– «رۋحاني جاڭعىرۋ» باعدارلاماسى اياسىندا جاسالىپ جاتقان جۇمىستار وتە كوپ. ءبىر عانا «اتامەكەن» باعدارلاماسىنىڭ العاشقى «الەۋمەتتىك باستامالار كارتاسى» باعىتى بويىنشا رەەسترگە ەنگەن 118 ءىس-شارانىڭ وتكەن جىلى 59-ى جۇزەگە اسىرىلدى, قالعان 59 شارا بيىلعا مەجەلەنگەن. باعدارلامانى ىسكە اسىرۋ بارىسىندا 50 ورتا مەكتەپ سپورتتىق جابدىقتارمەن قامتىلىپ, وبلىستاعى ەمحانالارعا دارىگەرلىك قۇرالدار الىنىپ بەرىلدى. اقتاۋ قالاسى تۇرعىندارىنا سپورت الاڭدارى تارتۋ ەتىلىپ, جاس ماماندار ءۇشىن 500 ورىندىق جاتاقحانا پايدالانۋعا بەرىلدى. مەملەكەت, كوممەرتسيالىق ەمەس سەكتور جانە بيزنەس ارىپتەستىگى بويىنشا ءوزارا ارەكەتتەستىك الاڭىن قۇرۋ ماقساتىندا «اسار» فورۋمى وتكىزىلىپ, ەكى كەزەڭدە جينالعان 55 ملن تەڭگەگە 6300 وتباسىنا – اۋىر دەرتتى سابيلەرگە, قارتتار ۇيىنە, جالعىز باستى انالارعا, بالالار ءۇيىنىڭ تاربيەلەنۋشىلەرىنە كومەك كورسەتىلدى. «تۋعان جەرگە تاعزىم» اكتسياسى اياسىندا تۇلەكتەر قولداۋىمەن بەينەۋ اۋدانىنىڭ تۇرىش اۋىلىندا «دەمالىس باعى» اشىلسا, اۋدان ورتالىعىندا «جۇبايلار باعى», بورانقۇل اۋىلىندا سپورت الاڭى, ماڭعىستاۋ اۋدانىنىڭ شەتپە كەنتىندە سپورت كەشەنى, ساۋىقتىرۋ-ءجۇزۋ باسسەينى اشىلدى.
«رۋحاني قازىنا» ىشكى باعدارلامانىڭ ءۇش بازالىق باعىتى دا اۋقىمدى ىستەردى اتقارا ءبىلدى. كىتاپحانالار مەن مۇراجايلار قىزمەتىن رەتتەۋ باعىتىندا بىرنەشە ماڭىزدى ءىس-شارالار ءوتىپ, مۇراجاي قورىنداعى جادىگەرلەردى ناسيحاتتاۋ جۇمىستارى جۇرگىزىلدى. قازىرگى تاڭدا «مۇراجاي قۇندىلىقتارىنىڭ قوزعالىسى مەن ەسەبىنىڭ اۆتوماتتاندىرىلعان جۇيەسى» باعدارلاماسىن الۋ مەن قوندىرۋ, ەلەكتروندى سەنسورلىق كيوسكىلەر الۋ جانە ورناتۋ جۇمىستارى جۇرۋدە. وتپان تاۋدا امال مەرەكەسى, اقىندار س.اداي, س.نۇرجان, ە.راۋشانوۆتىڭ شىعارماشىلىق كەشتەرى, رەسپۋبليكالىق جىرشىلار بايقاۋى, حالىقارالىق تەاتر فەستيۆالى, تاعى باسقا كوپتەگەن شارالار ۇيىمداستىرىلدى, – دەيدى «رۋحاني جاڭعىرۋ» وڭىرلىك جوبالىق ءوفيسىنىڭ باسشىسى گ.ازان.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
