اتالعان ءىس-شارانى مەكەمە باسشىسى رۋستام بيكەنەۆ اشىپ, سايىستىڭ ماڭىزدىلىعىنا توقتالىپ, بارلىق قاتىسۋشىلارعا ساتتىلىك تىلەدى.
بۇل ءىس-شارانى ۇيىمداستىرۋداعى ماقسات مۋزەيگە كەلۋشى قوناقتار ءۇشىن, ولارعا كاسىبي ساپالى قىزمەت كورسەتەتىن گيد ماماندار دايىنداۋ بولىپ وتىر. سونىمەن قاتار بايقاۋ «ەجەلگى تاراز ەسكەرتكىشتەرى» قورىق-مۋزەيىنىڭ 20 جىلدىعىنا وراي جوسپارلانعان ءىس-شارالاردىڭ ءبىرى بولاتىن.
ءىس-شاراعا وبلىس اۋماعىنداعى مۋزەيلەر, تۋريستىك كومپانيالار, تۋريزم باسقارمالارىنان 12 قىزمەتكەر قاتىسىپ, باق سىنادى. ەكى كۇنگە سوزىلعان بايقاۋدا بارلىق قاتىسۋشىلار وزدەرىن جاقسى جاقتارىنان كورسەتە ءبىلدى. بايقاۋ شارتى بويىنشا ءار قاتىسۋشى ءوزىن 7 مينۋتتىق ۆيدەوروليك ارقىلى ءۇش تىلدە تانىستىرىپ, بايقاۋ ەرەجەلەرى بويىنشا سايىسقا ءتۇستى.
بايقاۋ قورىتىندىسى بويىنشا جامبىل اتىنداعى «رۋحانيات» ورتالىعىنىڭ ەكسكۋرسوۆودى ءاينىل ءابۋالى باس جۇلدە (150 000 تەڭگە), «ەجەلگى تاراز ەسكەرتكىشتەرى» مۋزەيىنىڭ ەكسكۋرسوۆودى تاڭشولپان جۇزباەۆا ءى ورىن (100 000 تەڭگە), جامبىل وبلىستىق ولكەتانۋ مۋزەيىنىڭ قىزمەتكەرى جامال اقپان ءىى ورىن (75000 تەڭگە), وسى مۋزەيدىڭ تاعى ءبىر قىزمەتكەرى جۇلدىز المانوۆا ءىىى ورىندى (50 000 تەڭگە) يەلەندى. سايىسكەرلەر ىشىنەن «ەجەلگى تاراز ەسكەرتكىشتەرى» مۋزەيىنىڭ ەكى قىزمەتكەرى ءاليا وسپانوۆا مەن اقجان ورازباقوۆا «ەرۋديت ەكسكۋرسوۆود», «كرەاتيۆتى ەكسكۋرسوۆود» اتالىمىنا, ال «تارازتراۆەل» تۋروپەراتورىنىڭ قىزمەتكەرى قىرباس بەرەكە «كورەرمەن كوزايىمى» اتالىمىنا يە بولدى.
سايىسكەرلەردىڭ بارلىعىنا سەرتيفيكاتتار مەن ديپلومدار, قارجىلاي سىيلىقتار تاپسىرىلدى.
الماس مۇحتاروۆ,
«ەجەلگى تاراز ەسكەرتكىشتەرى» قورىق-مۋزەيىنىڭ ءبولىم باسشىسى
