«بارىس» كەزەكتى جەڭىسىنە جەتتى

قۇرلىقتىق حوككەي ليگاسىنىڭ تۇراقتى چەمپيوناتىندا استانانىڭ «بارىسى» لاتۆيانىڭ ريگا قالاسىندا جەرگىلىكتى «دينامو» كومانداسىمەن كەزدەسىپ, 3:2 ەسەبىمەن جەڭىسكە جەتتى. جانكۇيەرلەر تارتىسقا تولى كەزدەسۋگە كۋا بولدى. العاشقى كەزەڭدە بىرقاتار شابۋىلدار ۇيىمداستىرىلعانمەن, ءبىر عانا شايبا سوعىلدى. 13-مينۋتتا رومان ستارچەنكونىڭ سوققىسى كوزدەگەن جەرىنەن ءدال تابىلدى. ماتچتىڭ ەكىنشى كەزەڭىندە ايدىن يەلەرى قورعانىستا ساق قيمالداپ, جۇيەلى ويناۋعا تىرىستى. وسىنىڭ ارقاسىندا 28-مينۋتتا ميكس يندراشيس مەرگەندىگىمەن تانىلىپ, تارازى باسىن تەڭەستىرگەن, الايدا, 36-مينۋتتا نايدجەل دوۋس كومانداسىن كەزەكتى رەت ەسەپتە العا شىعاردى. كەزدەسۋدىڭ سوڭعى 20 مينۋتىندا ەدۋارد زانكوۆەتستەن جاڭا نۇسقاۋلار العان «بارىس» ويىنشىلارى قارسىلاستارىن قىسپاققا الىپ, قاۋىپتى ساتتەردى ءجيى ۇيىمداستىردى. 46-مينۋتتا نايدجەل دوۋس جەتكىزگەن شايبانى داستين بويد قاقپاعا ءدال باعىتتاپ, ءوز كومانداسىنىڭ ءۇشىنشى شايباسىن سالدى. ال ماتچتىڭ اياقتالۋىنا بىرەر مينۋت قالعاندا «دينامو» ساپىنان لاۋريس دارزينش سوڭعى نۇكتەنى قويدى. وسىمەن 53 ماتچتا 81 ۇپاي جيناعان استانالىقتار «شىعىس» كونفەرەنتسياسىندا بەسىنشى ورىنعا كوتەرىلدى. كەلەسى كەزدەسۋىن 28 قاڭتار كۇنى مينسكىدە «دينامومەن» وتكىزەدى.