جاقسىلىق جارشىلارىن سالتاناتتى تۇردە قۇتتىقتاعان وبلىس اكىمى ەرلان قوشانوۆ ءتورتىنشى بيلىكتى تورگە وزدىرىپ, ءوڭىردىڭ وركەندەۋىنە وزىندىك ۇلەستەرىن قوسىپ جاتقان ارىپتەستەرگە ەرەكشە ءىلتيپات ءبىلدىردى.
– مەن وسى ساحناعا كوتەرىلمەس بۇرىن, ءبىر قىزىق دەرەكتى وقىپ, شولىپ ءوتتىم. الەمدە 40 ميلليوننان استام جۋرناليست بار ەكەن. بىراق, سول 40 ميلليوننىڭ ىشىندە, ءبىز ءۇشىن قاراعاندىلىق تىلشىلەر – ەڭ مىقتى, ەڭ قارىمدى, ەڭ وتانشىل دەپ ەسەپتەيمىن. ءسوزىمنىڭ دالەلى رەتىندە, بۇگىن ءبىزدىڭ «ورتالىق قازاقستان» گازەتىنىڭ باس رەداكتورى ماعاۋيا سەمباي – وتاندىق جۋرناليستيكانىڭ دامۋىنا قوسقان ەلەۋلى ۇلەسى ءۇشىن قر پرەزيدەنتى سىيلىعىنىڭ يەگەرى اتاندى. بۇل – قاراعاندى جۋرناليستيكاسىنا بەرىلگەن باعا, ۇلكەن ابىروي, – دەدى ايماق باسشىسى.
بيىل جانىنا قاعازى مەن قالامىن سەرىك ەتكەن ءسوز ساردارلارى 10 اتالىم بويىنشا انىقتالدى. ماراپاتقا وبلىس ورتالىعىنان, قالا اۋداندارداعى ءباسپاسوز, تەلەارنا, راديو, سايت تىلشىلەرىمەن, فوتوسۋرەتشى, تەحنيكا شەبەرلەرى ءتارىزدى, سونىمەن قاتار رەسپۋبليكا كولەمىندە حابار تاراتاتىن باق قىزمەتكەرلەرى يە بولدى. بيىلعى 1 ملن تەڭگە كولەمىندەگى «التىن سۇڭقار» سىيلىعىنىڭ باس جۇلدەسى «حابار» اگەنتتىگى اق قاراعاندى قوسىنىنىڭ ۇجىمىنا بۇيىردى.
مەرەكەلىك شارا كونتسەرتكە ۇلاسىپ, ەسترادا جۇلدىزدارى ونەر كورسەتتى.
ميراس اسان,
«ەگەمەن قازاقستان»
