ارحيۆ ديرەكتورى, تەحنيكا عىلىمدارىنىڭ دوكتورى بوريس جاپاروۆ جۇرگىزگەن كەزدەسۋدىڭ باستى ەرەكشەلىگى – ەلباسى كوتەرگەن يدەياعا شەتەلدىك عالىمداردىڭ كوزقاراس ءبىلدىرۋى بولدى. كيبەرنەتيكا مەن جۇيەلى زەرتتەۋلەر سالاسى بويىنشا حالىقارالىق وزىق زەرتتەۋلەر ينستيتۋتىنىڭ ديرەكتورى جانە ديرەكتورلار كەڭەسىنىڭ توراعاسى كانادالىق دج.لاسكەر مەن جاپونياداعى ريتسۋمەيكان ۋنيۆەرسيتەتىنىڭ قۇرمەتتى پروفەسسورى, ەكونوميكا عىلىمدارىنىڭ دوكتورى كەي كاراساۆا بارشا قازاقستاندىقتار الدىنا قويىلىپ وتىرعان رۋحاني تالاپتارعا بايلانىستى باسقوسۋعا ارنايى شاقىرىلعان الماتى قالاسىنداعى قوعام قايراتكەرلەرىمەن بىرگە وي قوسىپ, قازاقستان عالىمدارىمەن بىرلەسە اتقاراتىن ورتاق جوبالار جونىندە اڭگىمەلەدى.
پرەزيدەنت ءارحيۆى ديرەكتورىنىڭ ورىنباسارى, تاريح عىلىمدارىنىڭ دوكتورى قايرات الىمعازينوۆ باعدارلامالىق ماقالانىڭ ماڭىزى تۋرالى ارنايى بايانداما جاساپ, ۇلتتىق سانا-سەزىمىنىڭ دامۋىنا ىقپال ەتەتىن نەگىزگى تەتىكتەردى اتاي وتىرىپ, حالقىمىزعا رۋحاني ازىق بولاتىن تەرەڭ مازمۇنىن تاراتا ايتتى. قوعامدىق سانانى جاڭعىرتۋ جونىندەگى يدەيا وسى ۋاقىتقا دەيىن جۇرگىزىلگەن رەفورمالاردىڭ زاڭدى جالعاسى بولۋىمەن ءمانىن بايىتىپ, قۇندىلىعىن ارتتىرا تۇسپەك.
ۇلتتىق عىلىم اكادەمياسىنىڭ اكادەميگى ابدىقاپپار ءاشىموۆ تە ساياسي جانە حالىقارالىق تۇرعىدان كوشباسشىلىققا يە بۇگىنگى قازاقستاننىڭ جاڭا كەلبەتى تۋرالى اڭگىمەلەدى.
ەلەكترتەحنيكا مەن كومپيۋتەر عىلىمى سالاسى بويىنشا مىڭداعان شاكىرت تاربيەلەپ, الەمنىڭ بەلگىلى ۋنيۆەرسيتەتتەرىندە ءدارىس وقىپ, كوپتەگەن عىلىمي جوبالارعا جەتەكشىلىك جاساعان ە.لاسكەر قازاقستاندى بۇرىننان بىلەتىنىن, قازبا بايلىعى مول, ساياسي تۇراقتى ەل رەتىندە تانيتىنىن جانە قازاقستانعا اقپاراتتاندىرۋ جۇيەسى, ماتەماتيكالىق جانە كومپيۋتەرلىك مودەلدەۋ ماماندىعى بويىنشا ءبىلىم الىپ جاتقان ماگيسترانتتار مەن دوكتورانتتارعا ءدارىس وقۋعا ارنايى شاقىرىلعانىن جەتكىزدى. ەلباسى ن.نازارباەۆتىڭ جاڭا باعدارلامالىق ماقالاسى تۋرالى ەستىپ, مازمۇنىمەن تانىسقاننان كەيىن پرەزيدەنتتىڭ ەلدە تۇبەگەيلى جاڭارۋ ۇدەرىستەرىن جۇرگىزۋگە باعىتتالعان باستاماسىن قولدايتىنىن ايتتى.
ال جەرىندە تابيعي قازبا بايلىعى جوقتىڭ قاسى بولىپ ەسەپتەلەتىن, الايدا ادام ەڭبەگى اسا قۇندى كاپيتال بولىپ سانالاتىن جاپونيادان كەلگەن قۇرمەتتى پروفەسسور كەي كاراساۆا قازاقستانعا العاش رەت 1990-جىلدارى ەكونوميكا مينيسترلىگىنىڭ شاقىرۋىمەن كەلسە, بۇل جولى اكادەميك ءا.ءاشىموۆتىڭ ۇسىنىسىمەن ستۋدەنتتەر مەن عىلىمي ىزدەنۋشىلەرگە ارنايى ءدارىس وقۋعا كەلگەن. كەي كاراساۆا بولاشاعى زور جاس مەملەكەتتىڭ ءار جەتىستىگى حالىق سەنىمىن نىعايتىپ, ەرتەڭگە ءۇمىتىن ۇلعايتا تۇسسە دەگەن تىلەگىن ءبىلدىردى.
ايگۇل احانبايقىزى,
«ەگەمەن قازاقستان»
الماتى
