ەكى جارىم مىڭ جىل بۇرىنعى وقيعانى جاڭعىرتىپ, اتى اڭىزعا اينالعان تاڭعاجايىپ تۇماردىڭ ءوز حالقىنىڭ بوستاندىعى ءۇشىن كۇرەسكەن ەرلىگى مەن ايەلگە ءتان ماحابباتىن ونەر ءتىلىمەن سويلەتۋ وڭاي شارۋا ەمەس. مىنە, ەندى مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» اق «ساتايفيلم» كينوستۋدياسىمەن بىرلەسە وتىرىپ, بيىلعى جىلدىڭ ەڭ ءىرى جوباسى – «تۇمار» اتتى تاريحي جوبانىڭ ءتۇسىرىلىمىن قولعا الىپ, دايىندىق جۇمىستارىن باستاپ تا كەتتى.
بۇعان دەيىن «رەكەتير», «اداسقاندار», «ليكۆيداتور», «جاۋجۇرەك مىڭ بالا» اتتى فيلمدەردى ءساتتى ءتۇسىرىپ, «اناعا اپارار جول» تۋىندىسىن ءاليا نازارباەۆامەن بىرگە شىعارماشىلىق بىرلىكتە جۇزەگە اسىرعان رەجيسسەر اقان ساتاەۆتىڭ «تۇمار» تۋرالى تۋىندىسى تاعى دا ەكى جاقتى جاۋاپكەرشىلىكپەن اتقارىلماق.
– بۇل اۋقىمدى جوبانىڭ اۆتورى – ءاليا نۇرسۇلتانقىزى. وزدەرىڭىزگە بەلگىلى, «اناعا اپارار جول» فيلمىندە بىرلەسىپ, تابىستى جۇمىس جاسادىق. ەندى, مىنە, مەن جانە مەنىڭ ءتۇسىرۋ توبىم اسا قىزىعۋشىلىقپەن جانە ۇلكەن جاۋاپكەرشىلىكپەن وسى تاريحي جوباعا كىرىسكەلى وتىرمىز. بۇگىنگى كۇنى تاريحي ماتەريالدارمەن تانىسىپ, ستسەناريدى جازۋ جانە تالداۋ, جوبانىڭ ءوندىرىسىن جوسپارلاۋ, ءتۇسىرۋ توبىن قۇرۋ, عالىم-كەڭەسشىلەردى جوباعا تارتۋ, الدىن الا ءتۇسىرىلىم لوكاتسيالارىن تاڭداۋ سياقتى دايىندىق جۇمىستارى جۇرگىزىلۋدە, – دەدى اقان ساتاەۆ.
رەجيسسەر جاقىن كۇندەرى رەسپۋبليكالىق كاستينگ جاريالاناتىنىن حابارلادى. فيلم ءتۇسىرىلىمى باستالماي تۇرىپ, بارلىق اكتەرلەر قارۋ-جاراق اسىنىپ, اتقا جايداق ءمىنىپ, ساداق تارتىپ, سوعىس ونەرىنەن ساۋاتتارىن اشۋ ءۇشىن الدىن الا دايىندىقتان وتەتىن بولادى. فيلم ءتۇسىرۋ جۇمىسى بيىلعى جىلدىڭ قازان ايىندا باستالىپ, 2018 جىلدىڭ اقپانىنا دەيىن جالعاسادى. كينوتۋىندىنىڭ ستسەناريىن جازۋدى ءاليا نازارباەۆا مەن تيمۋر جاقسىلىقوۆ قولعا العان. ايتا كەتسەك, ءتۇسىرۋ جۇمىستارىنا ەلىمىزدىڭ الدىڭعى قاتارداعى كينو ماماندارى قاتىسادى, سونىمەن قاتار, شەتەلدىك ماماندار, ونىڭ ىشىندە سكريپت-دوكتور جانە كومپيۋتەرلىك گرافيكا شەبەرلەرى جۇمىلدىرىلاتىن بولادى.
ايگۇل احانبايقىزى,
«ەگەمەن قازاقستان»
الماتى
