتتى.
كەزدەسۋدە استانادا وتكەن ورتالىق ازيا ەلدەرى باسشىلارىنىڭ (كونسۋلتاتيۆتىك) جۇمىس كەزدەسۋىنىڭ قورىتىندىلارىن قوسا العاندا ورتالىق ازيا ەلدەرى اراسىنداعى قارقىندى دامىپ كەلە جاتقان ديالوگقا قولداۋ ءبىلدىرىلدى, سونداي-اق اۋعانستانداعى جاعدايدى تۇراقتاندىرۋعا جاردەمدەسۋ بويىنشا حالىقارالىق كۇش-جىگەر تالقىلاندى. وسىعان بايلانىستى قازاقستاننىڭ 2017-2018 جىلدارداعى بۇۇ قاۋىپسىزدىك كەڭەسىنىڭ مۇشەسى رەتىندەگى ۇلەسى, قاۋىپسىزدىك كەڭەسى دەلەگاتسياسىنىڭ كابۋلعا ساپارى جانە وسى جىلدىڭ قاڭتارىندا بۇل ماڭىزدى حالىقارالىق ورگاندا قازاقستاننىڭ توراعالىعى كەزىندە بۇۇ قاۋىپسىزدىك كەڭەسىندە اۋعانستان بويىنشا پىكىرتالاستار ۇيىمداستىرۋى اتاپ ءوتىلدى.
جالپى, ساياسي كونسۋلتاتسيالار قازاقستان مەن شۆەيتساريا اراسىنداعى ساياسي جانە ەكونوميكالىق ىنتىماقتاستىقتىڭ الداعى ناقتى باعىتتارىن ايقىنداۋعا مۇمكىندىك بەردى.
دايىنداعان جولدىباي بازار,
«ەگەمەن قازاقستان»
