قالا باسشىسى ءا. يسەكەشەۆ پەن گەرتسوگ گلوستەر كورمەنى ارالاپ بولعان سوڭ, ەلوردامىزدا قازاقستاندىق-بريتاندىق بىرلەسكەن جوبالاردى ىسكە اسىرۋ جونىندە كەلىسسوزدەر جۇرگىزدى.
قوس تاراپ ىنتىماقتاستىقتىڭ زور الەۋەتىن اتاپ ءوتتى, ەكى مەملەكەت اراسىنداعى ىسكەرلىك بايلانىستى ودان ءارى نىعايتىپ, كەڭەيتۋ ءۇشىن قاجەتتى جاعداي جاساۋعا دايىن ەكەندىكتەرىن جەتكىزدى.
وعان قوسا اكىم مەن گەرتسوگ بريتان پاۆيلونىنىڭ اۋماعىندا «قازاقستان رەسپۋبليكاسىندا قالالىق جوسپارلاۋ مەن BIM تەحنولوگياسىن ەنگىزۋ» تاقىرىبىنا ارنالىپ وتكەن «دوڭگەلەك ۇستەلدە» قۇتتىقتاۋ ءسوز سويلەدى.
اتالمىش «دوڭگەلەك ۇستەلدى» قر-عى ۇلىبريتانيا ەلشىلىگى مەن «يننوۆاتسيالىق تەحنولوگيالار پاركى» اۆتونومدىق كلاستەرلىك قورى ۇيىمداستىردى.
وعان Gillespies,Pavegen, IBM,AutodeskCIS,EcoDomusInc.,IdeaFabrikPLC-TheHeroEngineCompany, Crowne Agents جانە مانچەستەر ۋنيۆەرسيتەتى سىندى بىرقاتار بريتاندىق جانە امەريكاندىق كومپانيالار مەن ۇيىمداردىڭ وكىلدەرى قاتىستى.
ايتا كەتكەن ءجون, گەرتسوگ گلوستەر ۇلىبريتانيا پاتشايىمى ءىى ەليزاۆەتانىڭ نەمەرە ءىنىسى, ول ەل ىشىندە جانە شەتەلدىك ءىس-ساپارلارعا شىعىپ, قوعامدىق ماڭىزى بار ىستەرگە بەلسەنە ارالاسادى.
