ءبىر عاسىر ساقتالعان شەلەك

وسكەمەندىك ەلقانات تۇرىم­تاي ۇلى ءۇيدىڭ ءسۇت كەنجەسى. قارا­شاڭىراقتى ۇستاپ وتىرعان بۇل اۋلەتتە اتادان بالاعا جالعا­سىپ كەلە جاتقان كونە جادىگەرلەر بار. ماسەلەن, بيە ساۋاتىن اعاش شەلەكتى الايىق. بۇل بۇيىم اق تەرەكتەن شابىلىپ جاسالعان ەكەن. ءبىر عاسىردان اسسا دا قانشاما قۇدايى قوناقتى قىمىزعا قان­دىرعان شەلەكتىڭ ءالى كەتەۋى كەتپەگەن. ءالى دە پايدالانۋعا بولاتىنداي ءبۇتىن, ءتىپتى بەرىكتىگى ارتا تۇسكەندەي بەرەكەلى ىدىس. – بۇل شەلەك ءبىزدىڭ ۇلى اجەمىزدىڭ جاساۋىمەن بىرگە كەلگەن ەكەن. موڭعوليانىڭ بايان-ولگەي ايما­عىنداعى قىزىلقايىڭ دەگەن جەردە تۇرعان باۋشا ەسىمدى اجەمىز اۋىلداسى نوري ۇلى مۇسىربايعا تۇرمىسقا شىعادى. ءمۇسىرباي كەدەي بولسا, باۋشا انامىز داۋلەتتى كىسىنىڭ قىزى ەكەن. اكەسى سىرگەتاي ۇستا ادام بولسا كەرەك, قىزىنىڭ جاساۋىن ءوزى جاساپ, كيىز ۇيىمەن بىرگە, ياعني وتاۋىمەن ۇزاتىپتى. 13 قۇرساق كوتەرگەن اجەمىزدىڭ سەگىزىنشى بالاسى بولىپ ءبىزدىڭ اكەمىز دۇنيەگە كەلگەن. حح عاسىردىڭ باسىندا ۇزاتىلعان باۋشا اجەمىز ۇزاق جاساپ, جەت­پىسىنشى جىلدارى دۇنيەدەن ءوتتى. بۇگىندە نەمەرە-شوبەرەلەرى ۇلى اجەمىزدىڭ دۇنيە-مۇلكىن قاستەرلەپ, كوزدىڭ قاراشىعىنداي ساقتاپ كەلەدى, –  دەدى ەلقانات. ايتۋىنشا, بابادان قالعان كونە مۇرانىڭ اراسىندا بيە ساۋاتىن شەلەكتەن باسقا ەت تاباق, كەلى-كەلىساپ, قازان-وشاق, كۇمىستەلگەن جۇگەن جانە تۇسكيىز سياقتى 15-كە جۋىق تۇرمىستىق دۇنيەلەر بار. ءبىرشاماسى باسقا اعايىنداردىڭ ۇيىندە ساقتاۋلى. 1997 جىلى اتامەكەنگە كوشىپ كەلگەن ەلقانات قاراشاڭىراقتا سونداي-اق, اتاقتى ەر جانىبەكتىڭ قىمىز ىشكەن كەسەسى مەن قىلىشىنىڭ قىنى بولعانىن, اكەسى بۇل زاتتاردى باتىردىڭ 300 جىلدىق مەرەيتويى كەزىندە استاناداعى مۋزەيگە سىيلاعانىن ايتتى. دۋمان اناش, «ەگەمەن قازاقستان» وسكەمەن